乜嘢叫罷工——僱員罷工與全港大罷工

 

身為一個花生友,天下大亂係最好睇,有大戲睇,點都好過睇埋曬啲飯民與政府互X 嘅小電影。

今日有人廣傳叫人星期二三「罷工」,如果真係發生,我都好想睇。

不過慘嘅係,好似好多人誤會左咩係罷工。

 

首先講罷工唔係乜。

罷工唔係請假。

罷工唔係唔開一兩日工。

罷工唔係驚同事做埋你嗰份辛苦曬。

 

咁罷工係乜?

如果你嘅罷工對象係老闆,你嘅罷工訴求係加人工唔OT 之類嘅工人權益,咁你地罷工嘅效果,就係要令到個企業運作唔到。

點為知運作唔到?舉例咁講,如果你做製衣廠,你負責操作部紡紗機,你係要熄左部機先離開工作崗位,同埋唔會再有其他人可以去到你嗰個工作崗位,部紡紗機開唔到,咁就無紗線供應俾織布機,咁成個製衣廠就運作唔到。

其他工作崗位,只要你係一個關鍵嘅位置,停左佢,唔俾人做,都有相同效果。

所以點解工會成日講「團結」,就係得你一個停,無用嘅,你停左,仲要其他人補唔到。所以你嘅位置要係關鍵,個關鍵嘅意思唔一定係話乜嘢管理層,而係有足夠關鍵令個生產停左;又所以,要有罷工糾察隊,阻止其他人返工。

 

咁全港大罷工即係點?

即係你嘅罷工對象係個社會,係個制度,你罷工嘅效果,係要令個社會運作唔到。

點為之個社會運作唔到?

如果你做送外賣,你罷工,sorry,我食少三年外賣都唔會死,我可以去堂食。

如果你開餐廳,你罷工,sorry,我出少三年街食都唔會死,我可以自己煮。

相反,再數落去,就會發現,關於飲食,真係有啲位係好關鍵。

做貨櫃碼頭呢?做口岸呢?渣貨櫃車呢?呢啲位置罷工,唔係街市唔開我幫襯超市嘅隻,就真係會令我餓死。乜嘢叫罷工睇返上面,除左你唔揸貨櫃,仲要令其他人揸唔到貨櫃。

再數落去:

你做耀才證券,你罷工無人會care,但成個香港交易所運作唔到,就係一件事。

你做水電,你罷工無人會care,但發電廠運作唔到,就係一件事。

你做港鐵黃背心,你罷工無人會care,但地鐵開唔到車,就係一件事。

 

如果大家真心想罷工,應該喺你嘅行業,上至下都連結到,然後達到癱瘓成個公司運作,或者癱瘓香港運作,咁先係罷工,而唔係曠工,well,更加唔係請假。

利申唔會罷工,利申無工返廢老,利申賤人,利申而家飲緊咖啡食緊意粉。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195176
Date: 2019-06-10 17:41:32
Generated at: 2019-08-25 18:32:00
Permalink: https://www.vjmedia.com.hk/articles/2019/06/10/195176/乜嘢叫罷工-僱員罷工與全港大罷工