做左警察嘅中學同學,仲可唔可以係朋友?

 

見到討論區到有人話自己既同學做左警察後成個人變晒,仲話要親手拉左做示威者既出帖人,然後又肯定相信遊行人士只有十幾萬等等。樓主話已經唔識呢堆過往仲有一齊去遊行去六四靜坐既同學,仲話唔知點樣面對佢地喎。

首先,現實世界入面,警察就係警察。警察係紀律部隊,唔係同你做朋友,佢地服從既一定係上司既指令,如果唔係唔好話執行任務,連警察學堂都出唔到。所以係成個過程,接受警隊灌輸既價值觀係必須既。好聽就係扶正自己既思想,可以不偏不倍執行任務;唔好聽既,就係洗腦。不論係警察,抑或係軍隊,都係政治架構入面最重要既力量。如果佢地唔係站係為政者既一方,政權可以隨時一夜改寫,呢樣野就係兵變。所以絕對服從就係第一重要,佢地係唔需要有其他多餘既思想既。

講真,唔拎走自己多餘既私人感情,又點樣大義滅親?唔好講同學,阿爸阿媽都可以照拉。呢D就係大義滅親。而義根據先知講,就係基本法所賦予既。我即正義,惡即斬。係呢個前提下,有啲野我都想同番警察講既,如下。放心,一啲都唔激進,而且仲好設身處地係佢地角度考量架係:

上佢地既網頁去睇,警察既抱負係「使香港繼續是世界上其中一個最安全及穩定的社會」,我相信你地真係做得非常好,用左咩手段,我都唔敢去質疑;你地既目標如網頁所寫,係「確保社會安穩」,所以一定要「維護法紀」,「維持治安」,我亦非常理解。而且呢度的確無話要咩正義先行,甚至良心行事。呢樣唔係你地既考量。不過之後幾點,我就相信你地自己都唔覺得自己做到喇?

1係「保障市民生命財產」,如香港電台今日播出既影片顯示,你地記者就可以接近照打,惡言相向,你話有人係暴徒要執行職務,你當我真係蠢到信埋喇,咁有晒工作證件,渣晒相機係咁大叫自己係記者既人你都照郁,仲要加句「記者又點呀?」嘩,你咁霸氣對待一般市民,點樣保障佢地生命財產?點樣相信你地有根據聯合國人權公約?至於你地另一個目標係「維持市民對警隊的信心」,更加好笑。咩你地認為呢五至十年,市民對你地係呢方面既信心,真係毫無動搖?

好喇,講完抱負同埋目標,最值得玩味既係價值觀,我唔知排行有無關係,去到第三樣先講係咪代表唔重要,咁姑且都講埋,佢地分別係:

1。正直及誠實的品格
2。尊重市民及警隊成員的個人權利
3。以公正、無私和體諒的態度去處事和對人
4。承擔責任及接受問責
5。專業精神
6。致力提供優質服務達至精益求精
7。盡量配合環境的轉變
8。對內、對外均維持有效的溝通

基本上,我只係見到7你地做到。點解?因為尋晚一睇已經見你地充份汲取左雨傘既教訓,不論裝備同行動同布署都得到明顯既提升,市民真係有眼睇你地有配合到環境既轉變,水炮車都買左,用唔用就你地會睇時機架啦。至於其餘幾條呢,自從暗角事件之後,真係好難JUSTIFY BY FACT架。OK你話我妖言惑眾又好,我地都係執行職務所以其他野都係費鳩事理都好,但大家都睇得清楚,原來警隊本身都應該著重任務背後要有INTEGRITY架。講多個故仔分享俾大家知:

果陣731部隊日本軍隊捉好多無辜既人去做人體實驗,部下一直被接受既訓練都係,唔好當佢地係人,佢地只係木頭,而做實驗係為左日本帝國既勝利,所以係必須既。因此,佢地亦一直不偏不倚咁樣執行佢地既任務,好成功,無一絲既懷疑,就好似你地咁,其他一齊既批評,都係屈你地,無理取鬧,而且唔懂得你地處境。好喇,到有一次,出現大規模既逃獄事件,有逃犯竟然可以突破到重重既防線幾乎去到出口門前。但係都係俾軍隊大舉包圍。眼見逃脫機會渺望,有個俄羅斯逃犯一喝左聲:

「你地無論做咩都好,正義始終唔係你地果邊!」

係,結果佢都係死於日本軍隊槍下,無法逃生。但據有紀錄話,有不少日本人果一下真係無比動搖,因為佢地突然嚇左一嚇,個腦難得咁脫離枷鎖轉左一轉,佢地都知道原來自己真係無咩都好,無辦法取得正義既授權。呢樣野到最後都會係歷史上被揭發。雖然俄羅斯人咁樣叫,其實咩撚用都無,但係人文精神咁講,又真係岩。如果再離地D去訴諸因果報應,就係人在做,天在看。你地到最後都不能安枕,終生會受到某種力量所輾壓同責備。

ANYWAY I KNOW IT IS PART OF YOUR JOB。你地返到屋企都有家庭架嘛。你地都好有苦衷嘛。你地前線好多壓力呀嘛。我地都係負責執行職務架渣。岩既,同殺猶太人毒氣室既人員,都係開個掣,死人其實唔關我事架。咁呀,我都無咩好既建議架啦,其中唯有真係勸你地快啲信主,無番咁上下宗教信念意義,好難做落去架。改善警隊形象你地都唔好希望搵TVB拍套劇就可以改變到咩喇。俾人話黑警?睇黎忍辱負重喇都要。辛苦晒!

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195181
Date: 2019-06-10 22:01:14
Generated at: 2019-09-19 05:28:45
Permalink: https://www.vjmedia.com.hk/articles/2019/06/10/195181/做左警察嘅中學同學,仲可唔可以係朋友?