其實你知唔知今次可能真係會死? 

政總方圓二百米已佈滿警察防線。鄭啟文攝

 

香港人成日同人講「唔好死」,唔知係咪講得太多,當有人叫大家唔好去衝去死,大家都覺得只講笑。但今次並唔係講笑,你去立法會想衝想突破,個結果隨時真係會死,你預備好未架?

頭先吳文遠出個Post,話下星期四最終決戰。眾志羅冠聰話今次係長期抗爭,言下之意,就係今晚唔係時機,呢班人好大機會唔會係現場,民陣班政工作者唔會係現場,無物資、無音響、無議員係現場做下姿態。只係得一班好想衝嘅後生仔搵命博。泛民政工作者就係想睇你衝然後俾人打到仆街,然後係facebook/私下笑柒你,(前)激進派可能會覺得好難過好心痛,但班人永遠唔係傷果個。香港電台話,警察今次會配橡膠子彈。但俾橡膠子彈打中,都係會死的。

可能你會諗,「屌,無呢班左膠仲好。」,但當警察殺到,個個走散晒,連一個有經驗可以嗌下咪嘅人同音響都無,群眾會失焦,好似六月九號晚咁迷惘,邊打邊退,你嘅犧牲只會俾人搶佔道理高地,拎多幾個讚好同議席。但警察殺紅眼果陣,受傷被捕都係小事,當橡膠子彈飛到你眼前,你真係覺得會想犧牲自己?

你有無想去嘅地方未去?想睇嘅戲未睇?想陪嘅人未陪?呢個咁嘅香港,真係值得用條命去守護?仲要俾無數嘅「香港人」同傳媒老屈,真係值得以命相搏?其實一啲都唔值得。

我尋日同一個朋友講完同一番話,朋友話:「為左香港,死又有咩所謂。」我知有好多人都係咁諗,但如果有一個人睇到呢篇文,你覺得可能真係唔值得為香港死,我希望你搵定方法閃人/避難,唔好犧牲自己寶貴嘅生命係呢件事上。

有香港人,先至有香港。邊度有香港人,邊度就係香港。留住你嘅生命,將香港承傳落去。

唔好死,真係唔好死。

 

作者:肥仔甲

除左肥,無可奉告

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195234
Date: 2019-06-11 17:36:50
Generated at: 2019-09-16 21:36:43
Permalink: https://www.vjmedia.com.hk/articles/2019/06/11/195234/其實你知唔知今次可能真係會死?