2019 嘅香港警察,已經唔係2014 嘅香港警察。

 

我先打結論,我唔介意你覺得我長他人志氣,亦多謝你解讀成知己知彼,從呢兩日香港警察表現出來係超級終極大進步,直頭再唔係吳下阿蒙,直頭唔見佢地五年刮目相看。

 

(利申先,下午去過現場一陣,喺統一中心行到最近都係中信條橋,之後走返太古廣場了,未聞到催淚彈就遠離戰場中心,縮骨怕死就係我呢啲)

 

首先釋義,乜係進步。

從示威者嘅角度,呢個進步一定係負面,因為意味著難對付。

從當權者嘅角度,進步就係維持治安同埋達成任務嘅效率,直接啲講,就係驅散示威者嘅效率。

下文係取第二個進步,即係有效驅散,如果睇得唔舒服,請自己replace all 做痴線、凶狠、賤格,what7soever。

 

點進步法?

 

【有警員拍照留念】經過警方連番驅趕後,大批反對修訂逃犯條例的示威者,傍晚退到中環干諾道中。有數名警員在驅散行動後,面露笑容,拍照留念。#香港電台 #港台電視31 #港台電視32 #十點半新聞天地 #逃犯條例

香港電台視像新聞 RTHK VNEWS 發佈於 2019年6月12日星期三

 

面對唔同情況,一早有曬反應策略

幾年前雨傘,唔知佢地係缺乏應付群眾聚集定係乜原因,當啲人衝出馬路,警察係好似老鼠拉龜咁,一時兇下舉黃旗紅旗,唔覺意又亮黑旗,又唔覺意射兩粒催淚彈咁。

係嗰種好似好惡,但又無咩驅散效果嗰隻。

客觀效果就梗係佔領兩個幾月。

五年後呢?警察計好曬,你地班友有咩花招實招,佢地咪逐樣拆。

先講9號晚10號凌晨,有少量「比較有經驗的示威人士」,唔開名啦,比較出名都新聞有賣,及較多嘅散兵游勇,喺立法會附近聚集唔走。面對呢一萬幾千(是但啦實數唔重要),警察係好果斷出催淚彈,打散啲人,再恐怖啲,係素來好多花生友(例如我呢款怕死鬼),唔敢上前但又好似唔捨得走想睇,哈,警察係出速龍呀,係速龍,上天橋嗰啲驅散埋呢堆。

倍則分之,你聚集,佢就打散。然後用不合比例的武力驅趕,但同時一定會俾位你走,等你班友一係跌入包圍網,一係遠離立法會返屋企。嗰三百幾個驅趕到去灣仔警署,拉入去即放嗰批,就係呢款。

11號夜晚開始,警察連地鐵站入面等人,只要貌似「後生、有大個背囊」就查身份證,見到好多個口罩就當白粉。本來係好成功咁控制住啲人無得聚集,後來鄺仔上陣怒屌班差佬,先至令啲後生仔聚集到再上去立法會附近。

12號早上至下午,好多好多人聚集,癱瘓金鐘路面交通,堪稱佔中2.0,we will be back 真係back 嗰隻。

記唔記得雨傘,大家可以佔兩個幾月。

今日,六個鐘內出催淚彈、防暴警察射布袋彈,仲搞到有人重傷。

你衝擊,警察就還擊,係不合比例武力。再射催淚彈,打散你堆人。打散然後逐堆逐個趕走就好辦。

佢地驅散過程之中,見到你班示威者設立嘅救護站,係會噴胡椒落去你班救護員度,正宗所謂一打就打補師,瞄住你嘅Mercy 追殺。

 

心理質素:「你無做錯到」升格為「你做乜都唔會錯」

前警務處長曾偉雄名言「你無做錯到」,其實背後仲有意思就係,佢本人都無直接落呢啲呢啲指令,只係其他職級嘅警察,因應當時局勢做左嘢之後,有效無效都好,身為老細勉勵同僚「你無做錯」。

今次好明顯唔同。

所有警察,目標好明確,驅散。

驅散。驅散。驅散。驅散。驅散。好重要,copy and paste 五次。

為左驅散,佢地其他野可以擺埋一邊。

明明香港市民有權擁有私人財產,但係你帶物資牙?口罩、生理鹽水、護具、可以當敷料嘅M 巾、飲用水、乾糧,全部當白粉,你喊驚都無用。

明明高等法院入面好多官大人,你班示威者真係喺門口坐?擺個催淚彈喺度先。

明明連恐怖份子都唔會搞急救站,佢地會驅散埋急救站。

明明地鐵站啲職員都耐你唔何喺度等人,佢地會要你趴埋牆守身。

明明之前開槍同埋射催淚彈之前都舉幾次旗,今次理撚得你,瞄頭射,布袋彈嘛,係唔死,但射中眼唔盲都偷笑。

呢班警察,好明顯被落左指令,為左驅散,你地做咩都唔會錯,一般之前嘅人權呀常識呀道德呀,佢地全部擺埋一二面。

總之你要走,你唔走,佢有方法搞到你唔走唔得。

咁當然,佢地任務目標只係要你走,只要你肯走,警察仲未會對你背脊開槍。(仲未。嗯。)

 

今日警察慶祝自己成功達成任務,係呀好叻呀驅散曬啲人呀,唔通你地咁進步咁凶狠,仲企喺度俾你打俾你射眼牙?

都係嗰句,後生仔,你地無責任為香港犧牲任何野,包括你自己嘅健康同埋前途。

2019 嘅警察好難對付,如果你而家只係大學生嘅年紀,第一次出來衝,我諗你係LV1 打LV200 嘅概念,我仍然係叫大家唔好送死的。

大家保重。萬事小心。

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

  • 睇撐警人面書,就可以去海洋公園睇海威咁 by 健吾
    這些撐警的人,從不會離開他們安全的地方。他們只會看手機,看電視,喝著高貴的紅茶,吃著自家製的muffin,感受外面的溫度。他們大多有管理九十後的經驗,一天到晚相信「陰謀論」,覺得這些年輕人,都是有組織有訓練的,卻忘記了自己當管理層之時,叫那…
  • 開心浩園餐 by BEAR 兒
    老軍裝帶責備地拍拍警犬的頭,把紙袋拿起來說:「對不起,這個餐算是我跟你買吧,不過要麻煩你再走一次了。」…
  • 我十八歲,打緊份暑期工叫坐枱 by 金魚小姐
    我今年十八歲,剛考完dse。上星期放榜,成績只有十六七分,不夠讀大學,在retake與副學士之間我選擇了後者。我沒有豐厚家底,只是一個行出街跌個招牌會砸死十個八個的那種公屋妹。高昂學費加上漫長暑假,無意中找到一份兼職,寫明非色情非身體接觸,…
  • 無諗過會有人打來人事部講:「我都唔駛返工,我無做野好耐啦……」 by HR 扮工週記
    女士:「你哋係咪請緊侍應?」小編:「係……」飲食業人手長期短缺,入行嘅年輕人數唔多,所以可以話長期都係請緊人。正當小編以為對方對職位有興趣嘅時候…… …
  • 天才同事訂花——花園叫咩名都搞錯? by 六月的物管
    老細:「今年農曆新年邊個負責訂年花?」 吹水經理:「不如天才同事負責。聖誕花都係佢訂,雖然最後我執手尾。」…
  • 張超雄,你出賣一代抗爭者! by 左膠正垃圾
    好多市民都不肯接受,他們很支持的泛民主派,一向都跟政府是有傾有講的。不論是楊岳橋在議會廳內就炒蝦拆蟹,自己結婚之時就宴請所有的建制派議員到場祝賀。現在張超雄提出「一次性向台灣提出移交逃犯安排」,不知道他有什麼信心,可以肯定不論是政府、建制派…
歡迎讚好我們的facebook page,免費資訊源源送上。

文章資訊

ID: 195286
Date: 2019-06-12 22:35:23
Generated at: 2019-07-19 15:34:25
Permalink: https://www.vjmedia.com.hk/articles/2019/06/12/195286/2019-嘅香港警察,已經唔係2014-嘅香港警察。