【輔仁罕有支持泛民行動】技術上,最容易做又可以癱瘓城市運作嘅罷工行業係乜呢?

 

 

有啲行業,係戰略性嘅,理論上一有工潮,而且個工潮大到影響運作,立即會帶來超級嚴重後果,例如乜嘢?發電廠、供水、航空管制、電訊、互聯網網絡供應、金融交易所、銀行、貨櫃碼頭、集體運輸等等。

但調反轉,既然咁有戰略意義,呢啲行業往往就好難癱瘓,例如可能會用高薪去吸引員工乖,其次成個機構嘅運作管理都好嚴密,即係個別人士唔撈,係比較難對整個機構帶來影響,而就算有最嚴重嘅事故發生,政府都有應變計畫,例如就算成個航空管制組突然罷工,中國政府係可以從深圳調一隊航空管制員下來做嘢,唔係講玩,所以幻想呢啲重要部門入面有人變節,然後帶來嚴重後果,喺香港呢個咁先進嘅城市,其實就比較難。

 

咁有咩行業係比較容易做?

 

but 首先呢,又要講基本概念,癱瘓城市運作,與香港人習慣「唔好麻煩到人」嘅習性係相反嘅,如果罷工係對僱主,要爭取勞工權益,咁就要癱瘓企業運作,個僱主就無盈利,逼佢同你談判,而癱瘓城市運作,即係令社會運作唔到,影響曬所有階層嘅生活,咁受影響嘅人就會加入向政府施壓,要求佢平息事端。

琴日好多公關式嘅「容許員工請假」「容許員工彈性自行安排上班」嘅所謂企業支持罷工,我直接啲講,完全唔係我上面所講可以癱瘓到城市嘅罷工,我再直接啲,銀行如果真係罷工,係關閉所有分行,停止兌換外匯,停止電匯,停止供應貨幣,講到呢度,其實我唔係要苛責啲乜嘢,而係大家唔好對「罷工」存有太多美好幻想,個城市大家都要開飯,更加重要嘅係,大家係咪真係咁準備好承受,例如銀行停止一切活動呢個咁激進嘅社會動盪呢?

 

咁所以,回歸返現實,有乜嘢罷工,既影響到好多人嘅生活,同時其實個影響,係好麻煩,但又唔係真係咁致命?

我識嘢比較少,呢一刻我想放低成見,支持泛民嘅教協搞教師大罷工。

先講效果,講埋點解我支持教師大罷工,因為教師罷工,咁(理論上)學校就運作唔到,學校運作唔到,意味著學生無人照顧,而根據法例,小童係唔可以獨留在家,咁即係班家長就會好頭痕,就算扣除返有工人嘅家庭,都真係會為個社會好多人帶來影響,而呢個影響,又未至於乜嘢金融體系崩潰全民餓死,只係煩而唔致命。

然後呢,我真係好想大家多多支持教協,點支持?就係提醒佢哋,真係要搞大罷工,唔係搞大請假,唔係搞考完試大早走,係要搞到一個位,暑假之前,學校都唔開,啲家長 O 曬嘴嗰隻教師大罷工。

教師大罷工,啲教師唔應該去佔領區,而係喺學校門口,阻止「工賊」上班,邊個係工賊?相對於教協呢個咁正義嘅教師工會,教聯會嘅會員就好大機會喺你地罷工嘅時候走去補位,去返工,呢啲就係工賊!工賊!工賊!身為真左派,真係無幾可打下呢啲字,打打下都好興奮!

 

我真係支持教協搞教師大罷工,真心支持全港中小學運作唔到。唔好話我齋鬧飯民,唔該。

 

(hater 態度復活:屌,睇撚死你啦教協,扮乜姐你地,你啲會員咁有guts 咩?阻止工賊呀,打交架,陣間又話打交教壞學生,算數啦好無呀。)

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195306
Date: 2019-06-13 03:09:42
Generated at: 2020-02-17 04:21:26
Permalink: https://www.vjmedia.com.hk/articles/2019/06/13/195306/【輔仁罕有支持泛民行動】技術上,最容易做又可