尋日去完示威怕清算？麻煩立刻睇呢篇文

（圖：讀者匿名提供）

如果你：
1）尋日被check過身份證
2）69當晚被圍捕過，尋日又有去
3）俾過個人資料警方
4）企過係前線同cam前面

恭喜你，香港警察已經準備告你參與暴動，由林鄭宣佈尋日係暴動開始，清算一定會出現。而呢個清算絕對唔會隔好耐，一日都算好仁慈，警察係可以先拉左你再搵料告你。根據2016年嘅經驗，你仲有大約半日時間Get Ready.

首先，你要做好心理預期。唔好以為有律師、屋企有咩可憐身世、尋日有口罩就會走得甩。Sorry, 你睇下梁天琦、容偉業同其實一大堆戴住口罩嘅人，一樣係照入罪，無幸運可言。你唯一可以做嘅，就係減少自己中招後害到人，麻煩清空電話／電腦，適當地處置會令你入罪嘅物件。唔會幫到好多，但總有啲用。跟住，你要搵最信得過嘅人幫你。

然後，你會被人拉。九成九要搜屋，死都要等埋搜查令，你最信得過嘅人就有3個鐘左右幫你Double Check。而你會去到警署渡過你人生最長的48小時。老規矩，口供要講「我無野講」，exactly呢四個字，係呢48小時，你會極痛苦，無得訓，無得去廁所，無飯好食，雙手會鎖住，你嘅意志力會被動搖。但永遠都要記得「我無野講」。然後你會上到法庭，因為有人逃走過，請你預計而家嘅情況好大機會無得保釋。

亦即係話，你點都會白坐半年（or以上），麻煩你準備好唔好崩潰，呢個唔係FF，有無聽過蠔涌案？直接還押你，無情講。唯一俾到你嘅安慰係，如果你真係白坐，政府會用500蚊一日咁計去補償你。

以上嘅野，全部係2016年出現過，你唯一可以預備就係自己嘅意志力同精神。之後所有野，坐半年定坐三年，其實你都無能為力。上次暴動案都有人打得甩，我希望今次你會係打得甩果個。

呢個係白色恐怖嘅時代，係血淋淋嘅現實，請你預備好。機會永遠係俾有準備嘅人。

作者：肥仔甲

除左肥，無可奉告

閱讀後覺得好，請多多讚好及分享～：）