給香港警察的勸降書

 

長話短說,這段文字是要向你班警察勸降的。如果你地放低裝備,恢復少少理智嘅時候,睇下呢個世界發生緊咩事,你會發現成件事入面處境最危險嗰班人,除左示威者就係你地。可能你地一早已經習慣左眾叛親離,而且覺得係佢地有問題,我走我路,但今時今日,你地應該要判斷一下自己當前嘅情況。

當政府高官聲言佢地無權決策你地嘅行動,已經顯示出可能成為棄子嘅先兆。當前所有鎮壓行動嘅責任都放喺警務署署長身上,然後佢地其實慢慢將責任推向現場指揮官,而指揮官又表示警員—即係你地係根據訓練做現場判斷。

睇唔睇到個問題,宜家除左所謂員佐級咩會出信支持下你地之外,基本上已經無其他人為你地背書。坊間可能仲有啲三姑六婆阿叔盲毛幫下口,但同過往幾年由官員、議員、政黨、甚至中國政府嘅支持係有極大分別。你地隨時成為棄子。

成為棄子係點?就會變成下至香港社會,上至世界各國對你地嘅行為進行全方位嘅審判同懲罰。你地都心知肚明,喺成個鎮壓過程入面,你地每一個人到底做左幾多超過警例嘅事,幾多過分暴力,幾多犯法嘅事,而呢啲事或多或少畀人拍攝左落嚟。全部都係證據,政府一退,你地就要全部都承擔返所有罪責,全部都要還。

我想做嘅勸降係咩?因為喺一啲人嘅口中,都仲會聽到有唔少警員良心未泯滅,你地會掙扎,會懷疑,會痛苦,但仍然要同同袍一齊執行任務,要用難以接受嘅暴力同手段去對付一班年輕人。

我勸降,係想你地辭職,唔係你自己一個辭,去搵一啲同你一樣掙扎嘅人一齊辭職,出嚟做污點證人,指出警方今次嘅罪行。你地都可能上網見到,有警員辭職而得到全香港歡迎,有警察飯堂經理賠人工都要即走,受到全香港嘅掌聲。你地都可以。

當政府讓步,國際都準備行動,你地再精良嘅武器都唔能夠幫到你地半分。唯有喺呢個時間,同你地仍然有良心嘅同袍一齊辭職,做成聲勢,企喺人民嘅一方,未來嘅你地,反而有機會返到警察嘅崗位,去真正保護香港。如果唔係,當你地一個一個上到法庭,甚至國際法庭,恨錯難返。

你地一日唔辭職,我地都唔會去體諒你地嘅心情,因為你地只能夠係工具,去傷害我地啲同伴。唯有聯同一大班警察集體辭職,向市民講出警方嘅罪行,你地先可以重拾人民對你地嘅信任,你地先可以重拾人性。現實去講,宜家辭職,面對未來嘅審判係會有著數。

 

作者:木人里

一個心地善良既仆街。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195420
Date: 2019-06-15 14:40:13
Generated at: 2020-10-31 18:10:47
Permalink: https://www.vjmedia.com.hk/articles/2019/06/15/195420/給香港警察的勸降書