呢兩個星期日行出來,同埋星期三參與「暴動」嘅人,你地將會令林鄭步曾蔭權後塵,卸任後被中共瘋狂清算。

 

 

引渡疑犯,重唔重要?而家法例唔包引渡返去中國大陸,但係咪真係咁緊要?

呢個係咪咁緊要,係相對性的,即係為左完成呢樣立法,值得付出幾多成本。

而家林鄭搞一樣咁嘅立法都搞到咁,簡直垃圾。

 

而家中共一定好憎林鄭,佢好成功咁做左一樣威脅到政權穩定嘅柒事,都唔知係咪同趙紫陽喺戈爾巴喬夫面前拋小平同志出來一樣,有心定無意。

林鄭對住個鏡頭講,百幾萬遊行,好平常,直至有人衝擊,咁就要縮喇。

下?我睇左啲乜嘢?

 

 

中共維持穩定係靠所謂民主集中制,即係中共先係代表群眾,先係代表人民,體制外嘅「群眾」聚集從而衝擊到政權,係叫做人民公敵,係動亂。

如果大家記憶力OK,應該記得梁振英當年都無屈服架,雨傘嗰陣就算大家喺條街訓79日,佢係等啲人疲憊,就武力清場,絕對唔容許政權受到體制外嘅群眾運動所動搖。

林鄭而家,係先向和平示威企硬,然後向動亂屈服,對中共來講係非常咁錯嘅一件事,當年八九民運,中共係寧願殺學生都要維持呢個民主集中制嘅管治威信,絕對唔容許體制外糾眾衝擊政權,呢個唔容許,係凌駕所有野,包括人命,包括黨內不同聲音。

 

林鄭而家向全中國做左一個示範,就係,你暴動,個政府係會屈服,咁即係新疆可以暴動,湖南可以暴動,甚至上海都可以暴動,個政權係有機會俾位你上,事實係咪咁先?事實係喺大陸,你做少少嘢威脅到個政權,都會好麻煩。

葉劉講得好啱,立唔到法,打擊政府威信,係大鑊過夾硬立到,而家咁樣唔立法,葉劉話係遺憾,林鄭俾麻煩香港人,係要道歉。葉劉再一次話俾爺爺知,邊個先係識跟中央路線。

 

俾麻煩中央嘅人,係唔可能就咁拍下patpat 走左去,就算係趙紫陽,喺1989年5月17日開完中央政治局會議,基本上已經失勢,佢都要做埋最後嗰段日子,然後軟禁到死為止。

中共上下咁辛苦,做咁多野,維持政權穩定,林鄭一個唔該,就609 100萬遊行,612衝擊,然後政府屈服,暫緩立法,但仍然疏導唔到民情,616 200萬遊行,黨中央而家一定憎死佢。

而家就話傳言韓正喺深圳觀察事態發展,究竟只係靠香港官員搞唔搞得掂,幾時先搞得掂?定係其實全世界包括括建制派反對派都想中央撤換林鄭然後漁人得利?呢啲都係重頭戲碼。

無論點,暫時有11個人喺之前嘅衝突之中被捕,佢哋會唔會不被起訴?呢個就係我最關心嘅事。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195479
Date: 2019-06-16 19:30:57
Generated at: 2019-10-19 04:16:01
Permalink: https://www.vjmedia.com.hk/articles/2019/06/16/195479/呢兩個星期日行出來,同埋星期三參與「暴動」嘅