【毋忘六四】喺國際社會羞辱中國共產黨有無用?

 

 

八九民運中國共產黨對時勢研判嘅轉捩點,係戈爾巴喬夫訪華,學生為左利用國際社會高度關注中國嘅時刻,發起絕食,用自殘去令事件「升級」,而且趙紫陽唔知係有意定無意,喺國際鏡頭面前拋出「最重要的問題要由小平同志做決定」,中共顏面掃地。

426社論發表之後,包括李鵬在內嘅所有中共高層都統一口徑,「動亂」一說只係針對極小部分人士,而非針對廣大同學,之後嘅十幾日「佔領天安門」都係喺平淡之中進行,而成果方面,當時趙紫陽已經將悼念胡耀邦遊行起,參與運動嘅學生訴求,都帶入中共中央政治局,即係統治中國嘅真正最核心權力機構(簡稱黨中央)。

和平集會本來有成果,可惜當時嘅集會學生都唔當呢啲係任何野。

然後就係513決定絕食,515趙紫陽拋個波俾鄧小平,520中共宣佈戒嚴,64鎮壓。

 

就算係宣佈戒嚴前後,國際上無曬面嘅中共,包括被人鬧到落地獄嘅鄧小平同埋李鵬,至少姿態上,並未放棄不殺一個學生去解散呢場運動。

但係將社會矛盾置於國際輿論,從而逼迫中共喺政治制度上作出大幅度調整,呢樣嘢已經令中共將「解散集會」放到去高於一切,去到不擇手段。

戒嚴之後嘅十幾日,中共做左好多野,包括調動軍隊,包括去唔同省市「打招呼」,包括評估唔同領導人是否支持中央,做一切一切,都係為左可能出現嘅鎮壓,點樣可以鎮壓之後最迅速令社會安定下來。

64鎮壓之後,好多人以為,強硬派喺權鬥上贏左溫和派,咁應該上場?小平同志就覺得,江澤民先係最聽話。

64鎮壓之後,好多人以為,中國要玩完了,中共反而係將所有學生訴求,都做出來。

64鎮壓之後,好多人以為,中國會倒退到文革咁,中共反而係堅持,喺經濟民生進行改革開放。

至於政治手腕,自從64鎮壓,就嚴密左好多了。

 

今次反送中,已經有流言話,點解學生咁急於升級,除左一鼓作氣再而衰三而竭呢個傳統智慧,就係要趕住喺G20 峰會,令國際社會可以有題目落習近平面。

今時今日,中共已經無可能再出動坦克車碌豬(馬力,2007)去鎮壓香港,但係要歷史話俾我知,故意落中共面,唔會對件事有幫助,亦唔好諗住佢會調轉做衰嘢。

而家中共已經俾左方向林鄭,唔好再搞埋曬啲社會動盪出來,香港人要專心搵錢。呢樣嘢,無論升唔升級,佢都係會做,亦唔會話你升完級就唔做。

做一啲無效果嘅嘢,如果個後果係,你被捕、受傷、甚至死,到呢一刻我諗我無咩可以講,如果是這樣,你不要悲哀,共和國的旗幟上有乜乜七七,仲有你付出的愛。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195703
Date: 2019-06-20 23:46:59
Generated at: 2020-02-17 03:45:30
Permalink: https://www.vjmedia.com.hk/articles/2019/06/20/195703/【毋忘六四】喺國際社會羞辱中國共產黨有無用?