公司70後同事:「點解警察唔出水炮車掃走晒啲人?」

 

 

情境一

「你哋有無去反送中?」我問。

「呢啲嘢我唔係好清楚喎。」90後同事A說,然後另外兩個同事你眼望我眼一粒聲都唔敢出。

「Sorry,我唔知呢度唔問得呢啲嘢,當我無講過。」我說。

 

情境二

「你知唔知而家有好多人喺金鐘嗰度反送中?」我問,果日就係6月12號嘅上晝。

「我知,頭先睇FB見到啦,警察出咗水炮車未?」70後同事B問。

「好似未,但係晏啲唔知。」我說。

「超,點解警察唔出水炮車呀?一嘢掃走晒啲人好似掃垃圾咁咪得囉,阻Q住晒。」同事B說。

 

情境三

「你知唔知琴日警察暴力清場?」我問。

「知呀,有個DJ仲讀信讀到喊,勁誇張囉。」80後同事C說。

「你有無睇到啲片?」我問。

「有呀,其實兩邊都暴力囉,示威者又掟磚又霸路,警察又催淚彈又開槍,所以我兩邊都唔會幫,我中立。」同事C說。

 

以上嘅情境唔係我老作,係扮工室真實對話,而且絕對唔止咁少,只係我懶得寫晒出嚟,可能你會話我點解唔叫醒呢班「裝睡」或「真睡」嘅人,但係我想講我真係唔敢再同佢哋講嘢,因為我驚我會忍唔住用粗口好似機關槍咁掃爆佢哋,所以我唯有自己閃走或者沉默。我知每個人都有佢哋自己嘅睇法,我無得逼佢哋一定要認同我,就算係想說服佢哋其實都好難,為咗唔想有衝突,唯有由佢哋繼續做港豬。

我承認我都算係和理非,我唔敢衝,我驚死,但係一路以嚟我見到和平遊行真係好明顯無用,一百萬又好二百萬又好,政府根本唔驚你,第二日繼續二讀,唯有要做一啲影響到社會經濟嘅嘢先會有用,例如霸路,衝擊,三罷,不合作運動等等,我唔係想支持暴力,但係太和平成隻羊咁真係等比人食㗎咋!大家目標都好清晰我唔再多講,死線定咗今日五點,好明顯政府係唔會理,所以聽日要將行動升級,至於點樣升級我真係唔知,但聽日點都要出金鐘撐,我知大部分人都好迷惘,唔知點做好,因為我哋無咗leader,以前有嘅都比人拉咗,但係正正因為咁,我哋唔會咁易比人左右到,唔會因為民陣話七月一先出嚟聽日就唔出嚟返屋企大覺瞓!

我知我知,不捉鬼,不篤灰,勇武派同和平派各有各做,要團結,唔好嘈,老老實實,我知大家最近身心都好疲憊,我亦只係一個普通嘅打工仔,我唔會有咩戰略比大家,好簡單只係有一句想講,就係:「香港人,唔好死。」

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195719
Date: 2019-06-21 04:38:12
Generated at: 2020-02-19 20:48:53
Permalink: https://www.vjmedia.com.hk/articles/2019/06/21/195719/公司70後同事:「點解警察唔出水炮車掃走晒啲人?