【塔羅個案】拍拖點會淨係風花雪月咁簡單,政治敏感度其實都好關鍵

文教 / 最新文章綜覽

 

好耐無寫文。雖然我想用「我諗大家而家都未必有心情吃喝玩樂」作為文章前言,不過,諗諗下,呢度,香港黎嘅,又點會無「無懼世事變改」都依然享樂如舊嘅人呢?哈哈。

好多朋友,無論男女,都會定期上黎搵我開牌,檢視下自己工作或感情狀況。我經常笑言,大家唔係我嘅「Client」而係「Patient」;黎搵我唔係「開牌」而係「覆診」。

今日,講下感情牌。

「我同呢個人夾唔夾?」係我經常遇到嘅問題。夾唔夾,你可能會覺得「相處耐啲咪知囉」,但係,人永遠當局者迷,有啲人怕受傷害,有啲人已經好攰,所以唔想再隨便發力,隨便交心,所以,佢地黎到我舖頭。

當然,會有啲女仔問得好直,例如「佢生活會唔會照顧到我?」或者「如果同佢發展我需唔需要捱?」,對於呢啲問題,我無咩感覺,或者,已經見慣不怪。面對呢種客人,你要講物質,我就同你以物質黎做問題重點。

但係,如果對方講求心靈溝通、精神層面嘅話,我通常,會講多少少野。

有兩位客人,一男一女,年紀分別為三十多,以及二十出頭。佢地喺同一時期與各自嘅對象開始拍拖,而又咁啱得咁橋,佢地兩位黎問另一半「夾唔夾」之類嘅問題時,我都講左同一樣野。

「你地興趣相近,對方平易近人,無咩居心。不過,談論到某啲對未來嘅想法、或者一啲關鍵議題時,你會發現大家價值觀其實唔太相似。」

咁當然,通常我咁講,啲人都係會「去馬試左先啦,有事發生先睇下點」,好正常的,你認為眼前有一段大好姻緣,點會我呢啲外人講兩句就馬上動搖。我無所謂呀,歡迎覆診(喂)

黎到最近,香港,烽煙四起,無論係言語上,文壇上,抑或夏愨道上。

我那位男性客人,那天走上街頭,全身盡量做好保護,在煙霧中,在中信大廈外面,接到來自女友的短訊。

「Still there? So no movie today? Wanna see 阿拉丁」
男士一道無名火起,「Don’t you see the news?」
「Yes of coz. PP should have good business now haha」

然後,當晚,他和女朋友分手了。

而我那位女性客人,自小氣管有問題,自知走得太前,會成為負累,所以只是兩度上街,白衣,黑衣,攜著一束鮮花。

她是與大學莊友出去的,當時與男朋友交往約半年左右,偶有爭吵,但尚算和諧。

然後,那天,擠在灣仔,她接到男友的短訊。

「Hey how’s the parade? Having fun?」
女士瞪大了雙眼,「Parade?Have Fun?」
「Why being mad at me? What so big deal?」

女士有啲嬲,識左九個月、拍拖半年,佢第一次覺得男朋友原來係咁陌生。

佢地有無分手,我就唔清楚,不過呢位客人黎緊出 Trip,佢已經約左返到香港會再黎搵我。

大事件,小故事,例子眾多。我是自私的,老實說客人是否和誰誰誰繼續拍拖,我不會在意,那是他們的人生;我在意的,是烽煙,還會繼續四起,萬事還請步步為營。

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195721
Date: 2019-06-21 04:50:20
Generated at: 2020-02-21 23:38:46
Permalink: https://www.vjmedia.com.hk/articles/2019/06/21/195721/【塔羅個案】拍拖點會淨係風花雪月咁簡單,政治