撤法、放人、查差佬，然後呢？

「反送中」運動由百萬遊行至今已經20日，毋容置疑，香港人呢一次反抗已經令世界眼前一亮，而且，即使係唔同嘅政團，都唔會反對香港人嘅3大核心訴求：撤法、放人、查差佬；可以話，自香港開埠以嚟，香港人從來未咁團結過。

然而，我哋嘅3大核心訴求，即使再加埋冇咩用嘅第4點「林鄭落台」，完全成功，帶嚟嘅結果都係將香港嘅形勢時光倒流返去6月8日之前，我哋要面對嘅問題仲有好多，而且只要下一個特首可以有更厚嘅面皮，或者係更精妙嘅立法技巧，「送中條例」遲早都會以其他面貌出現，所以除非達成更多有意義嘅訴求，否則勝利只屬表面，內涵都只係 White Peace，最終並無意義。

因此，我哋亦係時候要思考下一步：第4項核心訴求係咩嘢？第5項？第6項？最終目標係咩？

最終目標，屬不可說一類，講明本文唔提先，因為無法令對方接受嘅條件，開出嚟都冇咩用。至於中間嘅部分，如果唔想睇我慢慢論證，不妨直接睇下文末嘅路線圖。

我認為，第4項可以考慮嘅核心訴求，應該要針對立法會選舉。即使大家對於香港所有政黨都冇咩好感，但立法會的確係現時體制內對行政機關嘅最大制衡。今日發生咁多事，同立法會議員喺2016年被非法剝奪議席不無關係，所以首先要對付嘅就係消除所有對選舉同議席嘅不必要干擾。因此，第4項訴求應該要係：

4. 選管會與立法會秘書處限權

非法剝奪議席嘅問題，除咗係嚟自立法會秘書處越權之外，選舉管理委員會越權政治審查參選人，亦係非法剝奪議席嘅先聲。現時立法會秘書處越權已經變成有人大背書，成為合法行為，所以依家要做嘅就係全面限制立法會秘書處嘅權力，要求立法會秘書處上下，包括秘書長至門口個保安，都必須服從所有已刊憲確定為立法會議員人士嘅命令。另外，選舉管理委員會權力亦必須限制，確定其只可以有「文件收發」嘅功能，只要申請表同錢交齊都唔可以再拒絕任何人參選。

不過，咁樣都只係將政治形勢再撥返去2016年之前，香港嘅問題依然存在，只要一日立法會未普選、執政員未普選，佢哋都唔需要對香港人負責，有問題嘅施政只會一浪接一浪，最後逼人上街，製造動蕩。所以，即使係返到去2016年之前，香港嘅亂象依然會持續，建制派、民主派、本土派三分拉鋸，最後建制派一使橫手又引爆民意，結果都係令社會陷入「抗爭狀態」。唔好唔記得，「佔中」係2014年嘅事。

咁要根絕呢個問題，之後我哋要有第5點同第6點訴求，觸及嘅部分就係香港政制：

5. 功能界別改為「十八區香港市民」

6. 政務司制度改革

可能你睇到呢度會問：功能界別咁改，同立法會普選有咩分別？咁我都可以直接咁答你：冇。但當大家未有心理準備本護照封面改成阿群帶路圖之前，一切都要按照《基本法》同人大決定辦事：既然未有特首普選之前唔可以消滅功能界別、唔可以普選立法會，而特首普選又要合乎「831決定」，咁我哋不如就唔好爭取消滅功能界別，反而令功能界別變成都係普選產生咁。反正我哋唔係冇試過不分區議席（超級區議會），咁可以思考下將全數功能界別議席改成超區咁。

例如話「由於行業眾多，難以分別非專業人士，因此只能分區選舉功能界別代表議員」，然後將全立法會議席改為72個，功能界別改為18組，每組2個議席，18個選區等同18區。另外36個就係分區直選。如果咁都仲係建制派拎住功能界別大部分議席，咁民主派同本土派就抵撚死啦。

至於政務司制度改革，最主要目的就係令香港施政全部由政務司負責。政務司長同財政司長改為由立法會議員互選產生，而且可以兼任議員。律政司同所有政策局、專員都要由政務司長提名畀特首，再由特首提名畀中央任命。咁特首做咩呢？佢負責簽法案同對外代表香港，咁樣嘅話特首點產生其實就冇所謂囉。怕會違反《基本法》？成本嘢只係提過司長要由特首提名畀中央任命，同埋司長要係中國公民，所以以上嘅提議，直至現時為止都係喺《基本法》框架之下可以做嘅改動。

當然，以上都只係一啲諗法，不過如果行得到第6項訴求，其實離最終目標已經唔係遠，即使唔再繼續行落去，都足夠保障香港嘅高度自治係國際認可嘅──至少係美國認可先。而且如果行之有效，話唔定仲可以用嚟建設民主中國添！

再重申一次，我認為喺達成3項核心訴求之後，可以依次提多3項訴求，視形勢逐步加碼：

4. 選管會與立法會秘書處限權：選管會不得判斷參選文件內容；立法會秘書處須服從所有議員
5. 功能界別改為「十八區香港市民」：完善功能界別全民代表性
6. 政務司制度改革：政務司總領香港行政，特首保留香港代表地位

香港加油。

作者：薰華

塵世中一件無名廢青，除咗偏見同口水就冇嘢多。

閱讀後覺得好，請多多讚好及分享～：）