有希望係好事,但唔一定完全係好事——《上流寄生族》令我思考到的

 

首先,呢篇唔可以叫做影評,佢只係一啲我因為部戲,加上今日跳樓輕生少女嘅事而思考到嘅嘢。

其次,呢篇嘢有嚴重劇透,如果未睇嘅但又想睇嘅人千祈唔好睇。因為睇完你都唔明,但到你入場個陣就會發現我將最重要嘅講哂出黎。所以,逃生門在此!

我相信好多人睇完《上流寄生族》都久久未能平伏,因為結局看似有希望,但若果嗒真的話會感覺好悲涼。再加上今日發生少女跳樓自殺身亡,留低反送中嘅留言,令我更加去思考究竟一個人有希望嘅話係咪就唔會做傻事;反之,如果個希望僅只係希望,達成嘅路係千萬里咁遠,會唔會更加令人絕望,更加令人窒息?

《上流寄生族》嘅結尾,男主角「閱讀」到爸爸畀佢嘅信,知道佢安好咁喺豪宅地下室生存個陣。之後畫外音就係一封佢畀爸爸嘅回信,配合畫面見到男主角帶住媽媽返到豪宅,本身不見天日嘅爸爸可以光明正大由地下室行返出黎,製造一種佢已經成功嘅感覺。

然而,最後一個鏡頭就影到漫天風雪之下,男主角喺自己住嘅半地下室寫好呢封畀爸爸嘅信。男主角嘅表情相當複雜,好似有咗目標,但睇落又有啲茫然。如果認真諗落去,究竟呢封信要點樣送出本身已經係一個難題,更唔好講佢以後可以點樣做發奮圖強躋身上流,成為豪宅主人。可能每日只能不停FF,不斷為呢個所謂希望付出。咁樣嘅強裝勵志結尾,反而畀人嘅感覺更加絕望,更加令人窒息。

有希望唔一定係好事,希望唔一定支持到你生存落去,相反可能令你更加痛苦。

套戲令我諗得最耐嘅,其實係管家個老公點解可以喺豪宅地下室住四年。我問自己,四年,好似坐監咁喺一個不見天日嘅地方,出嚟食嘢都要偷偷摸摸,無日無之,點解唔選擇死左去呢?不過套戲最有趣嘅係佢非常享受喺地下室嘅生活,覺得自己就係屬於呢到。除咗唔使畀人追債外,更重要係佢可以同自己愛嘅人一齊,兩口子可以閒時可以喺地下室搞嘢,間唔中襯主人唔喺到仲可以當正豪宅係自己。真正令管家老公開始癲,就係因為管家失救而死,個陣嘅佢先係真正絕望,所以可以不顧一切殺人。

其實同樣嘅情況亦可以對落宋康昊飾演嘅爸爸身上。殺朴社長除咗因為佢嫌棄自己味道外,當佢見到自己個仔同埋個女都身受重傷,佢同樣感受到個種絕望。但最後,佢選擇咗喺地下室生存落去,亦係因為知道老婆同埋個仔仲喺到,所以令佢就算唔知個仔係咪會睇到封信,都要不斷每日送出去。

所以,我好想同個啲心底裡面諗緊要自殺嘅人,想你哋真係要做到呢一步個陣,諗下愛你同埋你愛嘅人。真正令人絕望嘅唔係環境,係失去咗自己最愛嘅人,失去咗最愛嘅你。

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 196386
Date: 2019-06-30 05:02:51
Generated at: 2021-05-16 00:33:55
Permalink: https://www.vjmedia.com.hk/articles/2019/06/30/196386/有希望係好事,但唔一定完全係好事-《上流寄