有邊份工唔辛苦呢?

 

仲記得幾年前 7 警案,法官講過:「They are well paid for it!」除非你係腦細,或者係二世棗,如果唔係你都只係打份工,而打份工代表咩呀?姐係你付出你嘅時間,然後有人出糧俾你駛,亦姐係代表咩呀?就係唔好講咩理想、夢想,因為你都只係打份工逗份糧,上頭話做咩你就要做咩。自由度大啲嘅,你咪可以提出下建議,如果腦細 Buy 嘅話咪可以嘗試下去做;如果腦細唔 Buy 嘅,咪建議接受,態度照舊。而作為打工仔嘅你,可以點?你只可以選擇 Go or Not to go。現實生活中,有邊份工係唔辛苦?無!小編可以斬釘截鐵同你講,哩個世界係唔會有份工唔辛苦,最低限度喺香港唔存在。

點解小編突然咁感慨呢,除咗係因為最近一、兩個禮拜發生嘅事之外,仲因為公司有個同事,佢有一日突然失驚無神企喺小編面前,好大聲咁話:「HR!我要投訴呀!」Um……其實投訴真係無咩問題嘅,但最好唔好喺大庭廣眾下咁大聲公開講,好多人喺公司等食花生,佢哋會突然留意你講啲咩。咁你都唔想全公司都知你投訴邊個同事。

小編搵咗間會議室,俾個同事盡訴心中情。

一齊黎聽下個同事有咩投訴:「我要投訴我上司,佢搞到我好忙,一樣 Job 接一樣 Job 咁彈埋黎,搞到我成朝都無乜抖過,要等到食 Lunch 先有得抖……」

其實小編真係無乜實質野可以幫到個同事,唯有聽佢訴下苦,安慰下佢。與此同時,亦係因為咁,小編忍唔住咁諗,有邊份工唔係咁,除非正如一開始咁講,你係腦細或者最大粒嗰個,咁你就可以負責派 Job,又或者你真係十分之好彩,喺一間無乜 Job 做嘅公司(欸?咁點解間公司仲未執粒?),否則上司哩種生物嘅存在,本身就係負責製造工作,所以你又唔可以話你上司唔岩,只可能係大家夾唔到。

個同事暫時唯一可以做嘅就係同佢上司傾下,睇下有咩地方可以改善。有時啲野唯有靠自己,就算小編將件事上報,相信小編嘅上司都做唔到啲咩,最多都係記錄在案,同埋以 HR 嘅角度去同佢上司斟斟,畢竟都係其他 Department 嘅事,唔可以介入得太深,而且小編個上司同同事個上司,大家一樣咁高咁大,憑咩去 Challenge 人,同埋亦都無謂又辣著一個火頭。又或者……小編上司根本唔覺得有問題添。

老實講,雖然小編成日都 Hea 底,但其實小編都好多野做,連抖啖氣嘅時間都無。不過都仲未有勇氣同腦細講……

唉,共勉之!

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 196523
Date: 2019-07-04 05:03:04
Generated at: 2020-02-17 02:38:41
Permalink: https://www.vjmedia.com.hk/articles/2019/07/04/196523/有邊份工唔辛苦呢?