一入到酒店房,見到咁多「人」開Party,點算. . .

 

 

小白好耐無寫神怪野,由細到大經歷咁拿多,其實都已經好無感覺架啦。但係前幾日小白出差,間酒店房比到初戀…丫唔係,係初見鬼嘅震撼感比我!

話說小白出差通常都好忙,一落機都係做做做,夜晚先會到酒店Check in休息。個日差唔多11點先到酒店,通常呢啲情況,都係會派到最閪啲房,因為乜都派哂。可能加埋小白嘅特殊體質(?),真係鑊鑊新鮮鑊鑊金。

好啦講返今次先,搞完啲手續上房,插卡開門。

嘩!

我真係嘩左出聲。

痴撚線架喎,一開門見到無數咁多「人」係入面,多到一個點!個數量係多到,好似放工時間嘅地鐵車廂,仲要突然間走火警人逼人個野咁多人,全部人都係目無表情嘅白色光頭男人。你明唔明一開門個野,有堆人就黎逼到湧哂出黎但係又湧唔到個種震撼。

每個有特殊視力嘅人,睇到嘅野係有機會唔一樣,因為見到嘅畫面其實係一個訊號,例如個空間殘留嘅係「憤怒」,有啲人見到黑影,有啲人可能會見到火光,有嘅人見到紅色,有啲人會好清晰見到個女人係到。而小白同我另兩位友人就好不幸地(?),通常係最後個一款,長期都係睇緊恐怖片嘅狀態。

但點解會係白色光頭男人?我點撚知。

 

言歸正傳,咁其實佢地目無表情,就唔係好惡嘅,惡鬼小白通常都係會被狗衝,即刻衝埋黎撞到我勁暈,但呢堆人就無。

見慣大場面,其實我就好少慄嘅,但係今次大軍壓境咁款,點都會有少少淆… 小白以前出差都會帶好多「架撐」黎應付,但因為好耐無試過咁大單,所以今·次·無·拎·野!出門口之前順手拎左串梵諦岡買嘅黑色Rosary咁羅。

我開左房門,思索左十秒,就係袋拎左條Rosary 出黎戴係頸,之後就好拿勇咁行入去。

通常呢啲情況,咁樣兜口兜面行埋去食咁多陰氣,一係會作嘔作悶,一係就會賴野「發陰燒」(即係成個人體感發燒燒到200度咁款,但探熱係乜事都無)。不過戴左條Rosary就好似做左防水噴噴咁,無影響到小白羅,不過個感覺都幾拿核突,因為行穿過左一堆半透明男人。

原本小白就係啲無乜事都唔拿理照訓嘅人,有一次我訓緊覺感覺到有「人」攬住我,我都係求其fing開佢少少由佢訓隔離,自己繼續訓。但今次場面就有少少誇張,所以就播下經文歌又跟住念下咁,又唱下聖詩,總之啲工具work就得架啦,我唔會理佢耶教佛教定印度教,正如屋企有勁多曱甴,有殺蟲水就噴架啦,仲邊到得閒理佢破壞臭氧層呢。經過多年實測,比較有用嘅經文歌包括:印度教嘅Brahma Nandam、佛教嘅準提咒、耶教嘅各類Gregorian Chant 都係極之有效,總括黎講就係簡單粗暴地係房中間放閃光彈,一野炸落去就驅散左九成。(錯誤示範,其實應該幫佢地超渡架…)

不過之後都唔知算唔算仲衰,炸爆佢地個野,有啲炸爛左,變成一pat黑色嘅肉醬咁號嘅野痴左係啲牆到,有4-5笪左右啦。其實咁樣搞一搞都成十二點,小白仲有Powerpoint未做完,所以就無拿理佢地啦,佢地就好似鼻涕蟲咁郁郁下,是旦啦當有鹽蛇曱甴咪算,最緊要唔好搞住我。

就係咁,小白做完野,沖個涼,就同五笪黑鼻涕一齊訓覺。

 

第朝小白就輕微感冒了… (錯誤示範)其實訓之前送埋個啲出房就無事嘅,不過小白成日都自己羅黎賤。

不過,佢地第二晚又黎料,不過少啲人啦,30-40個人左右啦。小白吸取左第一晚嘅教訓,第二晚都係搞埋先訓,仲好乖咁研究下究竟乜料呢日日都聚哂係到開party。

原來我間房正對面係一個球場,有一大排超勁射燈,個角度差不多照到我間房個窗正一正,就算人望落去都係嚴重光害,甚至而家直頭係「光煞」,一大條光之天梯咁送哂啲孤魂野鬼入房(屌)。

不過都解釋返,靈體其實都係走向光嘅,因為佢地嘅世界黑憫憫,只會見到強烈嘅光,而有由其是有陰陽眼嘅人,喺靈體世界其實亦會視作強光,所以點解鬼成日狗衝向人,好大部份原因其實佢地係想搵出口咋。

第三晚,星期六晚無波打,球場無開燈,無鬼,完。

仲有一鑊小白係米蘭轉內陸機大Delay,被逼住機場酒店,好死唔死得我一個華人,前台閪口閪面擺明種族歧視,但係又將小白由普通房Upgrade到行政套房,一入房拉開個床頭柜有四本聖經…究竟有咩情況係一間房入面要有四本聖經呢???大家自行判斷啦~

就係咁,小白平淡嘅出差生活結束啦,下次見。

 

後記:

——不過好可惜Sing Hallelujah to the Lord 係不在淨化用途之列… 呢首pop song 黎。有興趣大家可以Wiki 下Gregorian Chant 音樂結構上有乜分別,同其他宗教嘅Chant 點解模式上會咁類似,點解會由9世紀一直流傳到而家係有原因,大家自己分析下。

——佛教嘅大悲咒,唔係話唔work,係過份work。我仲記得聽班念經念左好多年嘅太太講,有一次去佛光山修行,佢地夜晚十點鍾一大班人係寺入面念大悲咒,之後巨量怨靈就狗衝入黎,有啲師姐太勤力,唔知原來自己念幾十年開左眼,見到咁嘅場面嚇到WeWa鬼叫…大家記得夜晚唔好半夜三間先黎念大悲咒、往生咒呢類超渡文,朝早先慢慢念啦。

——講多少少關於經文嘅野,好多時經文都要念返原文原語言,例如梵文、希伯來文、拉丁文等等,唔係崇洋問題,古文好鍾意玩嘅係一字多義,現代語文係無辦法寫得返出黎,係翻譯過程當中有好多意思其實完全掉失。以心經最後一句爲例,Ga-te Ga-te如果翻譯成「去吧!去吧!」係完全錯譯,將「超越」「超渡」「覺悟」「離苦」呢啲意思全部沒殺左,所以經文原文都保留返「揭諦揭諦」原文音譯。基本上所有經文都有呢種情況,建議大家真係有心了解宗教,都學習睇下原文(小白實測良心建議)。

 

戴定巨型頭盔先:此文章內容實屬虛構,如有雷同,就真係好巧合。不代表任何宗教立場,作者表示對所有宗教信仰極爲尊重。

 

作者:小白

擁有超凡視力的人,低調解說平行空間。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 196584
Date: 2019-07-05 05:10:53
Generated at: 2020-10-30 07:32:16
Permalink: https://www.vjmedia.com.hk/articles/2019/07/05/196584/一入到酒店房,見到咁多「人」開party,點算