革命就係請客食飯。

 

有好一段時間,某糖成日講呢句說話。如果,你唔識身邊嘅嗰個人,你好難真心信任佢,交個背脊俾佢。唔講到呢步,呢個世界有樣嘢叫默契,唔使出聲、乃至一個眼神都唔使,你就會基於經驗與假設,以己度人咁樣猜測對方嘅行為,繼而作出(if true情況下嘅)合適反應、採取恰當嘅行動。

如果好似某糖咁樣自摺自閉,哪怕唔係好似某糖咁樣表達自己方面做得唔係好夠、無足夠嘅能力去做得夠表達自己呢件事都好,就算你幾咁有真知灼見,唔講就無人知、唔解釋就無人知你點諗。

成王敗寇嘅世界入面,革命一定係成功嘅,失敗嗰啲叫暴亂。革命嘅過程或者浪漫,但革命呢種事,無可避免破壞日常生活嘅安穩;捨棄安穩、投身動蕩,據說目的都係尋求自己想要嘅安穩,就算原因係幾咁之負面,係幾咁之唔中意依家嘅日常都好,追求理想生活嘅終極目標始終如一。

無一條必然成功嘅方程式,但係有好多嘢可以做、令件事容易少少進行,有大啲啲機會得到一個好結果。某糖會覺得,請客食飯會係一個好方法。同唔同嘅人有多啲嘅接觸,就算知道最後難免一戰、必定反面,都會互相理解得到此時此刻有一個共同目標,大家只係對方嘅次要敵人,可以暫時停戰,直至主要敵人被消滅之後再算。

而更重要嘅係,隨住接觸自會發現同呢個次要敵人,處於咩嘅關係,究竟係你死我亡不容妥協嘅敵我矛盾,定係有事可以慢慢傾,可以有制度支援「有時限嘅合法獨裁」,用一個大家都唔滿意但都可以接受嘅方式商量嘅人民內部矛盾呢?

進有時、退有時;戰有時、和有時。當需要最大公因數時微積分割席,無異於飲鴆止渴、腦袋入水。或者會有一時嘅浪漫,但終歸難免隨住失敗,而變得毫無意義。

成功嘅係革命,失敗嘅係暴動。

咁你話喇,革命係唔係就係請客食飯?

 

作者:砂糖雪(☆しゅがぁ雪♡)

砂糖雪(☆しゅがぁ雪♡)
汀瀅冰中結,砂糖雪裏埋。單純愛美愛腐愛幻想,自知殘存在凡塵俗世,沉溺虛構神話裏、迷途弱蟲迷宮中,困於弱水三千內顛倒夢想 - 神無月的凝視下,葬下零落的白色花瓣、綻放璀璨的戀色花火 - 明知是夢想,依然惜夢。FB :佐藤 栞

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 196735
Date: 2019-07-08 23:40:34
Generated at: 2019-10-16 19:05:04
Permalink: https://www.vjmedia.com.hk/articles/2019/07/08/196735/革命就係請客食飯。