劏房異聞錄——凶宅之鹹魚飄香

 

 

注:真人真事改編, 以下內容可能令人情緒不安,相信鬼神之說嘅讀者可能需要佛祖陪同收看。

 

睇啲動畫漫畫戰爭片成日都見到啲人話屍臭味幾咁特別,都係得個睇字,果陣味只能憑像。

直到隔離房死咗人。

劏房環境有幾焗,我諗大部份香港人都有所耳聞。廿幾歲仔,第一次咁近距離聞到屍臭味。原來真係畢生難忘。

果日係兩百萬人遊行之後嘅星期一。當晚收工返歸,喺樓下見到架警車,無為意。點知上到樓,見到大門口打開咗,裡面有幾條差佬。見到差佬當然避之則吉。由於果棟大廈有一樓一,經常都有嫖客周圍轉,裝下裝下咁,搵啱心水嘅「舖頭」。於是我即刻扮到好似啲嫖客咁離遠裝下裝下,跟住就調頭,落返樓下等啲差佬走。

落到樓下我先發現,原來部警車隔離仲停咗部全黃色嘅車。我形住有啲古怪,印象中係黑箱車,但因為好少見,上網search下,發現真係嚟。

呢個時候我都覺得唔對路,唔通我住果間劏房有命案發生?入屋搶劫殺人?正路係搶劫都唔會揀擺明窮到一個崩都無嘅劏房掛?

我喺對面街離遠mon住,等架警車同黑箱車走咗,就過去上樓。呢個時候我都已經有心經準備入面可能會有血漬呀好混亂呀咁。

一入大門口,就聞到陣怪味。我忍住呼吸,行埋去自己房門口。

房門口對外半步有幾大舊紙巾,仲有條濕咗嘅長褲撻咗喺到,係墨綠色長褲。之前出出入入見過幾次隔離房租客,我認得條褲係佢嘅,原本條褲有少少陸軍迷彩咁,不過因為濕咗所以望落就好似一片墨綠咁。

間劏房嘅走廊係L字形 ,我住果間房喺走廊盡頭嘅轉角位,同隔離房痴住,兩個門口成九十度角,相隔一個身位左右。換句話講,佢門口即係我門口。

而隔離房嘅再隔離房,門柄掛住兩張白紙,門鎖位附近有啲刮花咗。我硬住頭皮哄埋去睇:

一張係警方出嘅,大約係話「呢次警方行動入過你間房,但係係必須嘅,請見諒」之類;

另一張,就淨係寫住「致X號房租客,有急事找你,請即致電租務部xxxx xxxx。」

屌,乜撚野事?邊間房出事?定係話再隔離房係疑犯,比差佬爆門入去捉佢?

我忍唔住呼吸,輕輕咁吸咗一口氣。

陣味係點架呢?老實講,果陣味聞第一啖有啲似爆屎渠……所以聞完反而會半信半疑。當你按捺唔住好奇心想聞多啖確認下果時,第二啖你會發覺氣味中隱約帶有酸臭,好似食物腐爛果種 — — — 「喂乜屎味係咁架咩?」。隨即你就會發現有攻鼻嘅感覺,直情係鼻腔隱隱作痛果隻 — — — 喂屌無論係屎味定係食物腐爛都唔會攻鼻架喎屌你!

即刻寒毛直豎,走入自己房bang埋房門。

雖然我唔信邪,但真係幾大衝擊,當晚都唔係訓得幾好。

好彩閂埋門窗開著冷氣就聞唔到有味。冷靜落嚟組織下,應該係隔離房有屍體,但消防嚟到爆錯咗再隔離房,所以差佬留低字條。而條褲應該係執屍隊抬走佢果時跌咗。至於點解條褲係比咩整濕嘅,well……

根據租務部交代,死者有個女,佢聯絡唔到老豆,跟住報警,發現條屍已經攤咗喺到幾日。我諗諗下,平時夜晚11、2點會聽到佢沖涼果時啲水流經條水管嘅咚咚聲,果排又好似真係無咗聲。我唔清楚來龍去脈,不過斷估都係家庭問題令個老豆要自己搬出嚟住。

陣味勁到自己間房一定要長開風扇/冷氣送風先唔會比啲味滲入嚟、出入都要忍住呼吸,開門閂門都要極速完成。而門口條褲更加係不斷提醒你果晚發生過咩事。瘋狂向租務部施壓之後,有人嚟做清潔同辟味,成個禮拜陣味先散曬。

有好多人隔住個mon睇新聞見到有人死,可能真係無感覺、只係一個數字,甚至惡言相向嘅都大有人在。不過自此之後,每次諗起死亡,就會諗起死咗嘅人會腐爛、會發臭、土葬就會由血肉慢慢變成一堆白骨、火葬就會喺頃刻之間由人形變成一堆灰,更加唔好講佢死前遭遇過乜野、抱持住咩野感情,唔係好似睇戲咁幾個鏡頭完事。

 

作者:August Chan

文字垃圾桶。Hea 選材懶潤飾。

閱讀後覺得好,請多多讚好及分享~:)

其他熱門文章

  • 睇撐警人面書,就可以去海洋公園睇海威咁 by 健吾
    這些撐警的人,從不會離開他們安全的地方。他們只會看手機,看電視,喝著高貴的紅茶,吃著自家製的muffin,感受外面的溫度。他們大多有管理九十後的經驗,一天到晚相信「陰謀論」,覺得這些年輕人,都是有組織有訓練的,卻忘記了自己當管理層之時,叫那…
  • 開心浩園餐 by BEAR 兒
    老軍裝帶責備地拍拍警犬的頭,把紙袋拿起來說:「對不起,這個餐算是我跟你買吧,不過要麻煩你再走一次了。」…
  • 我十八歲,打緊份暑期工叫坐枱 by 金魚小姐
    我今年十八歲,剛考完dse。上星期放榜,成績只有十六七分,不夠讀大學,在retake與副學士之間我選擇了後者。我沒有豐厚家底,只是一個行出街跌個招牌會砸死十個八個的那種公屋妹。高昂學費加上漫長暑假,無意中找到一份兼職,寫明非色情非身體接觸,…
  • 無諗過會有人打來人事部講:「我都唔駛返工,我無做野好耐啦……」 by HR 扮工週記
    女士:「你哋係咪請緊侍應?」小編:「係……」飲食業人手長期短缺,入行嘅年輕人數唔多,所以可以話長期都係請緊人。正當小編以為對方對職位有興趣嘅時候…… …
  • 天才同事訂花——花園叫咩名都搞錯? by 六月的物管
    老細:「今年農曆新年邊個負責訂年花?」 吹水經理:「不如天才同事負責。聖誕花都係佢訂,雖然最後我執手尾。」…
  • 張超雄,你出賣一代抗爭者! by 左膠正垃圾
    好多市民都不肯接受,他們很支持的泛民主派,一向都跟政府是有傾有講的。不論是楊岳橋在議會廳內就炒蝦拆蟹,自己結婚之時就宴請所有的建制派議員到場祝賀。現在張超雄提出「一次性向台灣提出移交逃犯安排」,不知道他有什麼信心,可以肯定不論是政府、建制派…
歡迎讚好我們的facebook page,免費資訊源源送上。

文章資訊

ID: 196742
Date: 2019-07-09 05:21:32
Generated at: 2019-07-19 17:00:57
Permalink: https://www.vjmedia.com.hk/articles/2019/07/09/196742/劏房異聞錄-凶宅之鹹魚飄香