【塔羅個案】女子與男友交往一年半談婚論嫁,最後分手因為未來老爺係警察

文教 / 最新文章綜覽

 

我諗,我好彩,我好大部份客人,雖然站嘅位置或者睇法或者有異,不過一致都唔認同警察於咁多場示威活動裡面嘅行動。簡單黎講,我感恩,因為我無客係藍色,又或者咁講,藍色嘅客見到我於網上嘅言論之後應該都唔會想再黎搵我。

六月到而家,我生意有無受到影響?唔多唔少吧,有部份客人認為「塔羅占卜師唔應該講政治,應該淨係講愛情工作」而 Unfollow 左我,不過喺黎搵我嘅客人,都帶來好多小故事。

「烽火下的小故事」,或者,我咁樣形容吧。

我有一位女性客人,稱她為阿琪吧。阿琪三十出頭,與男友交往接近一年半,男方年紀較長,開始想結婚組織家庭。

當然,我好想講「結婚係兩個人嘅事」,但係,除非你斷六親,不然,結婚,唔多唔少,都會滲雜家人嘅要求、想法;所以,就算我不想認同,但只能無奈地承認,對很多朋友黎講,「結婚是兩家人的事」。

正因如此,阿琪,一度陷入兩難。

阿琪男朋友的父親,做警察,職級就不詳述了;而阿琪自己,做社工,對象以學生為主。阿琪好早期已經知道男友父親嘅工作,不過一直用「又唔會一齊住」「結婚先算啦」之類嘅藉口安撫自己,所以有時飲茶食飯,大家講下娛樂圈,講下安心事件,就算。

不過,阿琪是個很關心香港的女生。五年前先不提了,今年六月,亦多次到現場補給物資。

喺呢度,我要講一講佢男朋友,叫佢阿明啦。

阿明無明言自己支持定唔支持,對父親嘅工作無感,對香港發生嘅事,有少少嬲,偶爾會激動,但唔會行出黎。和平日子,阿明係個唔錯嘅男朋友,好多野都無所謂,唔煙唔酒唔賭,興趣係睇波,亦算幾鍚阿琪。

但係隨住事情變得白熱化,阿明又唔覺意爆響口,同老竇講左「阿琪企對家」,佢地嘅關係,就唔再和平了。

「即刻同呢啲八婆分手!」佢爸爸咁講,當然裡面夾雜左好多粗口,文章就唔詳述了。

「我地就結婚,你就下我爸得唔得?」阿明有啲埋怨,「唔好再出去,網上講少兩句,睇下婚紗咪算。」

阿琪瞇起眼睛,「所以你覺得我地應該置身事外?你鍚你爸爸,我了解;但我想知,你認唔認同警察做嘅野。」

阿明唔出聲,口快快講左句「咁你地唔反,佢地咪唔打你地,總之你令我屋企人唔高興,我好難比你入門。」

阿琪個腦突然有種豁然開朗,啊,說出口了。雖然佢相信阿明對自己唔係玩玩下,不過,佢亦好了解自己男朋友,一向唔算好有主見。

今次呢件事,或者,就係暗示緊比自己知:喺關鍵時刻,呢個男人,係唔會出黎保護自己的。

「我一直無問男朋友真正立場,或者,係我自己怕面對真相。」阿琪向我展示佢同男友嘅合照,「我曾經覺得我地好襯架!」

阿明個爸爸話「你揀條女都唔 L 尊重老竇,咁我點要佢做新抱呀?」等等下略好多難聽字句,阿明媽媽就語重心長 Sene 短訊黎嘗試教導阿琪「正確政治」以及「正確做人新抱」嘅做法;而阿明自己,要求阿琪唔好再理香港嘅事,如果唔係,大家就唔好再見住,「過左呢個時勢再講啦。」

「我無諗住再見了。」阿琪苦笑,「我知道無可能會幸福的。」

我不作聲,下意識地點點頭。類似嘅故事,我近來聽很多,兩性相處,若兩人價值觀不一樣,很難只靠風花雪月就過一輩子。當然,有人到而家都係「唔知發生咩事」或者覺得事不關已,呢種人都係厲害的,小妹拜服。

不過,作為一個女性,我都認同阿琪所講,阿明,一定唔會係最適合佢嘅嗰一位。割捨不容易,分開後美好片段更鮮明,阿琪還是不禁哭了。

但是,會過去的。我靜靜地為阿琪送上紙巾,輕輕拍著她的手臂。

「你做得很好,辛苦你了。」

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 196878
Date: 2019-07-11 04:59:50
Generated at: 2019-09-17 05:35:07
Permalink: https://www.vjmedia.com.hk/articles/2019/07/11/196878/【塔羅個案】女子與男友交往一年半談婚論嫁,最