廢老不是第一天存在的

最近喺到睇0079嘅高達,有一集講班廢老喺殖民衛星比自護襲擊嗰陣走咗上木馬號避難。點知當木馬一路比人追擊走到返地球,喺自護勢力圈努力突圍嗰陣,班廢老就覺得當年比人迫去殖民衛星發展,依加返到地球竟然落唔到地呼吸地球嘅空氣,實在太過份。於是發起暴動!

佢哋捉咗艦上面三個幾歲細路(無錯!嗰三個細路都係難民,三十年前已經殺緊子!),喺出面十鳩幾架自護戰機打到埋來,馬沙架三倍速準備出動嗰陣,要求立即釋放佢哋落地面!仲全無悔意,話係因為木馬號人員唔肯同佢哋「對等交流」所以先捉人質!即使喺自護勢力範圍、即使走唔甩就冚家鏟、都仍然堅持馬上放人嘅訴求!甚至當布萊特隊長拒絕武力鎮壓、承諾一到安全地帶就降落就放人嗰陣,佢哋就成班衝入去艦橋佔領指揮室,仲要問喺一集入面先後揸戰機揸到休克然後再揸高達喺出面比馬沙打到仆街嘅阿寶點解唔理解佢哋,點解唔比佢哋走!

阿寶就當然問返佢哋:「你哋係咪淨係識為自己諗架屌!你估我係為自己先揸高達呀?我都係為咗大家,包括埋你班廢老先出去架咋!」呢個時候廢老當然係答:「我嘅感受係點你明條春咩!」「明明降落好快喳嘛」、「我淨係要個仔平平安安」。。。

而下一集嘅預告係最尾都係放返晒班廢老走,但就比機會自護設好一個局去圍剿木馬號。

其實廢老呢樣嘢,二千年來都冇乜點變過,由『子曰:「幼而不孫弟,長而無述焉,老而不死,是為賊。」』連坐都唔識點坐,結果比孔子捉來鬧嘅老賊;到30年前高達入面嘅暴力廢老;再到收成期陳健波、油塘、九龍灣、屯公入面肆意出手打人,以私利之損為天下之不公嘅退休警、廢老。佢哋都係一班冇自覺心嘅人,以為所有人都好似自己咁睇,唔係嘅就係旁門左道。如果佢見到就來跌入井嗰孺子係綁住條黃絲,即刻連怵惕惻隱都冇埋。

唔單止係立場,廢老嘅視野都係窄得來唔兼容其他角度,喺佢嘅視野入面佢係正確就足夠,睇唔到嘅問題即係冇價值,所以連一套自圓其說嘅諗法都講唔上。佢哋嘅視野入面尤其係冇標準、冇理念,因為呢啲都係需要思考反省,至可以同人生結合嘅嘢。同自己立場相對嘅就要比污名:罪犯、無腦、收咗錢。你問佢點解違反法律即係違反道德、比一套完整有時序嘅論述、同佢解釋200萬人有錢收實際上係不可能、而合唔合理同有冇錢收可以係冇關係等呢啲問題,其實都係冇意義,因為呢啲思考對佢哋來講已經係大逆不道到好似質疑2+2=4,一路用落嘅人生經驗對佢哋來講係無容置疑嘅事。而更仆街嘅係,佢視野嘅狹窄竟然係一個證成理論嘅理由:「我當差咁多年都冇聽過民主係用暴力!」、「大學生學埋晒啲西方嘢讀撚壞個腦!」。廢老對陌生嘅嘢最常用嘅處理方法,就係污名扭曲、打壓、禁制,理解從來唔係一個選項。

所以道德感召如果係一樣有用嘅嘢,都唔係對呢班人用,呢廢老最好嘅方法,就係喺佢嘅視野同觀念入面打敗佢,迫佢認輸。佢圍你就搵更多嘅人圍佢;佢郁手你就撳佢喺地下報警,甚至執佢一劑走人。人倫係同人講嘅(嗱我冇否定有動物倫理),呢個人唔係生物意義上嘅Homo Sapien,而係價值上識反省,有道德思考力嘅Moral Agent,你可以透過同廢老嘅互動,展示一啲道德立場比其他人睇,好似藍衫師兄咁,我係好尊敬嘅。但唔係個個都係空見神僧,食十三下七傷拳都冇事,當年定今日靠比人打來平息干戈更加係痴心妄想。逆地而處,真係來嘅,仗義執拳,打得過就打,打唔過就走,打完都要走(因為唔夠警察打)。

如果要一個都不能少,亦要嬴呢場仗,就更加唔可以送頭或者出事,各位多多保重,鍵戰出返去先。

 

作者:異戈

為文為學無甚成就,撰文以自奮。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 196985
Date: 2019-07-12 05:06:14
Generated at: 2019-10-19 04:12:39
Permalink: https://www.vjmedia.com.hk/articles/2019/07/12/196985/廢老不是第一天存在的