天才同事訂花——花園叫咩名都搞錯?

 

 

天才同事的確喺「人才」。點解?皆因,業主見到佢會好開心。因為佢,啲客可以「屈」公司,入晒公司數。

老細都算好脾氣兼好人,超有耐心好似教仔咁教,逐個步驟講得清清楚楚,差在未捉住隻手嚟做。可惜,佢依舊都喺咩都「搞到一鑊泡」先收科。話說聖誕前,老細叫「天才」同事訂聖誕花。訂前講明,唔需要訂金色嘅花盆套。結果,老細睇到張訂貨單就扯晒火:「都話唔駛訂金色花盆套,做咩又再訂?吹水經理,你幫天才同事再跟,唔係(業委)見到條數又「吊」!」

如事者,農曆新年前一個月嘅早會。

老細:「今年農曆新年邊個負責訂年花?」
吹水經理:「不如天才同事負責。聖誕花都係佢訂,雖然最後我執手尾。」
老細考慮咗幾分鐘:「咁…天才同事你負責訂年花,跟返嗰時我教你咁做。」(我哋每個都好忙,所以老細先將重任交俾最清閒嘅天才同事身上。)
天才同事:「哦!」然後,鴉雀無聲。
老細再問:「知唔知道?」
天才同事:「哦!」然後,Dead Air !
吹水經理:「老細問你知唔知呀?」
天才同事:「哦!」然後,再Dead Air !

幾日後嘅早會。

老細:「天才同事,收齊年花報價未?記得要三間花園報價,你可以搵返上次中標嗰間[百乖花園]叫佢報價。」
天才同事:「哦!」
然後,離約定收年花前嘅2個星期嘅早會!
老細:「今次喺咪[百乖花園]中標?」
天材同事:「唔係….er….[百乖花園]…er… 但喺佢改咗名叫[福乖花園]。」

然後再過幾日嘅早會。

老細突然福至心靈問天才同事:「真喺改咗名做[福乖花園]?」
天才同事:「嗯!」
老細再問:「真喺?」
天才同事:「嗯!」
老細再再問:「真喺改咗名叫[福乖花園]?」
天才同事:「er…我er…check吓先!」
老細見勢色唔對即刻同管家婆阿姐講:「麻煩你打電話俾[百乖花園]陳生,問佢有無改名?如果無,就再打電話俾[福乖花園]問點樣找數?如果,要先俾錢後送貨,我怕新年無花到!」

第二日,老細一開會就問管家婆阿姐:「問成點?」
阿姐:「[百乖花園]陳生話無改名,佢仲奇怪今年我哋點解唔要花。[福乖花園]嗰個叫黃小姐,第一次中標。問過佢,話可以唔駛俾訂住,貨到先收錢。我想講嗰重點喺;一個小姐、一個先生,天才同事都可以唔知,然後又搞亂晒、亂咁噏囉!」然後,眾人目光落喺天才同事身上。
老細:「好在[無寸]隔離屋苑經理唔知[百乖花園]改咗名叫[福乖花園]。如果唔係,真喺笑大人個口,俾隔離屋苑瘋狂恥笑,笑足幾年。」
卸膊主任陰笑:「你屋企開㗎,定收咗幾多錢佣 ?」
天才同事傻笑中:「….er…!」
吹水主任講笑:「唉呀天才同事!喺咪驚到震緊?未幫襯過[福乖花園],你一定好驚啲年花質素!唔駛驚,隔離屋苑嗰啲年花差唔多開晒,捱唔到十五,只要唔衰過隔離屋苑就得。」由於,之前講明「福乖花園」要遲啲送貨,確保啲年花可以捱過十五,所以今次天才同事逃過大難,唔駛俾「業委」同「老細」吊。

最後皆大歡喜收場,而天才同事就係咁就多咗個花園太子爺嘅美譽。

 

作者:六月的物管

真係做左六個月物業管理

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 197106
Date: 2019-07-16 05:04:31
Generated at: 2020-10-25 09:53:48
Permalink: https://www.vjmedia.com.hk/articles/2019/07/16/197106/天才同事訂花-花園叫咩名都搞錯?