依家嘅每一次示威遊行,都係港式「國定殺戮日」

 

 

前幾日,發生咗件幾有趣嘅事。話說沙田衝突個晚,有個女仔朋友up左警察畀人踢落扶手電梯,之後群眾上前圍毆嘅片段上ig story,就係睇唔過眼啲人咁樣打差佬。但多手嘅我就覆咗一句,「好治癒」……然後罵戰咗一陣,不過都係相對有邏輯嘅對話。

但事隔一陣,個女仔朋友又再喺ig direct message我,而今次就好似中年藍絲上身咁,講「你有冇見到啲人運武器上前線」、然後又講「總之用暴力就係唔啱」、跟住又話你要和平就學台灣咁入去立法院,逐個逐個被抬出嚟,唔係打人,最後就係必殺絕技「咁唔鍾意咪走囉,唔好搞亂香港」原來以上呢啲說話,都係由我女仔朋友嘅警察男朋友所打,我竟然喺IG撚狗而我不自知。

同警察叔叔對話之中,最令我有深刻記憶,就係我哋爭辯喺新城市廣場個啲叫驅趕定係圍捕。我指出警察迫示威者入到商場,又封出口,又停火車,搞到人哋無得走,咁仲唔係圍捕?最大問題係個到係新城市,有普通人食飯、行街,睇戲,但你就將所有好人當賊扮。佢嘅回應就係「我大把朋友住沙田,個個都知下面打緊仗,正常人都唔會走落去喇。」其實,講咁耐佢呢句係最令我心寒。香港打仗?wait,而家係有人持槍闖入新城市?定係有人手持大殺傷力武器企圖要引爆?香港嘅遊行示威幾時提升到打仗級別?九成九嘅所謂衝突場面都係因為警察逼退而製造。而呢句說話最不負責任嘅地方,就係佢擺到明講依家打緊仗,你有咩唔關事嘅人經過個到,被人打,被人兇,被差佬噴胡椒噴霧都唔關我事,係你自己要經過個到太on9,唔可以怪警察做嘢。

我諗咗一諗,言下之意,即係其實香港可以擁有自己嘅「國定殺戮日」,你有冇睇過呢套西片?套戲係講美國每年都有一個夜晚全國嘅人民都可以免責地互相殘殺,所有政府機關,包括警察、消防,醫院全部都唔會有人做嘢,大家只需要毫無保留咁大殺一晚,但係打死無怨。

我相信依家唔少警察已經當左遊行嘅日子係「國定殺戮日」,可以任意狂打示威者,甚至要追殺佢哋,完全唔需要負刑責,亦無必要克制。對於路經,甚至係個頭食完飯,睇完戲嘅人都可以打,事後就同你講句「依家打緊仗呀,正常人都唔會行過呢到喇!」照打可也。只不過呢場國定殺戮日,換左嘅係差佬同示威者互片,不過差佬就可以毫無保留咁打到你半死;但你只要傷到佢一下,佢就會告你甩褲,星期日打,星期二提堂,光速訴訟。呢個就係港式嘅不對等國定殺戮日。

九龍示威個晚、光復上水個晚,沙田遊行個晚,每一晚差佬都係等開飯,更離譜嘅係沙田入到商場開片。情況只會繼續差落去,大家每次都係等緊一個廝殺嘅機會,差佬一早係咁,示威者亦已經變成咁,係作用力定反作用力。沙田示威嘅當晚深夜,肥聰開記招話有犯咗罪嘅罪犯入到去商場,警察都會追捕。咁如果今次係脅持人質,你啲差佬又會唔會衝上前打啲持槍犯人,然後同被人脅持嘅人講「打緊仗呀,正常人都唔會經過呢到喇!」今次係成千人入左去,你點追捕呀?唔好咁喇,因為撐而撐而連應有嘅專業判斷都從無咗,你哋食咗屎咩?人命對於你哋嚟講真係笑話咩?

所以我希望各位示義士明白,你哋條命對於佢哋嚟講根本係nothing,所以唔好隨便有所謂「戰死」嘅想法,唔好隨便獻頭。留低有用之軀,要親眼見證暴政滅亡。

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

  • 【遊戲新聞】一年一度 E3 遊戲展 講完無影嘅作品年年都有 by 森麻
    又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總 […]…
  • 八仙嶺縱火案翻案問題 by 蕭少滔
    我以下按刑事偵緝的「排除法」,讓大家客觀地重組案情。大家如有指正及補充,可以有助澄清事實的話,無任歡迎。…
  • 八仙嶺之殤——災難回顧報告 by 無妄齋
    以下為我們翻查當年事故資料所得,目的並非要指控當年誰是誰非,也無意勾起當事者的傷痛。相反,是旨在透過重溫事件經過及法庭紀錄,為讀者提供較為完整的說法及根據,並寄望從此杜絕坊間的主觀臆測,以正視聽,還世間一個公道。…
  • 國安法下的香港電影 by Terence Yun
    倘若國安法成為指引下,創作人又再多一重限制,這條紅線之無形壓力便走進創作人的腦海之中,無形刀壓在創作人頸上。香港沒有審批劇本制度,不同大陸,批左就可以開拍(當然亦有批左,拍左都不能上畫),而香港沒有審批,意味著創作人在創作時要估計和預計在什…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • Zopiclone——傳說中的安眠藥「白瓜子」 by 小小藥罐子
    Zopiclone,可以讓人入睡大約6至8個小時,所以,一般建議連續入睡至少8個小時,避免出現「宿醉(Hangover)」的機會。所謂「宿醉」,簡單說,透過安眠藥入睡後,如果睡眠的時間不夠長的話,醒來後,仍然可能會覺得睡意未散,頭昏腦脹,影…
歡迎讚好我們的facebook page,免費資訊源源送上。

文章資訊

ID: 197156
Date: 2019-07-16 18:34:52
Generated at: 2021-06-14 11:07:10
Permalink: https://www.vjmedia.com.hk/articles/2019/07/16/197156/依家嘅每一次示威遊行,都係港式「國定殺戮日」