擇偶條件:你支唔支持五大訴求?

 

7月13日,是「光復上水」遊行,是次遊行官方宣布有三萬人參與。當日亦出現令人難得一見的上水寧靜畫面。不論街鋪,還是商場店鋪,都有不少商戶提早拉閘。遊行過後,有不少示威者佔據馬路,漸發展成衝突。

– KEVIN CHENG PHOTOGRAPHY- 發佈於 2019年7月14日星期日

 

「點呀最近有無咩新進展?」朋友阿花問。
「咩新進展?你指反送中呀?21號遊行囉!」我說。
「頂!唔係呀,我問你感情果方面。」阿花說。
「無喎,暫緩緊,可能就嚟壽終正寢。」我說。
「其實你有咩擇偶條件?等我幫你介紹下。」阿花說。
「支持五大訴求囉!可以同我一齊去遊行吖嘛!」我笑說。

然後阿花以為我玩嘢,就好無奈咁走咗,其實我係認真,兩個人一齊,初初可能係因為一時衝動、有feel、比佢外表或者身材吸引到,好似講得太膚淺添、好啦又或者你真係欣賞佢嘅內在美,覺得同佢好夾等等,但要行得耐,甚至做終身伴侶,其實最重要係溝通到,互相體諒同忍耐,我自問同藍絲真係唔會溝通到,我只會想鬧爆佢。

每逢轉去新公司,同事吹水嘅時候都會問:「你有無拍拖?」或者「你幾多歲?」對住一班考DSC嘅90後同事,我真係唔敢同佢哋講我係考A-level,最佳嘅答案當然係「年齡係女人嘅秘密」。老老實實我覺得同佢哋好似開始有少少代溝,又或者咁講,見到佢哋就好似見到以前嘅自己咁,成日都充滿活力,永遠唔會攰,唱通宵K都無問題,而家?12點前好瞓喇,仲要個人好養生,同埋愈來愈鍾意同年紀大嘅人溝通。

有日有個同事好擔心咁嚟搵我,問我到底點樣可以搵到另一半,我覺得呢條係屬於一百萬嘅問題,我真係唔識答,於是我講咗一堆嘢:「朋友介紹、上興趣班、做義工、去教會、交友app、speed dating、轉工等等。」同事話以上都有試過但都係無結果,於是我就同佢講:「隨緣啦,呢個世界永遠係咁賤,你愈想要就愈遇唔到,到你唔想要,佢就會無啦啦出現㗎喇。」個重點係呢個同事仲要細我幾年,究竟點解要咁擔心呢?係都阿姐我擔心啲先啦喂!

「或者你試下去遊行囉,可能命運會令你遇到志同道合嘅佢呢。」

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 197299
Date: 2019-07-20 17:52:49
Generated at: 2019-10-16 18:56:27
Permalink: https://www.vjmedia.com.hk/articles/2019/07/20/197299/擇偶條件:你支唔支持五大訴求?