《逆向誘拐》:一早俾你估到兇手嘅推理電影,有咩好睇?

 

 

剛過去嘅星期五晚,參加咗一個電影放映活動,睇咗套電影《逆向誘拐》。的確係好睇,如果你當係推理懸疑片咁睇呢就一定唔好睇,根本佢個設定係一早俾你估到兇手嘅,所以要以劇情電影去睇,了解兩代人嘅個性,了解當中諷刺嘅社會問題,了解兇手動機,最終目的係乜。

套戲有幾好睇我唔講啦,我又唔係影評人,大把人寫得有力過我啦。不過講下係放映會同當中主角之一邵仲衡同導演,仲有其他演員及其他電影相關嘅成員都有出席係電影完結時同大家一齊探討電影,真係好有心嘅活動。對於佢地嘅用心,我會更大力推薦大家去買隻碟返屋企睇,邀請朋友一齊買碟睇,因為睇一次係唔夠,要睇多次,仲要同朋友討論先掂嘅電影。

要一直留意電影,到最後佢地用咗《The best is yet to come》首歌,仲改咗啲歌詞,而且改到更貼電影,如果話更貼電影不如話更貼時勢。(改我喜愛的林一峰嘅成名歌嘅歌詞,我係會知㗎)

 

好啦,到講我真係想講嘅嘢啦~《逆向誘拐》當中講到一樣嘢,係對時下好重要嘅嘢。就係「大數據」,世界早就唔同,同十年前已經唔同,你要唔要成為一個愚民係一種選擇,有好多平台俾你清醒,都可以利用一啲平台去組織做一啲嘢,然後利用愚民去幫你達到目的。

講到哩點我就想提及下面嘅電影《脫歐:無理之戰》,嗱,首先連DO DO姐都想抽水嘅英國型男BENEDICT CUMBERBATCH係主角,咁已經係好大嘅理由要睇啦~

 

 

而另一重點係,套電影係真事改編,講嘅人仲生勾勾咁係道㗎,仲要講咁近嘅公投黑暗面,脫歐派點利用大數據分析,利用宣傳戰略,去利用一班愚民幫脫歐派成功,咁大膽嘅劇情引嚟不少話題。

戲中有大量選舉實戰劇情,就連《孫子兵法》都有提及,對政治感興趣嘅觀眾能夠從中學習到唔少理論和戰略。

兩套戲連住睇,相信會啟發到唔少嘢。亦希望年輕人,除咗敢勇武,都要學識點樣玩中共玩唔到嘅嘢,要咁無賴得咁無賴。佢想利用體制嚟攞我地大數據,而我地本身就有好多途徑攞我地想要嘅數據,利用啲人嘅大方向採取兵不厭詐嘅宣傳手段,嚟個現實版嘅逆向誘拐。

再大膽啲,唔使咁正直,因為敵方根本用嘅都係嗱渣手段,所以我先一直堤「無賴」哩一點,只要方向係啱嘅,方法係可行嘅,我會唔理途中用咩手段都會護航。

老屎忽唔讓位,年輕人就開發新路,睇班老屎好得幾耐。你班老屎忽,唔好再扮直正,阻鳩住個世界,然後就出嚟攞光環咁仆街啦~

 

《逆向誘拐》電影最後,女主角夾咗張相係書俾男主角,係金鐘偷影男主角嘅相,而相下面寫上「OCT,14」,然後叫男主角唔好再扮瞓,以此暗喻14年10月係金鐘發生嘅事。朋友完咗之後話佢真係GET唔到張相意思,真係要導演講先知。我話,我都GET唔到,唔係我地立場唔同只係我地唔係黃絲。朋友未明我意思我就再講,我地唔係唔醒,而且係好清醒嘅人,知道雨傘運動係咩一回事,知道雨傘運動後期(應該未到後期已經係)已被扭曲咗,變成一場人血饅頭嘅把戲,所以我地唔再深深記住場不是運動嘅運動。朋友都話,佢真係淡忘緊件事。

喺現實,以為自己醒但其實發緊夢嘅黃絲仲大有人在,希望導演唔係啦~希望大家一齊叫醒老屎忽,拯救年輕人,唔好信推年輕人去死,自己攞光環嘅泛民。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 197630
Date: 2019-07-29 05:53:28
Generated at: 2022-09-30 15:09:08
Permalink: https://www.vjmedia.com.hk/articles/2019/07/29/197630/《逆向誘拐》:一早俾你估到兇手嘅推理電影,有