起臨時政府前,你需要知嘅事

圖:武昌起義紀念館

 

反送中運動由6月上旬升溫至今,唔只一次見到有人討論「臨時立法會」、「臨時政府」呢啲話題,當然,就冇一次係可以有人長期傾落去嘅,不過都誕生咗啲宣言同憲草。雖然我個人唔太認同份連登憲草,但見到有人願寫都係好事。不過,今日想同大家講下嘅係:正式起呢個臨時政府之前,大家有啲咩要做呢?

 

就咁講理論好似好dry咁,不如講下故事:

 

一、法國國民議會

1789年,由於國王打算召開三級會議,當年春季法國舉行咗一場會議代表選舉。三級會議係分組點票嘅,分為貴族、教士、第三等級三組,會議代表嘅人數比例大約係1:1:2。平民百姓希望取消分組點票,但並無結果。最後,第三等級嘅代表自行成立國民議會,發表《網球場宣言》,宣佈國民議會將會存在到法國有憲法為止,同時亦邀請貴族同教士加入。後嚟嘅事就係,五個字講完:「法國大革命」。

 

二、中華民國軍政府鄂軍都督府

時間一轉眼就嚟到20世紀。1911年10月10日,晚上大約7點,武昌起義爆發。由於事前革命黨人早就滲透新軍,所以當城內新軍一發難,駐守城南、城北嘅新軍亦即時響應,入城支援。直至10月11日凌晨1點半左右,起義軍完全控制武昌城。之後,漢陽、漢口嘅革命黨人收到武昌起義嘅消息,亦起兵攻佔兩地。到咗10月12日,武漢三鎮大致上已受控制,革命軍先正式成立鄂軍都督府,推咗黎元洪出嚟做都督。

當年嘅10月,中國各地都發生類似嘅事件,各省都有新軍起兵,攻入省政府,然後宣佈獨立。不過,當去到11月,又出現另一種情況:有部分未成立新臨時政府嘅省繼續發生新軍起義事件,但清朝新成立,由選舉產生嘅諮議局,開始更主動支持革命軍。由浙江省開始,革命軍起兵後諮議局推舉軍政府都督,之後安徽甚至發生革命軍起兵之後,諮議局說服巡撫獨立做都督。當中有一個省更加係兵不血刃:由諮議局議決獨立。至於廣東嘅情況,兩廣總督張鳴岐見勢色唔對,自己走去諮議局開會傾獨立議題,結果當然就係通過。

 

故仔講完,大家有咩諗法呢?事實上,呢個月一啲零碎嘅「立憲建國」討論,好明顯係唔知傾緊啲咩:因為無論由法國嘅例子嚟睇,定係由中國嘅例子嚟睇,一個真係有效嘅臨時政府要具備兩個要素:政治領袖同武裝力量。政治領袖有認授性起建立新政府,法國大革命時嘅會議代表同辛亥革命時嘅諮議局議員,合作起上嚟,一個臨時政府就可以起到出嚟;武裝力量呢?你話法國個例子冇提到軍隊,咁不如又估下巴士底獄係咩人攻陷?巴黎喺之後,係國王嘅軍隊控制,定係革命軍控制?辛亥革命就更加唔使講,革命黨人用咗幾多心機向新軍士兵宣傳革命,我哋呢度係講唔晒架。憲法?等呢個新政府穩定咗先諗,都唔遲。

想問相反嘅情況都唔係冇架,中國共產黨就係最佳例子。1931年11月7日,中共當時藏身喺江西南部一個唔重要嘅山區小縣瑞金,準備好埋一部有17條嘅憲法,要搞「兩個中國」,成立咗個中華蘇維埃共和國臨時中央政府。咁佢哋嘅結果係點呢?就係去咗「長征」囉。

所以話,起臨時政府之前,你需要關心嘅事係咩事呢?大家自己諗下啦。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 197665
Date: 2019-07-30 19:32:38
Generated at: 2022-08-11 19:46:51
Permalink: https://www.vjmedia.com.hk/articles/2019/07/30/197665/起臨時政府前,你需要知嘅事