【拒絕冷氣軍師】一場成功嘅全港大罷工,應該有咩效果?

 

– KEVIN CHENG PHOTOGRAPHY- 發佈於 2019年7月26日星期五

 

我拒絕做冷氣軍師,我自己唔落場被警察打,我就唔會喺後面吶喊助威俾錢叫人買裝備;我自己就係自己老闆,唔存在罷唔罷工,我都唔會教人點樣癱瘓公司運作甚至癱瘓香港運作,反正有新game 我就自然會癱瘓輔仁運作。

點做,唔好問我,你當我唔識就得,我只係講,如果全港大罷工,一旦成功,應該會有咩特質,香港人呢個星期一及之後嘅生活會變成點。

 

首先,呢場全港大罷工,唔係8月5日,係8月5日起。

個「起」字嘅意思,係個罷工訴求(五大訴求,you name it),對方(即係林鄭政府)唔妥協,就唔會停。

我份人好折衷,五大訴求,就算唔係全部妥協,我會覺得,唔控告612以來嘅示威者任何控罪,係最緊要。據聞人數已經超過二百人,及日日上升,越賭越大。

所以對我來講,呢場全港大罷工,只要林鄭乃至警察及律政司未放棄控告612以來嘅示威者,全港大罷工係會持續,持續至天荒地老。

 

然後,全港大罷工會令香港變成點?

我之前已經寫過,企業嘅僱員罷工,你嘅對象係你老闆,你要用唔返工去令佢間公司運作唔到,例如飛機無左機師就飛唔起,航空公司就要逼住同你傾。

如果個對象係政權呢?個政權,好難話點樣運作唔到,畢竟唔係好似二次大戰美軍炸廣島炸長崎咁,一支核彈射落維多利亞港,一日死幾百萬香港人,嗰種癱瘓一個政權嘅運作。

香港引以為傲嘅係咩?係金融業。如果星期一發生嘅係一場全港大罷工,香港交易所會完成唔到交易,折衷來講,至少有部份交易會受到影響。如果林政政權唔妥協,唔承諾不控告612後所有示威者,金融交易會停止直至呢個政權肯。同樣,我拒絕做冷氣軍師,因為我根本無嘗試教人點做。

香港作為一個現代化城市,要運作最基本仲要有交通、電力、供水,同玩City Skyline 係一樣嘅。所以,如果星期一發生嘅係一場全港大罷工,除左最近我嘅集會地點之外,我係會邊度都唔洗去,我係會乜都無得做,身為一個上到網就返到工嘅人,全港大罷工引發嘅全港大停電,我會「被罷工」。

 

岔開少少講,「被罷工」喺一場大罷工來講,係非常緊要,舉例來講,假設某間企業如果有100人,當中只有30人肯罷工,係咪一定失敗?唔係,因為呢30人,係要阻住其他同事返工,喺一場罷工來講,執意要返工嘅人,有名堂嘅,叫「工賊」,即係工人階級嘅敵人。所以,就算星期一,肯真係罷工嘅可能只係香港一少部份人,喺一場成功嘅大罷工,呢班人,要千方百計(同樣,唔好問我點做,我唔做冷氣軍師)令其他香港人返唔到工作崗位。

啱啱見到有報導話,三分一航空管制員請假,這是一個好開始,呢三分一人,只要成功阻止另外嘅三分二人為香港機場嘅飛機升降提供導航,咁香港嘅航空業就會癱瘓。同樣,唔好問我點做,我唔做冷氣軍師。

 

聽日,我會照常咁生活,一定唔會去任何嘅所謂集會,去球場集會除左阻人打波,無人會覺得癱瘓左任何野。

我可能係去食飯行街,可能去坐下cafe 打下Switch 嘅《火焰之紋章。風花雪月》玩二週目,計劃中仲可能好多野做。如果聽日起,係起,唔係得聽日,為左五大訴求,香港真係有一場全港大罷工,喺林鄭政權妥協之前,我已經有曬心裡準備,我乜都唔洗做。

如果我真係乜都做唔到,令我乜都唔洗做嘅人,你唔好跪喺度向我道歉,你無對我唔住,我未必會好似鬧你地嘅人咁周圍大大聲,只會默默咁讚賞你地「做得非常好」。

如果聽日做唔到呢啲效果,請你地記住,一場全港大罷工係咁樣嘅,以呢個為目標,做一切應該做嘅部署,連結一切應該連結嘅人。

祝你地成功。

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

  • 每一所大學,附近都有個交通要衝. . . . . . by 白木乩
    香港警察要幾咁無戰略智慧,先會諗住強攻大學?…
  • 同藍絲做廿年朋友,結果係點? by 六月的物管
    話說某日,細妹咁唔好彩撞啱「克警」又亂鳩咁放催淚彈,搞到佢眼、鼻、喉都勁唔舒服,猛咁咳之餘,氣管同皮膚都又敏感又痕。之後,細妹喺FB出post 訴苦…
  • 迫大家抗爭 by 健吾
    對這位特首而言,她很清楚,她現在宣佈宵禁,停工停課停市,就是輸。這樣子,「暴徒」的目的就會得逞。所以,她一定不會停課,而更會向「可以上班和上學的人表示敬意」。 …
  • 我和我的中大 by 健吾
    中文大學是一個改變我人生的地方。…
  • 中共有意令香港進入混亂? by 庵念慈
    靠人民的大騷亂去將黨內反對派清除,是文革的起因。23條弄了十幾年都停步不前,剛好遇上這場運動,倒不如將香港的反對派肅清,一路讓他亂落去,例如沉寂的零星騷亂不夠亂,那麼就各區一齊開槍,721如是,831如是,10/1國慶如是,雙11也如是。…
  • 黃店還是藍店? by 健吾
    最近有朋友跟我說,太子某一間火鍋店很藍,但自從某次見到警察在他們外面放催淚彈之後,就變黃了。然後在網路,又有人說究竟是黃是藍。有些員工,天天都看著大台的新聞,他們接收的資訊不多,再加上很多以訛傳訛的資訊,示威者有錢收,前線有小天使等等的消息…
歡迎讚好我們的facebook page,免費資訊源源送上。

文章資訊

ID: 197788
Date: 2019-08-04 20:36:56
Generated at: 2019-11-14 00:08:47
Permalink: https://www.vjmedia.com.hk/articles/2019/08/04/197788/【拒絕冷氣軍師】一場成功嘅全港大罷工,應該有