2019年喇，仲講「唔好激嬲共產黨」？

我以為，經歷咗呢兩個月嘅抗爭，200萬人出嚟、6個人輕生、衝過入立法會、畀黑社會無差別襲擊，食催淚彈當食生菜等等嘅大小事，人係會進步，會知道個世界前進緊，以前個一套已經唔啱用。點知，經過噚日以後，個啲好熟悉嘅句子又返哂嚟，「唔好激嬲共產黨呀！」同埋「唔好畀人扣港獨帽子呀！」

罷工日前夕，林鄭月娥出嚟開個記者會，態度比之前嘅都強硬。佢又做返梁振英做過嘅嘢，就係將抗爭定性做奪權，定性佢已經唔係反抗修例，而係爭取其他嘢，例如香港獨立。林鄭嘅言論當然有陰險之處，因為佢將責任推得一乾二淨，企圖引導中共出面解決。事實證明，佢個記者會比罷工同埋之後發生嘅事影響力更大。因為經佢咁講一講，連登風向大變，「光復香港，時代革命」變成反動用語，必須下架，投票改口號！前線行動都要停一停，唔可以漫無目的搞差館，抗爭者要諗下自己有冇變成自己最討厭嘅惡魔！睇下，強硬一下效果幾成功。

我唔係要求大家對抗爭者嘅所有行動照單全收。但問題係，8月5日大罷工理應係呢場抗爭運動嘅其中一個高潮，係人數眾多同埋情緒高漲之下，一定會有更升級嘅行動，更可以話係「曬冷」，就係要拖垮黑警同政府。再加上前一晚少女被黑警非禮，同埋朝早林鄭嘅火上加油，抗爭者嘅行動不停升級都係可以理解同埋預期之中。大家可以檢討咁樣不停升級落去係唔係辦法，會唔會失民心或者拖垮抗爭者嘅身心，但唔好又返返去個啲「唔好做啲嘢畀人有口實」嘅無謂討論到。

同大家回一回帶，2014年佔領期間大台叫人唔好衝擊國慶升旗禮，共產黨有冇咁好開心，畀大家爭取到大家想要嘅真普選？無呀！2016年，梁游立法會宣誓，誓詞侮辱中國同埋有港獨成份，結果人大釋法，取消二人議席。好多人都話佢哋抵死，唔好激嬲共產黨就無事。好喇，近幾年，政府連所謂自決派人士嘅參選權利都剝脫，其中仲包括當日喺升旗禮外背住舉交叉嘅學民思潮轉型催生嘅香港眾志。而泛民中人就為咗可以選，不停將條底線退後，就係依家大家做緊嘅嘢。

你反抗就早已經係激嬲共產黨呀！係呀，講緊你個啲100萬、200萬人遊行都係呀！佔領個陣坐足79日，夠哂和平，無人噴黑國徽又無人掉國旗落海喇，當時北京咪又係話係「顏色革命」，你哋係無記性定扮傻呀？況且，依家咁嘅局面所有嘢都係累積返黎，「反送中」都只係導火線，問題係呢個由中共揀出黎嘅港共政府所有嘢都係倒行逆施。而且去到今時今日問題都已經唔止反送中，警隊濫暴同埋放任黑社會打人都係需要聲討，需要政府就此有所作為。所以變成反政府示威，甚至係推翻暴政嘅革命都絕不為過。

唔好激嬲共產黨？你香港人一日仲有自由反抗，共產黨都係咁撚嬲。

作者：阿享

一個戒緊牛肉，但打邊爐仍然會忍唔住既耶青。

閱讀後覺得好，請多多讚好及分享～：）