論責任——調查警察行爲與調查示威者行爲的分別

– KEVIN CHENG PHOTOGRAPHY- 發佈於 2019年8月6日星期二

 

我深信每一個市民都想、都需要警方或監警會(既然唔肯俾獨立調查機關成立)以至政府及高度崇敬警隊嘅港澳辦就呢個列表每一項發生過嘅事作出交代。

中立人士可能會覺得部份言詞略為偏頗,但瑕不掩瑜,重點係事件本身真係有如此發生過,不宜因人廢言,因爲語氣偏幫示威者就否認事情。

同時真係好鍾意「各打五十大板」嘅人士同樣可以整理相近素材記錄示威者行為,不過容許我提點兩者性質非常不同,因爲警隊以下兩個特質:

一)市民期望警員依法辦事牽涉其執法專業素養,不畏懼、不徇私、不對他人懷惡意、不敵視他人唔只係佢哋發過嘅誓,亦代表公眾對佢哋嘅專業期望,以呢個態度執法才有可能公平公義,先有可能真正維持社會安寧,所以呢份紀錄整理嘅每一項其實唔係市民找碴雞蛋裏挑骨頭仇視警隊,而係警方本身就應盡全力去釐清以維持己身專業及警民信任。如果警方專業唔到,市民會好不安,會質疑仲應唔應該交俾佢哋執法,甚至係交俾警方執法反而影響自身安危,而無法達至維持社會安寧公義呢個服務市民服務社群嘅宗旨。

如果警隊想重新享受市民尊敬、警民合作關係良好等等以前有嘅地位同權利,呢嗰列表嘅所有信任炸彈佢全部要拆、要逐一解釋清楚。專業素養係由你做嘅事以至背後嘅思維模式展現出嚟嘅,唔係喺個記者會hea解兩句或者有勢力撐就撐到出嚟嘅。

二)市民唔係白白要求警方專業嘅,作爲公務員係出政府(i.e. 納稅人)嘅糧,用嘅子彈都係用公帑買嘅,用嘅每一分錢做嘅每一個決定(好不幸地)係需要向公衆交代嘅。嗰句 You’re well paid for it 唔係話有份糧出就可以提出天大要求,而係警員亦應重視合約精神(以及爲市民服務嘅情操),由入職起已經同意逗得呢份糧就包埋要接受市民監察,我相信呢點亦應用於每一個公務員身上,甚至你做私人公司都係受上司以及你公司所服務嘅對象監察,I would say EVERYONE is paid for the job duties and responsibilities they take on,每一個打工仔都有佢工作內容上要完成及要接受持分者監察嘅成分。頂多你話警員身上嘅監察視線比較多,壓力比較大,非常十分可以理解,但唔構成怠工唔專業嘅藉口。

就以上兩點反向思考,就會明白點解調查示威者行爲性質非常不同。

坦白講我思考「市民期望示威者展現何種素養」嘅時候我有啲R頭,市民同示威者本身無任何互爲監察或者負責嘅關係。傳媒都尚且可能想調查示威者行爲或背後動機,但其公共性止於公衆有興趣知道,而唔係公衆有權知道——你可以想象一下「示威者有責任向公衆交代行爲動機」係如何荒謬可笑。示威者只係因爲想傳播表達自己訴求而樂意向公衆交代其行爲動機,而剛巧呢點與公衆興趣相符,但從來無責任交代。

但香港好得意,市民往往覺得示威者有好多「責任」要負,包括唔應該阻人返工,唔應該影響他人生活,應該和平理性非暴力,唔應該破壞社會安寧,唔應該犯法,唔應該刑事毀壞或縱火,但老實說,以上無一個係示威者呢個身份應然要負嘅「責任」。(留意返,有刑事責任嘅部份係身爲香港市民嘅身份「唔應該做」嘅違法行爲,而唔係因爲佢身爲示威者嘅身份唔應該做嘅行爲。)示威者會「遵守」或盡量做到以上期望純粹係因爲想爭取民意支持,從。來。不。屬。其。責。任。

於是市民更加無「監察」示威者行爲嘅權利或義務或責任,全因彼此之間根本唔存在有如警民之間嗰種持分者關係。如果話要示威者「向警察看齊」,要政府調查示威者行爲或動機,其實好無稽。

(小小離題:我難免會聯想看齊莫非係調查示威者有無展現「專業」素養操守?噉究竟係和理非示威專業啲、定燒垃圾桶剪交通燈專業啲呢?我會話香港示威者會去連儂牆執垃圾、會將垃圾分類回收、會互相扶持自發供應物資、會格外照顧現場老弱、會尊重記者醫護等等行爲展現另類嘅示威者專業操守。不過講到底,示威者嘅「專業」係無定義嘅,而亦無相對應要負責要交代嘅持分者。)

調查示威者有否違法行爲最能夠令人理解,係因爲違法而要負刑責係最清晰嘅調查方向,不過要政府調查而唔係警方調查本質上有啲古怪。(但考慮警方失去市民信任,要其他群體調查亦非不可理解。)如果話要調查背後動機、有無組織、有無資金、有無外國勢力,政府的確因爲可以影響施政及管治而需要留意,傳媒的確會因爲公衆有興趣知情而有「需要」調查,但如果與調查警察行爲嘅「必要」相提並論,完全係錯誤理解警察對市民嘅真責任同示威者對市民嘅假責任。

 

作者:小sion子

閱讀後覺得好,請多多讚好及分享~:)

其他熱門文章

  • 我同事笑我唔識用touchpad….. by 緋色雪夜
    「其實你係咪唔識用touchpad?好好用喎~」同事妹妹拎住部macbook坐埋嚟,「不如我教你用touchpad呀。」…
  • 【玩物花絮】正過官方新屋 LEGO集會廣場改建歐陸Jazz Cafe by 阿九
    近期真係冇乜高質素嘅大屋 AMOC 出現喺市面,而官方公佈下年 1 月 3 號正式開賣嘅 10270 Book […]…
  • 你會同另一半講你嘅性史嗎? by 我從不穿睡裙
    講曬出黎,對方真係完全無野,完全接受倒,覺得呢D過去左既野係唔重要的話,我真係恭喜你。但萬一,對方聽完之後唔係咁既話,你要小心了。…
  • 恭喜何君堯終於揾到接班人啦! by 達時製作 (On Time Production)
    何妖能夠孤身(只限香港啫,中國就實有人撐佢嘅)走到今日呢步,殊不簡單。而佢嘅「成功」,亦都感染咗一位等左上位好耐嘅仁兄。佢就係...…
  • How dare you? Because I can. by 諱文
    點都好,首先要恭喜一下Greta本人成為最年輕既年度風雲人物,16之齡得到呢個殊榮證明佢的確厲害;希望佢之後可以真真正正為環境出一分力。點解我會咁講?先唔講佢有班強勁既PR同遊說集團係佢背後撐腰,花少少時間search吓佢背景你就會知得一清…
  • 校服 by 微言
    我對那條藍色裙的認識就只是藍色,及裙,能有什麼改變?可以改動?當然,我相信女生們早已自我分了三、四十派,互相尊重卻各不相讓,守護着自己的傲嬌。老實說,我代表男生們能將她們分為兩派,「短裙」及「一般」兩派。…
歡迎讚好我們的facebook page,免費資訊源源送上。

文章資訊

ID: 197900
Date: 2019-08-08 16:04:53
Generated at: 2019-12-15 21:22:13
Permalink: https://www.vjmedia.com.hk/articles/2019/08/08/197900/論責任-調查警察行爲與調查示威者行爲的分別