【塔羅個案】離地上岸中年人對香港近況睇法:驚,後生唔值得,有錢快啲走

– KEVIN CHENG PHOTOGRAPHY- 發佈於 2019年8月4日星期日

 

同大家分享少少野,或者代表左某一代已上岸嘅成年人對於香港事情嘅睇法。

呢兩日,分別有兩位朋友見到我後,叫我「阿女,唔好著到成身黑色,好易比人打架。」(仲比人叫阿女,好感動)

一位,係同一棟大廈租 Office 做外貿生意嘅叔叔,單身,五十九歲,上海人;每日同我幾乎同一時間返到大廈,同一部 Lift,見左四年,日日打招呼,算係比較熟嘅鄰居。

叔叔話,無諗過自己就黎退休,香港先變成咁樣。對於香港最近發生嘅事,佢形容為「無理取鬧」。

我問「你覺得無理取鬧係邊一方?」

佢話「兩邊都係。差佬唔係路。邊有打細路嘅道理。打份工咪打份工,唔駛下下要人命。我住荃灣,我而家著黑衫出街都唔敢,見到啲兇神惡煞嘅,我望都唔敢望,一陣拎刀出黎捅我,我可以點?報警然後等佢拉我呀?」

「至於啲黑衫嘅,後生細仔,點解要咁搏。搵命搏,值得咩?香港搞成咁又唔係你地做成。快啲讀書搵錢,快啲走,趁行得走得,我呢啲就話無得揀啫。」

我聽完,未及回應,電梯就到左叔叔辦公室嘅樓層。

「阿妹,你去買返幾件花花綠綠嘅衫著啦,啲差佬打人無性架。」

 

-----------------

 

然後,我尋日,又有位熟客黎開牌。呢位熟客,係一位女士,喺我手頭上嘅客黎講,算係比較 Senior 級數,年紀約五十出頭,係一位非常能幹嘅基金顧問。

女士入到黎,「哎呀 Kate 你仲著到成身黑色,小心啲呀,你住邊頭架?有無差佬架?」

我不禁笑,做乜又係講呢句。

女士坐低繼續講,「我唔知自己算唔算黃,但我一定唔係白囉!2019 年,搞到好似 67 暴動咁,我啲外國朋友睇到 BBC 呀,都以為香港淪陷呀,無人敢黎呀。」

我笑,「我都有客要返大陸做野,佢話睇到上面嘅新聞報嘅完全係另一件事,仲話黑衫每日人頭分八千蚊,好好賺添。」我調侃,「我發達都係睇今次呀!」

「唉,我淨係識搵錢,呢幾個月個市唔好,生意黎緊一定會仲差!我唔識政治呀,但係我諗唔明點解政府搞出黎嘅屎,要警察出黎食,要啲後生出黎幫佢執手尾!大學生應該去溝女架嘛!」

畢竟個客黎到係開牌的,唔係黎聽我講耶穌的,所以佢亦都無再討論落去,因為佢仲趕住去見客。

不過,好難得地喺五十歲以上人士,聽到呢方面嘅說話。老實講我聽得出佢地無話幫邊一邊,佢地只係覺得政府搞出黎嘅野,唔應該由其他人去受。

當然,事情發展至此,當然已經唔再係單單一個條例之爭,我地見到嘅係抗爭,其他國家或者維尼政府嘅各個勢力,見到嘅係上位嘅機會。已經唔係三言兩語可以解釋清楚嘅事情。

不過,我都仲係想將呢件事同大家分享,或者可以了解更多離地上岸中年人嘅想法。

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 律師真係好型咩? by 烏龍
    大律師事務律師也是男人,男人的劣根性在法律界也不能免疫。相反,正正因為很多天真嬌對律師趨之若慕,主動獻身亦大不乏人,單是律師這張名片對某些女士來説可能是一卡傍身,世界通行,所以法律界的男人們在女性市場比較吃香,把妹相對容易也是相識吧。事實上…
  • 暫停六合彩,反映馬會進退失據 by 曾慶光
    今次為六合彩四十五年歷史上,因應疫症而暫停攪珠時間最長(超過二百日)的一次,而且有很多人質疑二零零三年「沙士」時無暫停六合彩。馬會早前公佈截至今年六月,上一年度六合彩投注額僅僅過五十億,對比前一年度大跌近四成,少近三十億。…
  • 【遊戲介紹】死又有咩可怕?《Chronos: Before the Ashes》死一次強一次 by 阿九
    2019 年大賣嘅《Remnant: From the Ashes》,大家都應該印象深刻。同樣由 Gunfir […]…
  • 「作為一個女仔識做家務係一件好可恥的事」 by 瓔庭
    「作為一個女仔識做家務係一件好可恥的事,你要同我記住。」細細個便響阿媽度學識呢句說話的Pat一家很完美的實行了這個「理論」,佢係一個十指不沾陽春水的大小姐。家中清潔、煮飯什麼的都是Pat的老竇同阿哥去做。甚至學校有家政堂寧願肥佬都唔肯去做任…
  • TikTok 其實好重要 by 毛言地
    每個社交媒體都會有唔同嘅低能及危險玩意,就好似Facebook早前都有出現藍鯨遊戲,不過「危險」始終唔係Facebook嘅主流,大家上Facebook嘅主因唔會係為咗睇藍鯨遊戲比咩任務你。但TikTok當中低能嘅影片基本上係主流,咩Skul…
歡迎讚好我們的facebook page,免費資訊源源送上。

文章資訊

ID: 197921
Date: 2019-08-09 17:24:23
Generated at: 2020-09-19 14:03:52
Permalink: https://www.vjmedia.com.hk/articles/2019/08/09/197921/【塔羅個案】離地上岸中年人對香港近況睇法:驚