點解要時代革命?——俾個好簡單嘅理由大家

– KEVIN CHENG PHOTOGRAPHY- 發佈於 2019年8月13日星期二

 

時代革命而家越演越烈,但係仲有好多人未慣點解要時代革命,喺度問「唔係五大訴求咩。」然後有好多本土人士走出嚟同大家講其實時代革命係點嚟。但其實好多人聽完都係一頭霧水。

講真,我地呢啲社運老兵梗係知咩叫時代革命,但係面對一個咩都唔知嘅社運新人,同佢講一大輪歷史都無補於事。咁不如由我講一講,點解我地會將成個運動嘅主軸由五大訴求變成時代革命啦。

答案好簡單,就係唔理發生咗咩事,香港嘅社會系統,都需要一場全面嘅革新。

由呢場活動一開始,我地針對要政府撤回逃犯條例修訂,我地Send Email,遊行,做文宣,登廣告,去到衝立法會,換嚟嘅係咩嘅回應?林鄭用文字遊戲撚化大家,警隊打人成性,徇私枉法,黑社會同差佬聯手合昨,仲有好多好多泯滅人性嘅事發生,呢度咁多嘅野,係顯示咗成個社會制度嘅崩壞,而呢種崩壞,係絕對無辦法用五大訴求嚟到修補。因為即使林鄭突然格外「開恩」,答允五大訴求,以呢個咁無恥嘅政府,咁失衡嘅社會制度,衝擊香港核心價值嘅事只會無日無之咁發生。所以,即使我地成功爭取到五大訴求,我地充其量只係贏咗一場戰役,而如果我地置社會系統嘅缺憾不理,以後面對嘅,係無限咁多場戰役。

為咗香港嘅長治久安,我地要先破後立,將呢個咁腐敗嘅社會制度徹底摧毀,建立真正民主,平等嘅社會制度,只有咁樣,香港人先可以贏到呢場戰爭,香港人,先可以重新贏返香港。

呢場戰鬥已經返唔到轉頭,我地唔革命,會對唔住死咗嘅五位義士,更加對唔住已經被捕嘅700名手足。呢場仗輸咗,就代表鐵腕管治成功,中國對香港只會越嚟越強硬,甚至乎將香港變成下一個新疆。到時我地幾和理非都好,都可以比大陸班官判你十碌八碌。我地呢一刻表咗態,之後要清算起嚟,真係可能變咗種族滅絕香港人。

我地已經係懸崖邊,再無退後嘅餘地。我喺度呼籲咁多位,打呢一場革新香港嘅仗。呢場仗雖然難打,但係只要我地手牽手,肩並肩,總有見到希望嘅一刻。

光復香港,時代革命。

 

 

作者:麥精維他奶

麥精維他奶

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198091
Date: 2019-08-15 05:52:46
Generated at: 2019-09-18 10:08:24
Permalink: https://www.vjmedia.com.hk/articles/2019/08/15/198091/點解要時代革命?-俾個好簡單嘅理由大家