敏華冰廳一個品牌,兩種品質?——旺角朗豪坊與荃灣荃錦中心的天堂與地獄

圖:攝於朗豪坊店

 

自從被個哎丫同事帶過我去太子嗰間敏華冰廳,食過個雜扒飯,加紅豆冰,自此就成日食呢個組合。

第一次食太子嗰間,我覺得六十幾七十蚊係值嘅。留意返所謂雜扒,其實只係餐肉、腸仔、豬扒、雞扒各一,六十幾連野飲,特飲加六蚊,話呢個價錢係平都會被人話離地。但乜嘢令我覺得值?係佢真係即刻煎熱所有野俾我!雞扒皮煎乾身脆口,豬扒夠厚有汁唔韌,紅豆冰半杯係豆,今時今日喺香港食野,七十蚊有呢啲,我收貨。

食連鎖野我一直都有個覺悟,同一個brand,未必度度一樣,尤其是呢啲涉及要煮下嘅茶餐廳,無論點QC,都有機會出事。所以喺我真係決定列敏華入去食得嘅表之前,我做多另一個測試,就係食埋朗豪坊分店先。

朗豪坊分店無令我失望,啲扒都係熱嘅,紅豆冰嘅豆都係多。由於我成日出入朗豪坊,一星期總會食一次半次。

可惜嘅係,我發現荃灣荃錦中心新開嗰間,就出曬事。

出事位就係我之前覺得好嘅位。呢間啲扒,凍嘅。話凍又被人話我誤導,大約係室溫囉。室溫扒,喺好多大型連鎖快餐店係常見嘅,其他人食唔食得囉我就唔評論啦,反正我係唔會再幫襯呢啲咁野。

荃錦敏華呢,我俾左一次機會佢。

我琴日咬落塊凍嘅雞扒之後,我做手勢叫疑似餐廳經理嘅姐姐埋來,好細聲咁同佢講,啲扒凍嘅,喺旺角同太子都係熱到辣口。佢好好人,講左幾次唔好意思,幫我換個碟。

可惜嘅係,換出來都係室溫扒。

而我,之後係唔出聲就咁食晒,然後靜靜雞走,有俾錢啦梗係。因為我覺得,嗰下同佢嘈一啲意思都無,出問題一定係廚房。

而今日,我再食多一次,今次係食返朗豪坊分店。啲扒都係熱到辣口。

可能好多讀者會覺得我on9,竟然唔出聲食兩次,來證明我只係喺荃錦嗰間食著伏。但我係一個日日出街食野嘅人,難得搵到間起碼我可以放心認到門口就走入去嘅食肆,我知道係唔容易嘅。

過度擴張,搞唔掂QC,然後名大於實,發生太多了,今次好明顯,個廚房都未訓練好,就要推佢上戰場。室溫扒都拿出來奉客,不如改名做大鳩鑊啦?

我唔希望敏華變左第二間翠華,又本來擺得入口,變到留番餵狗。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198118
Date: 2019-08-15 20:15:38
Generated at: 2019-09-17 20:19:55
Permalink: https://www.vjmedia.com.hk/articles/2019/08/15/198118/敏華冰廳一個品牌,兩種品質?-旺角朗豪坊與