高鐵嫖妓的可行性研究

 

 

先至聲明,我份人左膠底嘅,正所謂笑貧不笑娼,做雞都係出賣努力,勞動係神聖嘅。

同樣,嫖妓都唔係咩大奸大惡,任何人嫖妓,如果有老婆有女友,佢都係只需要同伴侶交代。

根據各方報讀,任職英國大使館嘅港人Simon Cheng 乘坐高鐵返港期間遭中國拘捕,琴日中國當局公布鄭先生涉嫌嫖妓。

 

對上一次叫雞叫到咁多港人關注,我諗都要數到已故民主黨成員何偉途。

佢2004年8月因為喺東莞嫖妓被捕,翌年一月尾先放,當時都幾轟動,中方發放何偉途被斷正嘅床照,佢本人辯稱唔著衫傾計咁話。

當年何偉途叫雞被捕被斷正被影相,我諗一眾男士都會非常警惕嘅係,除左唔好出軌,更加唔好喺大陸出軌,更重要係,要多多運動,當有一日被人捉姦在床嘅時候,影張相都唔好有肥仔波。

 

講遠左。

不過以上案件有一點係緊要嘅,當年都叫做捉姦在床,如果捉到嫖妓,拘捕嘅地點係咪應該喺砲房度呢?

或者你話大陸公安屈佢叫雞都好啦,起碼都要「逼」已故何生除衫坐上張床度同另一個女人影張合照,都叫有誠意。

但係今次阿鄭生,仲可以施施然咁搭高鐵,仲要搭到差唔多到香港,甚至懷疑係喺西九過關嘅時候,先至拘捕佢。

 

我不禁諗嘅係,莫非高鐵先係今次呢單涉嫌嫖妓案嘅案發現場?莫非有中國妓女喺高鐵上面提供性服務?

喺高鐵上面進行穢褻動作,有無發生過呢?我就搵到單咁嘢,最後大陸公安話係父女玩,無犯法。

 

 

公共交通工具嘅座椅,我諗都唔會好似酒店咁換床單,最多咪搵吸塵機吸下就當清潔完,如果高鐵真係一個娼妓營生嘅地方,鐵道部係咪應該戴套?i mean 係為啲座椅罩上可以更換嘅套。

廣告話坐高鐵舒舒服服,莫非呢種舒服真係咁超英趕美?歐洲日本啲鐵路都無呢啲服務架!

 

 

潮流興講輿論戰,而家中方利用整個國家機器,玩到話香港籍英國外交人員叫雞,一箭一次射英國政府、香港青年、同埋之前高調話佢失蹤燒埋去反送中嘅人。

被攻擊嘅一方,如果鄭生返大陸嘅性質係公幹,我期望英國至少要由外交部出面,而相信佢無叫雞嘅人,好應該聯同有頭有面嘅反對派政客同埋佢雇主,兼且好好利用各大反中反共傳媒,高調咁回應:「佢無叫雞」。

呢單野,由中國爆佢大鑊話佢叫雞,已經十幾二十個鐘,究竟有無人當輿論戰係一場仗咁打?佢失蹤嗰陣大家咁高調,又拉到去係乜嘢送中乜嘢一地兩檢,然後發現係桃色嘢,政客就怕事全部收聲?咁不如當初就唔好咁大聲先,秘秘密密咁等佢返出來先講?

而家咁打法,過多大半日,已經唔會再有人理鄭生事實上有無叫雞。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198330
Date: 2019-08-23 06:33:00
Generated at: 2019-09-18 10:10:52
Permalink: https://www.vjmedia.com.hk/articles/2019/08/23/198330/高鐵嫖妓的可行性研究