【外賣仔日記】我送外賣咋,唔係送核彈,唔洗驚呀新嚟嘅保安. . . . . .

 

 

做緊嘅某一區,早排有一個屋苑啱啱啲住客開始收樓入去住,而隔咗一排我都收到第一張送去呢個屋苑嘅單啦。

講下呢個屋苑先,唔係單幢式樓嚟,都有幾幢樓組成,而且住宅大廈下面全部都係商舖,但係下面唔係商場嚟,因為所有商舖入口全部都係由出面條街直接入去嘅,成個屋苑就好似生日蛋糕咁,住戶嘅私人地方就係蛋糕個頂同埋啲蠟燭(蛋糕個頂係住宅花園平台)。

我每次經過呢個屋苑,都淨係留意到啲商舖入口,唔太留意到佢住宅係點入嘅,第一次送去呢個屋苑,我就兜咗個圈都未搵到住宅點入,而嗰個時間係啲下午茶時間,附近嘅人唔多,所以都好難搵到人問。行咗好耐,我連保安都見唔到個。

之後我見到有個門口,唔係入商舖嘅,隔離有個告示寫住「升降機往住宅平台」。當我見到呢個告示個一刻我好感動阿,終於都搵到入口啦。跟住啲指示入到去搭𨋢,去到叫「住宅平台」個一層,一出到𨋢,就見到個有保安嘅保安崗位同埋佢隔離一個要拍住戶證先入到嘅閘阿。咁我就同個保安講話嚟送外賣啦

我:「XX 公司嚟送外賣阿,X座X樓X單位阿」

保安:「我新嚟㗎,唔知要點做」

佢突然咁講,我比佢窒咗窒,因為完全無預期過一個保安會咁樣應返我。

我:「係咪要登記阿?我係咪要俾身份證你?」

保安:「我唔知要點做阿」

咁我係第一次上嚟你哋屋苑,我唔會知你哋要求㗎喎,阿姐你係咪想問返我應該點做?但係你好似係響度做保安㗎喎。

嗰刻我留意到佢保安崗位枱頭有部對講機

我:「不如你用部對講機問下人啦」

跟住佢就攞起咗部對講機,去問下佢啲同事應該點做

保安(對住對講機講)(重要係好驚同埋緊張咁講):「控制室,控制室,呢度有個人話要嚟送外賣呀」

阿姐,想問有咩令到你咁緊張呢?我揸住咗個核彈響你前面?

對講機入面把聲:「你係邊個位置阿?」

保安(對住對講機講):「我唔知阿」(我聽到之後,爭啲嚇到吃手手)

對講機入面把聲:「你係邊個?」

保安(對住對講機講):「我係阿X (佢個名)」

對講機入面把聲:「送外賣唔係呢度入㗎,你叫佢響返下面去翻XXXXX到入啦」

之後我就去到適當嘅地方入到去呢個屋苑嘅住宅入口,俾嗰保安登記我上去啦。

登記嗰陣我問呢個保安

我:「點解頭先另一個保安咁緊張嘅?」

保安:「我都唔知佢緊張啲咩」

阿姐,我揸住個核彈咩,咁驚做乜。

 

專題:【外賣仔日記】

 

 

作者:外賣仔

外賣仔

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 198358
Date: 2019-08-24 06:12:37
Generated at: 2022-08-11 18:42:23
Permalink: https://www.vjmedia.com.hk/articles/2019/08/24/198358/【外賣仔日記】我送外賣咋,唔係送核彈,唔洗驚