港鐵正式升格為黨鐵!全民罷搭贈慶!

(圖片攝於九龍灣港鐵站)

 

香港政府一直係港鐵嘅最大股東。喺過往大大小小嘅集會遊行,港鐵都唔會有任何特別嘅安排去針對集會的群眾,最多只係一啲被動嘅安排,例如:維園大型遊行時,銅鑼灣、天后等站因為人流太多所以列車不停該站、喺港鐵不合作運動時列車不停部分車站、喺警方要求嘅情況下、港鐵不停個別車站……過往呢啲情況,港鐵都係喺狀況已經發生後,先採取被動嘅措施去應對,而大致上都係想維持列車服務嘅正常運作。

但喺一日之內,港鐵向法庭申請禁制令、23/8晚提早關閉葵芳站、以及針對今日觀塘區遊行集會而暫停觀塘線嘅部份服務以及關閉部車站,呢啲都係港鐵主動去採取嘅措施,不單止針對抗爭者以及遊行人士,更加罔顧一般市民大眾嘅乘車需要。尤其是今日觀塘線嘅安排,更加見到港鐵而家已經係將阻礙抗爭者前往遊行集會現場列為佢地首要嘅任務,完全將為普通市民大眾提供正常嘅列車服務嘅責任拋諸腦後。

正如文章開首第一句,香港政府一直係港鐵最大股東,基本上香港政府如果要操控港鐵運作致阻礙香港巿民參與任何反政府的集會,絕不需要等到今日先做。咁點解港鐵嘅態度同打壓示威嘅措施會喺呢兩日之內變得如此強硬呢?我認為係因為中共喉舌《人民日報》喺22/8寫左篇「《人民日報》:港鐵護送「暴徒」免費乘車 揚長而去」指摘港鐵公司喺21/8晚上元朗站嘅集會時不僅拖延報警,事後仲派專車護送示威者離開,令示威者喺破壞後成功離去。

就喺中共施壓之後,港鐵就一改以往被動嘅態度,改為主動採取一系列針對示威遊行嘅強硬措施。如果以今日觀塘區遊行港鐵就停駛油塘站至彩虹站列車,相信明天葵荃青嘅遊行都會有類似嘅安排(開盤估荃灣站停到去到去邊個站),甚至以後嘅示威遊行都會有類似嘅安排,以阻礙示威者前往遊行及集會。

相信黨鐵以後都會全面配合港共同中共政權,所以以後出得黎行街都要預無黨鐵服務;即使退守到地鐵站都唔會安全、因為警察已經可以自出自入地鐵站;示威範圍附近嘅港鐵商場亦都會關閉等等。冇咗呢啲緩衝,相信以後會更加難打。在此要呼籲所有支持今次運動嘅香港人罷搭港鐵以及抵制港鐵旗下所有商場,以抗議黨鐵全面配合中共政府以及港共政府,去打壓香港人喺基本法保障下應有嘅集會自由,致使黨鐵由香港最大型嘅交通工具,變成最大型打壓示威集會自由嘅政治工具。

而家嘅香港絕對係戰爭狀態無誤,但政府卻無恥地一直假意扮吹和風,實際上卻將戰爭嘅火力上調!中共政權以及港共政權將會動用所有佢哋能夠利用嘅資源去打壓呢一次嘅運動,目的就係要喺十月一日—中共國慶70周年之前「止暴制亂」。相信示威者喺短期內會面臨更多嚴峻嘅考驗同前所未有嘅打壓,雖然短期來嘅情況可能會更加差,但我哋絕對唔能夠放棄,因為香港人已經「只有眼前路,沒有身後身。」所以我哋要一直戰鬥落去,直至我地所有人都能夠呼吸着自由嘅氣息、發出勝利嘅歡呼聲為止。

 

作者:何夢

何夢
大學畢業後無業幾年,自稱專業廢青。而家塭到正職,決定疊埋心水全力邁向廢中之路。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198379
Date: 2019-08-24 23:43:17
Generated at: 2020-07-10 10:40:22
Permalink: https://www.vjmedia.com.hk/articles/2019/08/24/198379/港鐵正式升格為黨鐵!全民罷搭贈慶!