認個輸,做港豬,好嗎?——泛民主派與暴徒事實割蓆後的逆權運動

 

呢場所謂嘅逆權運動,我身為一個Day 0 就悲觀嘅人,除左8月5日有一絲快意,到今日都無樂觀過。

我唔算係一個熟讀歷史嘅人,然而我係一個正視歷史嘅人。

八九民運,一場發生喺三十年前嘅群眾運動,係今次反送中引發嘅群眾運動,一個好好嘅參考對照。

同八九民運一樣,官方係充分理解背後嘅社會問題,當時係官倒、官場腐敗,而家係青年生活、就業、前途。官方亦唔會排除,有「境外勢力」「別有用心」咁利用呢啲社會問題,去炒熱成為動搖中共政權嘅事件。所謂大氣候、小氣候,就係講緊呢堆嘢。

八九民運同反送中最值得比對嘅,除左係背景,仲有發展。

到今日好多人講,426社論,將學生運動定性為暴亂,好多人覺得,定唔定性係緊要。我覺得唔緊要,中共要做嘢,係唔需要定性,佢知道actions speak louder than words。比較少人討論,而我覺得參考意義更大嘅,係李鵬5月19日宣布戒嚴之後,中共做左乜嘢部署,然後時局點樣發展。

為爭取各大軍區及地方的支持,並統一各地方黨政領導人的思想,在五月十九日宣佈戒嚴的同一天,「鄧小平起程去武漢召開軍委擴大會議,說是組識第二指揮中心。」

在鄧小平離開北京的幾天時間裡,政府由於未及全面部署,並無堅持落實戒嚴命令,北京局勢十分混亂。直至五月廿三日,政府才採取幾項重要措施穩住陣腳,並開展了解決事件的部署。

1.通令各大軍區及各省市領導人表態

當時中央已派工作組往各地區打招呼,號召他們發表聲明擁護中央戒嚴的決定。五月廿五日前,各省市的黨政領導分別被召到北京,進行個別談話表態,例如當時香港新華社社長許家屯被召往北京見楊尚昆時,楊對許說:「經常委決定,趙紫陽已停職,小平同志講,已經沒有路可退了。才採取戒嚴,動用解放軍平息動亂,希望你理解,支持中央決定。」

2.中央召開軍委緊急擴大會議,由楊尚昆發表重要講話,以統一各軍事領導的思想

楊尚昆在會議上集中批評趙紫陽分裂黨的錯誤,並提出政治局常委會及黨內元老認為不可再退讓的信息。他更強調應該統一步伐,加強控制:

「老幹部要注意,情況不清,不要發表意見,七位老將軍就是來龍去脈不清楚,現在明瞭了,表示要和中央保持一致。」「煽動動亂,報紙的錯誤導向很重要。」「現在各大軍區各大單位我們放心,軍以下不放心,要多做工作。」

3.重新加強輿論控制

撤換同情學生的幹部、廣播員及記者,而被認為保守派的「胡喬木、鄧力群已被聘為中共意識形態領導小組的顧問」,以統一全國思想。

4.撤換領導人

楊尚昆在軍委會議上指出:「中央領導要換人,跟大家打過招呼」,二十六日,姚依林向各部委傳達對趙紫陽事件的處理,彭真召集黨外副委員長開會,稱趙紫陽幹了很多壞事,李先念在政協主席會議上說目前的複雜局面是個別領導造成的。

在上述工作後,黨內強硬派已完成武力清場的部署,數十萬軍隊包圍首都,各省、各大軍區紛紛致電擁護中央,支持和同情學運的幹部已被清洗,傳媒亦被軍隊及公安部門接管,外國記者被驅逐。

引用自:張家敏:《建國以來》

情況有無覺得近來好熟口面?

國泰管理層撤換、地鐵停半條觀塘線阻人遊行、四大會計師事務所與反送中割蓆

 

呢啲就係中共同你打招呼,要你表態。當日要軍隊表態,因為真係要動用軍隊鎮壓,軍隊有異心就比較麻煩;但係今時唔同往日,經濟戰先係主戰場,中共驚你搞罷工,搞到生產力多啲,就要企業表態,只要你仲想喺中國做生意,你就要表態,同暴力割蓆。

 

比較值得仔細觀察嘅,係反對派(泛民主派、飯民,你喜歡點叫都得)呢段日子嘅變化。

612 大規模警民衝突之後,直到71 衝入立法會,再喺8月5日全港大罷工(一日),反對派可能心甘情願可能係形勢所逼,唔重要啦,總之都係一副「與抗爭者同行」嘅態度,呢個態度,至少係配合行動,包括雨傘時候反暴力嘅鼻祖,文化監暴何韻詩喺612 前線張飛式擋警察,71 鄭松泰同示威者一齊入立法會,仲有鄺俊宇數之不盡喺前線浦頭,等等,不能盡錄。

但係之後呢?暴力場面其實無咩減少,但暴力場面中,有反對派頭面人物喺當中,就少左。近日,更加有出現民主黨涂謹申認為警察開槍係啱,戴耀廷認為警察有好人之類嘅言論,都唔好講何韻詩已經沉醉返去畫面好靚盤點緊自己贏幾多萬分。

 

 

的確,近日陳淑莊有陪同女示威者揭發警員性暴力,但其身位只是質疑警方濫權瀆職性暴力,而非「公民黨支持暴力示威」。

 

反對派議員夥同葉劉鍾國斌一齊去美國

 

最近一單嘅消息,令我再強化呢個觀感嘅,係四位反對派議員,竟然夥同葉劉鍾國斌一齊去美國。美國請你六個,你地唔一定要同行,更唔一定要傾計,同一架飛機都可以扮唔識啦,乜唔係勿通匪類咩?呢個唔重要。比較重要嘅,係反對派議員已經同暴徒採取一個完全相反嘅議程。

 

陶傑 Channel:今日塞車聽下電台,點解 Ip Kin Yuen 葉建源…

健吾發佈於 2019年8月27日星期二

 

暴徒係希望焦土,所謂焦土,係包括國際社會特別係美國,會喺中共及香港政府唔肯答應五大訴求嘅時候,願意經濟制裁中國及香港,此之謂攬炒,如果我要燒,你都一齊燒!

但係反對派議員,繼續係強調一國兩制行之有效,希望美國唔會通過呢個《香港人權及民主法案》,繼續俾香港有特殊有別於中國城市嘅經濟待遇。

 

 

我嘅判斷,係反對派喺呢一刻,原因可以好多元,我比較傾向相信,係害怕會喺來緊嘅區議會同埋明年立法會選舉,被取消參選資格,即係簡稱嘅DQ。

中共已經明確表示,反送中運動中嘅暴徒係恐怖主義苗頭,呢個立場係曖昧嘅,反送中運動,唔係全部都係恐怖主義,只係講緊暴徒,而且只係恐怖主義苗頭,唔係直斥恐怖主義,個意思講到尾,你而家行開,唔做暴徒,就可以唔用更高規格去搞你,你行埋去,擁護呢啲嘢,就係擁護恐怖主義。

我嘅判斷,係反對派已經揀左。揀左接受中共嘅統戰。揀左同暴徒割蓆。

 

暴徒應該點做?正如所有先生都叫唔到學生交功課,所有老闆都叫唔到員工準時返工,但佢地都會叫,我都會叫,由80日前開始,我都係悲觀,悲觀嘅係,無論暴徒做出乜嘢犧牲,就算屍橫遍野血流成河,係唔會改變到現狀,因為到咁上下,就會有一班叫做泛民主派嘅人,出來收割選票,然後得到議席,然後出賣香港,再出賣埋你班暴徒嘅血。

我到今日仍然堅持,唔好為香港犧牲,唔值得。有無清算?一定有;有無監控?一定有;會唔會有中港商人被人捉上去屈佢叫雞充公身家?一定有。但受害嘅人自己都唔會去死,你死來做乜嘢?明明反對派又平反六四又剩,最驚係佢地自己,佢地唔會拿自己條命出來抗爭,咪由鳩佢地捉去秦城坐幾年,點解你要出來頂?

百幾年前香港只係個漁村,唔好理香港變成咩,變到點差,其實都係變返以前咁。

認個輸,做港豬,好嗎?留返條命,我地一齊打漁。

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198500
Date: 2019-08-27 23:59:06
Generated at: 2020-10-30 07:16:09
Permalink: https://www.vjmedia.com.hk/articles/2019/08/27/198500/認個輸,做港豬,好嗎?-泛民主派與暴徒事實