【文革再臨】新學年想欺凌警察仔女報仇?我諗真相係警察連同學校管理層清算黃教師

 

Madam份人真係好幽默。 相片來源:TVB新聞截圖

啤兒發佈於 2019年8月31日星期六

 

反送中搞左兩個幾,就快三個月,前線示威者覺得戰場喺街頭,好多人喺街頭被警察濫打濫捕,喺佢地眼中嘅主戰場輸左,轉為諗吓有咩副線,其實都係聰明嘅。

不過有啲人就提倡,喺新學年開始,欺凌或杯葛警察嘅仔女,此之謂禍必及妻兒,務求令警察投鼠忌器咁話?我就唔係咁睇,我認為,新學年最高危嘅,唔係警察仔女,係黃教師。

 

五十幾年前中國發生左單野,叫「文化大革命」。文化大革命嘅本質係乜嘢?

呢度唔講廢話,一般人會講,毛澤東呢個大魔頭動員紅衛兵周圍破壞,只係事實嘅一少部分。

點解紅衛兵會咁無人性?點解紅衛兵會咁恐怖?點解紅衛兵可以證明人地係大右派?

中共建政初年,由於主打係共產主義,所以共產主義中嘅壞份子,就要抽出來打壓,總括來講有大致五種,地主、富農、反革命分子、壞分子、右派,簡稱「地富反壞右」,合稱「黑五類」。相對於黑五類,就有紅五類,工人、貧下中農、革命幹部、革命軍人、革命烈士子女。

紅黑五類,身份係世襲嘅,老豆係富農,仔女被打壓嘅機會就好大,點樣打壓?打打殺殺梗係有,就算唔真係殺,學校教師唔俾你咁高分,搞到你無得升班;去到生產單位,主任俾啲厭惡工作你做;諸如此類。

所以中國社會有好多人,人一生出來就唔知點解好順利,或者好唔順利。

 

建政去到咁上下,就有權力鬥爭。感到自己將會失勢嘅毛澤東,正正就係利用自己嘅立國初年積落黎嘅魅力,同時利用呢個社會上有咁多黑五類嘅怨氣,為左鞏固自己嘅權力,為左繼續享受千萬民簇擁,發動左所謂嘅文革,由中共最高領導人,直接發動社會上本來最無權無勢嘅人,即係年輕人,去幫佢周圍打打殺殺。

問題係,點解啲人會肯咁做?

所謂「擁護毛主席」,只係一句口號。

利用呢句口號,利用一啲隨口UP 又得,羅織得靚少少又得嘅罪名,就可以將曾經唔俾你升班嘅教師,要佢喺你面前下跪,昔日叫你倒屎嘅主任,今日突然間變左大右派,理由可能只係有個遠房親戚喺香港,就可以批鬥為「有國際聯繫」。

欲加之罪,何患無辭,就係咁。文革嘅核心,係人性徹徹底底咁淪喪,將鬥上位,鬥死對方嘅慾望,用「擁護毛主席」去包裝。

 

即將開學,當好多唔鍾意警察嘅人,仲討論緊應唔應該欺凌警察啲仔女報仇,其實呢個話題已經out of scope,真正嘅問題,係政府、學校管理層、警察,會用「防止欺凌警察仔女」為幌子,要教師交待立場,唔交待,或者確認係黃,就話你「縱容黑學生欺凌警察仔女」。

再恐怖啲,學校入面嘅先生會互相篤灰,唔洗理真假,「懷疑隔離位個同事縱容學生變黑」然後向校長舉報,呢啲野將會無日無之。

再再恐怖啲,學生唔鍾意某啲先生,就向教育局舉報佢「喺課堂教學生『時代革命』」。

 

你諗住叫你個仔女唔好同警察仔女玩?我諗就算你個仔女一眼都唔望啲警察仔女,佢地都可以向先生「告發」佢地欺凌。校長、副校長、各主任,會唔會就咁坐喺度?定係為左向「上級」,即係校董會又好教育局又好,為左向佢地交待就交人頭?

九月一日喇,聽日後日可能好多細路仔唔返學,返過學,被人欺凌過嘅人都知道,細路生存力好高,佢地經歷呢啲清算,未必會死好多人。啲先生點算?我唔知喇,我只係評論時事而已。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 律師真係好型咩? by 烏龍
    大律師事務律師也是男人,男人的劣根性在法律界也不能免疫。相反,正正因為很多天真嬌對律師趨之若慕,主動獻身亦大不乏人,單是律師這張名片對某些女士來説可能是一卡傍身,世界通行,所以法律界的男人們在女性市場比較吃香,把妹相對容易也是相識吧。事實上…
  • 暫停六合彩,反映馬會進退失據 by 曾慶光
    今次為六合彩四十五年歷史上,因應疫症而暫停攪珠時間最長(超過二百日)的一次,而且有很多人質疑二零零三年「沙士」時無暫停六合彩。馬會早前公佈截至今年六月,上一年度六合彩投注額僅僅過五十億,對比前一年度大跌近四成,少近三十億。…
  • 【遊戲介紹】死又有咩可怕?《Chronos: Before the Ashes》死一次強一次 by 阿九
    2019 年大賣嘅《Remnant: From the Ashes》,大家都應該印象深刻。同樣由 Gunfir […]…
  • 「作為一個女仔識做家務係一件好可恥的事」 by 瓔庭
    「作為一個女仔識做家務係一件好可恥的事,你要同我記住。」細細個便響阿媽度學識呢句說話的Pat一家很完美的實行了這個「理論」,佢係一個十指不沾陽春水的大小姐。家中清潔、煮飯什麼的都是Pat的老竇同阿哥去做。甚至學校有家政堂寧願肥佬都唔肯去做任…
  • TikTok 其實好重要 by 毛言地
    每個社交媒體都會有唔同嘅低能及危險玩意,就好似Facebook早前都有出現藍鯨遊戲,不過「危險」始終唔係Facebook嘅主流,大家上Facebook嘅主因唔會係為咗睇藍鯨遊戲比咩任務你。但TikTok當中低能嘅影片基本上係主流,咩Skul…
歡迎讚好我們的facebook page,免費資訊源源送上。

文章資訊

ID: 198596
Date: 2019-09-01 06:56:39
Generated at: 2020-09-19 12:59:04
Permalink: https://www.vjmedia.com.hk/articles/2019/09/01/198596/【文革再臨】新學年想欺凌警察仔女報仇?我諗真