與其話對唔住死去嘅手足,不如問下對唔對得住自己先?

 

「1、2、3⋯⋯9。」已經有九位手足先行一步,以死相諫,無法同大家於煲底相見。另外網傳有幾位手足喺831太子「屍殺列車」命喪,未必搵得返,幫唔到佢地討回公道。

早兩日,林奠終於話會撤回條例,吓?做乜嘢突然跪?下一秒係覺得,慳啲喇柒婆,依家點會收貨?如果政府依家話要清算警隊,反而我真喺會諗下想收貨啊。當撤回消息得到證實後,好多人po咗Winter On Fire 嘅截圖,句嘢喺咁:「若我們接受了政府的條件,我們已死去的朋友,是不會原諒我們的。」呢句嘢的確好激勵人心,唔單止喺為咗死去嘅手足,仲有喺為之前受重傷、被性侵、被打同被捕嘅手足,我地更加唔可以就咁妥協。

不過先唔講對唔對得住其他手足先,搞到今時今日呢個地步,我首先會問自己一直以嚟做嘅嘢,究竟對唔對得住自己?

我諗喺呢場運動中,自己嘅參與程度算比較高?(唔敢咁高估自己,覺得自己仲可以做多啲,亦有大把人比我辛苦)雖然身為勇武派真係好憎和理非,但我係大愛到連和理非活動都去齊咁滯。我唔係等集會遊行完先落場打,而係一早去坐同行幾個鐘撐下場,然後先再直落打仗。不過貼連儂牆搞文宣,呢排好興嘅組人鏈,就真喺唔好搞我喇。日常生活中會罷搭黨鐵,改做搭小巴同巴士返工,罷食紅底藍絲舖頭,盡量去黃絲舖頭消費。至於罷工,非常對唔住,我真喺做唔到,教好下一代喺我嘅責任,同時亦培育接班人繼續打長期戰。目前我真喺覺得好攰好辛苦,好想放棄,有幾次想了結埋自己。經常性發夢帶來極嚴重嘅後遺症,依家長期食唔落嘢,痾嘔肚痛,不斷訓下醒下,發惡夢逃亡被打,keep住聽到呯呯聲,手腳拉親撞親。呢種生活持續咗兩個月,真喺生不如死,好想快啲完結。講咗咁多,我諗自己已經夠努力掛?可以做嘅差唔多做齊日曬,甚至身兼多個崗位,算喺對得住自己。

其實喺我未做腥些之前,自問讀大學嗰陣做嘅嘢亦算對得住自己,而現時打嘅工喺對得住下一代,總體而言對社會叫做有有些少貢獻(諗起好快要交稅就好想喊)。腥些讀大學時生活都幾多姿多彩㗎,上過兩年學生會,參與社運幫手助選,一直有返兼職補習,會返教會事奉(識我嘅唔會覺我係耶),讀書有追GPA keep住過3,間中會義教寶寶畫畫,讀咗啲課程進修下之類咁囉(唔好問我啲時間邊度嚟,本身睡眠時間比一般人少,加上鍾意填滿空檔時間)。諗返轉頭真喺幾忙幾chur,加上本人有不良嗜好,所以早就捱壞咗個身體。我本身喺一個對自己要求好高嘅人嚟,成日強逼自己做超多嘢,唔鍾意停落嚟抖,一停就會覺得好廢咁,又會對人要求高,同我一齊嘅人好易有壓力。

身為發夢常客,近排自責mode亦愈嚟愈嚴重,眼見住更多手足喺身邊落單,自己又好廢唔夠揪(恨自己女兒身),好無用救唔到佢地,我真喺成日頂唔緊喊咗出嚟,覺得自己好對唔住呢啲手足。所以你話對唔對得住死去嘅手足,以及其他受傷落單嘅手足,我只會覺得好對唔住,亦答唔到點先會對得住。

唯有盡力做,至少都叫對得起自己。

 

 

作者:圓碌碌腥些

圓碌碌腥些
人如其名圓碌碌(其實我真係唔肥),正職是誤人子弟,兼職是廢青暴徒

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198732
Date: 2019-09-06 15:12:43
Generated at: 2019-09-17 21:21:44
Permalink: https://www.vjmedia.com.hk/articles/2019/09/06/198732/與其話對唔住死去嘅手足,不如問下對唔對得住自