Client 問我點解自己係「仆街磁石」(上)

 

 

Louisa(化名)係我Client,佢拍過好多次拖,最長嗰次last咗一年,其他嘅戀情大部份都係得幾個月貨仔。佢不乏追求者,雖然佢25歲,但佢性格成個小朋友咁,外貌都幾可愛。所以每次佢轉工、參加興趣班⋯⋯都會吸引到一堆狂蜂浪蝶。

佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。

佢本身有焦慮癥狀,於是嚟搵我做治療。Louisa上個星期分咗手,剛剛回復單身,佢嘅情緒波動當然比平時大,佢今次一見到我,就同我講佢嘅感情煩惱––唔係講佢分咗手有幾掛住佢前男友,而係講:依家有幾個男仔追佢,但佢諗緊同邊個一齊好。

追佢嘅男仔有三個,三個都係網上識番嚟,最長嗰個都只係識咗幾星期⋯⋯

「我唔知揀邊個好呀,三個我都幾鍾意⋯⋯」Louisa講。我又開始有啲擔心,以Louisa講比我聽嘅嘢,佢之前啲男友都對佢唔係幾好,甚至有男仔試過郁手⋯⋯雖然前一個男朋友都唔算對佢好,但起碼都唔會打佢鬧佢。

「你對佢哋分別有咩感覺呀?」我問,順便試探吓佢對嗰幾個男仔嘅了解。

「差唔多啦⋯⋯無乜特別呀⋯⋯其實都係各自見過一次咋每個。」Louisa講。

Louisa講完,我更加擔心。

「你想像你對手變成好重好重嘅濕毛巾,依家我每數一聲,濕毛巾就變得愈嚟愈重。」開始進行催眠治療,我嘗試帶佢進入催眠狀態。

「依家你喺一個好靜嘅地方,你好放鬆、好舒服⋯⋯你試吓話比我知,你見到啲咩?」我問。

「我見到Ivan(Louisa個前男友),佢話我成日喊,好煩⋯⋯然後就一吓推開我⋯⋯」Louisa一度講,一路係咁流眼淚。

「你依家唔再係嗰個Louisa。你喺Louisa個身度跳咗出嚟,你依家去咗另一個地方,離遠咁望住當時嘅Louisa,你有咩感覺?」我問。

Louisa無講嘢,只係係咁喊。

「慢慢嚟⋯⋯」我講。

「我覺得佢好孤獨。」Louisa突然講。

「只不過係唔想自己一個,但個個人都會走⋯⋯」Louisa喊住講。

「你望住佢,但你已經唔係嗰個Louisa。你唔再係嗰個孤獨嘅你,依家嘅你有好多好多嘅安全感,你會生活得更加開心、更加安全,更加識得愛自己⋯⋯」我講。

Louisa哭成淚人。
「你可唔可以承諾嗰個Louisa,更加信任自己?」我繼續講。

Louisa點點頭,「嗯」咗一聲。

有時候,我哋係一個困境入面出唔到嚟,係因為呢個困境本身就係一個惡性循環,加深我哋嘅困境。Louisa唔夠安全感,於是就好急搵一個依靠,有時甚至未了解對方係咩人就決定同對方一齊,於是就受更重嘅傷,更加無安全感,然後無限loop。

完咗治療之後,我同Louisa講:「用多啲時間同嗰幾個男仔相處吓,了解完再一齊都未遲呀。」

雖然佢都係好急搵安全感,好想搵個依靠,但佢應承咗我,會嘗試一吓更加愛自己,試吓做自己嘅安全感來源,不過佢話,佢都依然係好不安,好緊張,好焦慮⋯⋯(待續)

 

Client 問我點解自己係「仆街磁石」(下)

 

*根據臨床催眠治療師之保密原則,文章中沒有披露任何個案的個人資料,個案亦經一定程度修改。

*插圖與人物完全無關

 

作者:Professor Chan

Professor Chan
90後土生土長香港人。精神健康導師,臨床催眠治療師,NLP高級執行師,中文冥想應用程式創辦人。遠赴台灣參加發呆比賽,勝出後獲得「發呆王」稱號,希望更多人可以關注精神健康~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198782
Date: 2019-09-08 07:16:54
Generated at: 2019-09-18 10:04:33
Permalink: https://www.vjmedia.com.hk/articles/2019/09/08/198782/client-問我點解自己係「仆街磁石」(上)