冇政治嘅話,香港足球咩都唔係

 

喺好多人心目中,冇政治嘅話,香港足球咩都唔係。如果唔係政治,今晚對伊朗呢場波有冇8千人入場都係問題;但因為政治,身邊所有人都叫你入場支持香港。

記得香港足球上一波高潮就係18年世界盃外圍賽。4年前,當時我哋抽中同中國一組,然後中國足協整咗一張諷刺香港隊多入籍兵嘅海報,指我哋係「有層次的球隊」。一石激起千層浪,好多香港人都因為呢一張海報影響,忽然入場撐香港隊,尤其是兩對中國隊嗰陣,變成咗全城大事咁。

過咗呢段高潮,大家又知唔知呢段時間香港足球發生咗咩事?上年,香港隊經歷咗長達9個月無正式教練嘅時光,期間球隊有近半年一場波都冇踢過。好喇,搵到個主教練,點知教咗短短三個月就辭工走人。然後,又走返入個循環到,又再一次好耐都冇教練,又再一次好耐都冇比賽。今次香港用4個月搵到新教練,而香港又要事隔7個月先有比賽。不過上任之後頭兩場比賽,一場輸畀台灣,一場同柬埔寨打和。

對我嚟講,呢股大家又叫人入場支持港隊嘅熱潮亦都好似香港隊個loop咁,又再重演一次四年前發生嘅事咁。

簡單嚟講,香港足球有人留意,有人care,從來都唔係因為比賽內容,從來都只係比賽過程中會發生嘅事。例如開波之前會做啲咩、例如播國歌嗰陣有冇人嘘、例如幾多分鐘會做啲咩行動,完咗場有咩事發生等等。普通人想知入場班友噓成點,個啲所謂行動有幾多人和應、而各大傳媒亦都係等緊呢啲畫面呃click rate,足總同搞政治班友亦都等緊你哋嘅行動,可以點樣喺中間抽政治油水。場波幾比幾,啲人踢成點,對未來嘅啟示係咩,無人想知。

如果有睇開香港波嘅人,應該都會知有個痴線佬叫「13哥」,佢喺痴線到會搵蒙古聯賽,或者東帝汶波嚟睇然後喺面書寫一大段嘢嗰種痴線。佢曾經指出過香港人點解對香港隊咁冇感情,咁無歸屬感,大概係因為香港人唔覺得自己係一個民族,無一個國族身份覺得代表隊係代表緊自己。講渣,其實東南亞好多國家嘅足球水平仍然比我哋低,但人哋對於國家隊嘅熱愛程度係我哋無辦法了解到。或者,因為人哋係一個國家,而我哋唔係。

今晚場波會好多人入場,樂觀啲嘅話可能連大球場都坐得滿都唔出奇。我亦唔係好介意大家因為各種政治原因而畀180蚊入場,反正足球場本來就係一個滋養民族認同同埋愛國心嘅地方,呢啲嘢無辦法同運動本身分割。我只係期待呢4年過去,香港足球因為反送中呢場政治運動再迎嚟一個高潮,我哋可以點樣令香港足球唔變成用完即棄嘅condom,而可以將呢種愛延續落去,而唔係又要等呢一個政治運動,又或者另一啲爭議事件是令大家記起香港隊又有比賽。

冇政治嘅話,香港足球咩都唔係。但我希望今次之後唔係,願榮光歸香港,亦歸香港隊。

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

  • 【PR】開放世界獸人 x 功夫動作 RPG《BIOMUTANT》今月推出多平台對應 by VJGamer
      Epicsoft(Hong Kong)Limited 今日宣佈,由 Experiment 101 […]…
  • 正常生活 by 健吾
    當我看到新聞評論,大家都在一面倒的討論感染者的「私德」不檢,導致大家連假都沒了。這樣子的狀況,似曾相識。就好像是,當愛滋病流行之時,「普通人」、「未感染者」把所有同性戀者的性慾當成是罪,只要你有「性行為」,你就是錯。…
  • 《無限斜棟有限公司》的政治意味 by Terence Yun
    除了三人家庭背景在暗示著一些政治符號外,其實這個三角戀也是一種暗示,盧慧敏周璇兩人之間,兩位男方常強調要求盧決定選擇其中一個,但盧知道兩人都是她的所愛,不能沒有任何一個,不可以失去其中一個,所以盧非常強調不願意選,不想選擇,她只想唯持現狀,…
  • 梅艷芳與姜濤——看一個時代的轉變 by Terence Yun
    香港娛樂產業一如早前提及是需要投資,不能短視,長線投放資源,才能培養一代藝人…
  • 葉劉請你遠離Mirror by Terence Yun
    政客向來都是嗜血的動物,見到一些市場上有價值的,便會撲過去拿著數,Mirror近期火紅,政客們也不忙關顧一下。有人提議姜B打針以鼓勵年青人打針便是例子,而花姐亦很懂技術推卻,可見她是一個高手。建制政客也不會執輸,葉劉淑儀建議Mirror同E…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
歡迎讚好我們的facebook page,免費資訊源源送上。

文章資訊

ID: 198842
Date: 2019-09-10 07:23:47
Generated at: 2021-05-15 17:09:58
Permalink: https://www.vjmedia.com.hk/articles/2019/09/10/198842/冇政治嘅話,香港足球咩都唔係