好打耳嘅秘書——羊小姐

(圖文不符)

 

今日講講老闆秘書 ~ 羊小姐。

羊小姐細細粒,小鳥依人,聽聞有人話佢似台灣版流星花園裡面個杉菜。

羊小姐喜歡著 deep V 裙仔,加上說話陰聲細氣,就連出名公正嚴明嘅 GM 都會因為佢嬌滴滴的一句「唔該你做好人啦」而低頭。

有次開完會,大家未散哂,圍埋食餅飲茶,突然 Marketing Rebecca 行去羊小姐身邊。。。

Rebecca:「羊小姐,上次 farewell Andrew 餐飯 $200 你唔記得比呀。」

羊小姐(高八度嗲精上身):「Oh really?Boss,可唔可以借 $200 比我?」

二話不說,我哋偉大嘅 Boss 就喺自己銀包攞咗 $200 出嚟遞比羊小姐。

羊小姐(面向 Rebecca):「Sorry for belated,還返 $200 比你。」

羊小姐(再次高八度面向老闆):「Boss 呀,你兩張 100 蚊紙喺 Rebecca 度,你自己追佢還喇。」

Rebecca 同我哋幾個 O 哂嘴,大家你眼望我眼,唔知講咩好!

曾經 GM 講過,所有會議記錄要開完會三日內寫好,有次 sales meeting 過咗一個禮拜,羊小姐都未寫好會議記錄,全公司五分一同事親眼望住羊小姐著住高踭鞋,加條鮮黃色露膊短裙仔,未行到 GM 房門口已經高八度叫:「陳總呀~呢個星期我都好忙呀~」

大家喺玻璃房門望入去,見到羊小姐手㬹撐喺枱上、雙手托住腮、淚眼汪汪望住 GD 不停咁講嘢,而平時唔多笑嘅 GD,此時此刻嘴角向上(向上嘅弧度直情可以將兩邊嘴角掛上左右兩邊耳仔),一直點頭。隔多陣,羊小姐開門行出嚟,甜到漏咁講:「陳總你太好人喇。知道嗎?你是最好的!份 minutes 我月尾前交比你喇~」

呢一刻,我相信全公司五分一同事個心都係諗緊同一樣嘢:「咁都得?仲有兩星期先月尾喎!」

另外一次,老闆生日,羊小姐買咗個 Haagen-Dazs 蛋糕比老闆,羊小姐將食淨半個雪糕蛋糕擺入冰格。到第二朝突然聽到有同事大叫:「邊 L 個將我盒雪糕擺咗落下面?」

羊小姐(可憐樣):「唔關我事喎,我淨係擺嘢入冰格,無攞過嘢出嚟喎。」

同事:「冰格只有半個雪糕蛋糕,唔係你係邊個?」

羊小姐(開始反白眼):「如果你要我硬食,我買返比你囉!」

轉頭老闆返到,羊小姐即刻吳若希上身,扮萌高八度怪叫:「Boss 呀~我又要駛錢喇~」

老闆(有點無奈苦笑):「又要買咩?」

羊小姐(繼續吳若希上身):「噚日先買完蛋糕,今日又要買雪糕呀~」

又係二話不說,老闆就遞上自己張八達通。

之前同舊同事食飯,講開羊小姐啲經典嘢,舊同事八咗啲嘢比我哋聽,有次老闆唔舒服,羊小姐喺好多同事面前同老闆講:Boss,我求下你啦,你對自己健康上心啲啦,我求下你長命啲啦!(然後羊小姐每隔四個鐘就打比老闆提佢食藥,放工放假都唔例外。)

有次睇電視見到吳若希,我問身邊智者:男人係唔係都喜歡「好打耳」嘅女人㗎,to make my life easier,我駛唔駛「打耳」下?

智者:Don’t strive to be CUTE, it’s a word for pets. Strive to be CLASSY, that’s the word for you.

 

 

作者:沒有句號

沒有句號
在職媽媽,出來社會工作超過20年,見證了人性的可愛與可恨,很想把這些故事寫下來。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198886
Date: 2019-09-13 05:46:57
Generated at: 2019-10-16 19:03:54
Permalink: https://www.vjmedia.com.hk/articles/2019/09/13/198886/好打耳嘅秘書-羊小姐