返工時間用黎上堂,爽爆欸~

 

 

小編耐不耐就會俾公司派出去上下堂,聽下 Seminar。對於哩類活動,小編當然係無任歡迎,可以唔駛喺公司對住腦細,出去唞下氣,舒服過喺公司多多數。話說有一日小編出咗去上一個關於勞工法例嘅堂,到小休嘅時候悶悶地,於是乎咪同其他同學仔吹下水。坐喺小編隔離嘅,係幾個睇落個樣都好後生下嘅同學,睇落似岩岩出黎做野無幾耐。(隔離位咁年輕,突然有少少返返去校園時代嘅感覺……)

傾咗一陣,有人問小編點解出黎上堂,小編好正路咁答:「公司派我出黎囉,你哋呢?」

正當小編以為大部分人都係因為類似嘅原因,而萍水相逢地喺到相遇,點知哩幾個後生仔女嘅答案好出乎意料:「我哋幾個都係喺同一間公司做,返咗一排覺得公司實在好唔掂,於是咪約埋一齊請假,自己俾錢出黎上堂學下野囉,睇下搵唔搵到位告公司!」

聽完之後小編真係有啲冷汗直流,因為小編嗰下真係有啲佩服佢哋,亦為自己以前嘅愚蠢汗顏,因為小編覺得佢哋嘅人生態度都好積極,出錢又出時間去搵方法解決問題,解決社會上嘅腫瘤。雖然未必係最好嘅辦法,但至少可以令自己數下 123 長知識,同時又可以為下一份工鋪路;如果公司真係犯咗法,又可以造福其他同事,俾著小編好似佢哋哩個年紀,而又唔滿意公司或者覺得公司有啲地方做錯咗,可能都只會黑口黑面死忍,又或者一放工就咒怨上身,周圍同人訴苦,可能會隨住時間嘅過去,就好似骨質咁慢慢流走,而且仲會越黎越差。

可能佢哋最後都係過多幾個月就會離開依家間公司,但老套啲講句,學咗嘅野永遠都係屬於自己,唔會蝕底,啲知識今日無用,遲啲去到第二間公司都可能用得著,正所謂台上一分鐘,台下十年功,實力唔係得個講字,仲係需要落下苦功。

P.S. 點解喺同一間公司做,會批假俾哂佢哋?唔同部門嘅同事都想搞掂間公司,咁間公司又真係幾唔掂下。 XD

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 198903
Date: 2019-09-14 07:02:39
Generated at: 2020-02-21 23:02:02
Permalink: https://www.vjmedia.com.hk/articles/2019/09/14/198903/返工時間用黎上堂,爽爆欸~