製造暴力流血畫面,令國際社會圍堵中國的可行性研究

 

#freehk

cls!(個小朋友被黑警夾硬撞左落石仔度,仲要撞多幾下,再迎面噴椒。全程直播住架)

潘小濤發佈於 2019年9月15日星期日

 

究竟衝擊警察,或引警察打到自己頭破血流,與反送中有咩直接關係?我諗有唔少人都好費解。

如果話全民大罷工,係可以癱瘓社會運作,逼使政權回應政治訴求,呢個我諗大家就算唔同意,都至少明白個原理。

但係送個頭俾警察打,打到啲頭髮濕到琳曬,全部都係血,咁香港交易所會暫停交易?定係N 號貨櫃碼頭都全部落唔到貨?定係機場跑道變左薯仔田飛機升降唔到?

諗到呢度,講道路講邏輯嘅話,係會成個腦停左,HANG 曬機,百思不得其解:「自己走去被警察打,係會爭取到政權俾啲乜嘢你?」

 

而家嘅警民衝突,背後有一個鮮有人願意正視嘅操作:製造流血場面,令國際社會圍堵中國。

呢度唔係要同你講應唔應該,反正每個人心目中都有應唔應該。呢度只係分析一下,咁樣嘅操作,有無先例,面對中共,靠歐美國家,大唔大機會成功。

近代史上係出現過國際社會制裁中國。

八九民運六四鎮壓之後,中華人民共和國被歐美經濟及軍事制裁。

經濟制裁有人話兩年就完,我諗一個更重要嘅分水嶺,就係2001年中國加入世界貿易組織。

歐美嘅軍事制裁就延續到今日。所謂嘅軍事制裁,就係美國同埋歐盟唔賣武器俾中國。

 

早幾年,有個概念好潮,叫做「全球化」,意思即係,唔好將全球國際社會一個一個國家咁割裂生存,而係彼此發揮自己嘅特長,取長補短,互相喺農業工業商業合作交易咁話。

但係一個香港都有中環同天水圍,都有貧富懸殊,都有啲工種特別優越,有啲工種賤過老鼠,咁邊個決定咩國家嘅人可以享受更多?Well~呢個大家有目共睹。

中國咁多窮人,人力咁平,發達國家例如歐美都鍾意買中國生產嘅商品,用廉價嘅勞動力生產嘅商品價格低,賣返俾本國人,賺到笑,喺呢個咁大嘅誘因之下,歐美國家睇錢份上,點會同中共作對?

八九六四係令所謂嘅制裁出現過,但無嘢緊要過商業利益。

近年,美國自從特朗普上台,佢話要重振美國,Make America Great Again(MAGA),呢個again 先係可圈可點,乜美國有衰落過?

個衰落,我諗係講緊,美國嘅工業製造業大規模咁被廉價勞動力取代,搞到美國人自己都無工開。

特朗普要同中國打貿易戰,其實中心得一樣嘢:想將工業重新集中美國,將職位留返俾美國人,商品要更多係made in USA。

而佢口頭上最大嘅障礙就係中國。

呢個可以話係,反全球化,反無關稅貿易嘅轉捩點,呢個變化,係進行中。

 

上面打左幾百字,為咩?

歐美同唔同中國做生意,從來係睇錢,睇有無著數,睇對自己嘅管治有無利,睇自己有無選票。

特朗普早排先對住鏡頭講:「我係美國總統!唔係世界總統!」全場掌聲雷動。

 

America First

I was elected President of the United States. I am not President of the World!

Donald J. Trump 發佈於 2019年8月16日星期五

 

中國有幾多人權問題,新疆困幾多人入集中營,地震豆腐渣工程榻樓砸死幾多人,呢啲全部,都唔係歐美考慮同唔同中國做生意嘅原因。

歐美商人都係商人,商人永遠係睇有無盈利。

就算係六四嗰種嘅屠城(支聯會用語),究竟令幾多歐美人士自此made in china 就不了?多嘅話中國嘅經濟規模就唔會係今日咁大。

 

返番去香港,可能歐美會有人希望,有一啲流血場面,可以令自己國家嘅人,俾壓力國會議員,通過一啲令中國經濟有威脅嘅法案。不過so far,除左美國嗰個香港關係法之外,我都唔知有啲咩。都唔好講,嗰個香港關係法,其實只係講緊,美國會定期重新檢視係咪視香港同中國唔同咁去經商,通過左係咪花旗銀行立即撤資?我唔識講,不過係又點?香港無匯豐?

至於歐洲?英國從來都係講就兇狠,又話乜嘢第二國民,倫敦啲華為你拆曬先講。梗係唔會啦。

歐美國家有乜嘢國際關係政策考慮,係真正建基於所謂嘅人權?如果有嘅話,會唔會係跨國石油公司、跨國農業公司喺第三世界嘅暴行首先被清算呢?唔好講咁虛,阿馬遜森林大火,當地原住民被巴西政府暴力收地又有邊個理?NGO 囉。不過NGO 都唔理香港。

 

每個人都有權決定自己條命點用,可能有啲人以為自己咁樣被人影到被警察打到流血,係會令國際社會理會香港民主化。

呢啲暴力流血場面,除左令自己流血,令愛自己嘅人流淚,之外,我諗各位烈士唔好打太多飛機,歐美要唔同中國做生意,佢自己會決定,唔洗你流血,你流唔流血,完全係不相干,關人撚事。

有一個類比比較簡單:西藏人以前好多自焚,身為香港人你,會唔會理西藏獨立?

究竟十月一日國慶之前,仲有幾多暴力流血場面?仲有幾多人幻想歐美嘅介入(如有)係關自己事?仲有幾多人送死?我唔敢估。

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199130
Date: 2019-09-17 07:15:41
Generated at: 2020-10-24 11:27:11
Permalink: https://www.vjmedia.com.hk/articles/2019/09/17/199130/製造暴力流血畫面,令國際社會圍堵中國的可行性