點解依加豬排都變女神？

話說最近同個客傾個廣告，賣女性用品，個客就話想搵個女神type但又特別嘅KOL幫手宣傳。咁都好正常丫，點知sell咗十幾個，都話「個形象唔夠正面」、「同件product唔係好夾」，於是就直接問佢其實有冇咩心水，佢竟然同我講：

「好似渡邊直美咁，又正面，又有自信」

喂大佬？我有冇聽錯呀？！渡邊直美喎？！你唔好咁痴線啦？！女神type喎？

個客見我呆咗，佢就自己繼續講：「有冇聽過欣宜首《女神》呀？依加時代唔同咗嫁喇！觀眾已經睇厭咗嗰啲眼大大嘅女仔，依加抖音求其開個美顏個個都一樣樣，係呢啲自信美先可以突圍而出嫁！」

喂你班女人自己自HIGH都算啦，可唔可以諗下我地班男人嘅感受呀？講哂女神咁然後嚟個渡邊直美，真係要求心理陰影面積。

利伸翻先，我對渡邊直美係唔反感嘅。好似之前佢幫Gucci代言，嚇到班鬼佬鬼婆又話要罷買、又話好嘔心咁，佢本尊回應：「我以為這是個各種體型都能享受時尚的超棒時代，沒想到我的照片在GUCCI的IG引發世界大罵戰。大家都對我的魅力感到驚訝吧？我只出了2%功力，就已經迷倒大家。接下來還有更多感受我的魅力的機會喔！」真心好型好有智慧。

除咗渡邊直美，仲有另一個令我覺得好震撼嘅「亞洲女神」（個名唔係我作），佢叫Happy Polla（基本上係一個唔著衫或者著好少衫嘅大肥佬擺埋哂啲AV女優咁嘅pose影寫真）。老實講，我到依加都唔肯相信佢係女人，如果佢係女人，咁之前話大陸男扮女嗰四個運動員都應該真係女人。唔係講笑，呢個Happy Polla Facebook Page有成120萬人like，係120萬呀！五月天Facebook都係得88萬人like咋！ 根據佢之前嘅訪問，其實都係話要自信欣賞自己嘅美，希望將勇敢、希望同歡笑帶俾世界。我以前成日都覺得啲人話「女人最緊要有內在美同自信」真係好假，但睇住Happy Polla嘅Facebook好多人留言多謝佢帶咁多歡樂俾大家，我突然覺得時代可能真係唔同咗。

睇番渡邊直美同Happy Polla，都係曾經好自卑，之後搵到真正嘅自己，並且無懼世人眼光勇於表現出嚟，捱得過就變成今時今日嘅「女神」。不過一單還一單，「美」嘅定義其實好廣，可以係「美麗」，亦都可以係「美好」、「完美」。呢排喺港鐵站，見到Dove個廣告話「美不只一種」，又搵咗十幾個素人做主角，雖然唔係standard 靚女model，但亦無違和。其中最深刻係一個抱住貓嘅婆婆，覺得佢老得嚟好型又幾可愛，散發住一種令人舒服嘅美好。

或者時代真係唔同咗，大眾嘅審美觀唔再淨係留意外表，渡邊直美又好、Happy Polla又好、Dove嘅貓婆婆都好，雖然我都仲係接受唔到叫佢地做女神，但都無可否認佢地真係散發住另一種唔同嘅光芒。

作者：喺港島趕到講稿

每天在港島趕講稿的廣告人，客戶比筆名更討厭

閱讀後覺得好，請多多讚好及分享～：）