男Client 話佢無拍過拖,係因為所有女人都貪錢同貪靚仔(上)

 

 

Kenta係我幾年前嘅Client。

「好多女人我都睇唔上眼。」我仲記得佢第一次見我嘅時候,佢個樣不以為然咁講咗呢句。雖然佢講到好似情場老手咁,但佢同我講佢無拍過拖。

Kenta長期處於一個好矛盾嘅狀態,佢嚟搵我係因為佢情緒受困擾,而主要嘅原因係佢覺得自己無價值,好自卑,亦唔覺得自己會變好。有時佢會問,點解個天咁唔公平,點解有啲人一出世就又靚仔高大又有錢,點解自己好似得一手爛牌⋯⋯

另一方面,佢又非常自大。

「公司呀Mary好似對我有啲意思,但佢個樣唔靚都算⋯⋯應該係話below average。」Kenta講,表情有一絲嘅厭惡。佢係外貌協會會長,對女仔嘅外貌總係評頭品足。

「哦,你識咗佢好耐?」我問。

「講過兩句嘢⋯⋯但佢好似成日偷偷望住我。」Kenta講。

「唉,所有女人都係貪錢,再唔係就貪靚仔,拍拖嚟做咩丫。」Kenta不屑咁講,佢對女性生物有種怨恨。

心理學入面有樣嘢叫Defense Mechanism(心理防禦機制),就係講我哋面對一啲我哋唔想要嘅負面情緒/想法嘅時候,用唔同嘅方法去令自己好過少少,其中常見嘅有repression(壓抑)––將唔開心嘅嘢壓抑去潛意識入面,壓抑到自己都唔覺自己有唔開心過。sublimation(昇華)––將唔開心嘅力量轉化成為努力向上嘅動力,例如一個失戀嘅人,為咗忘記傷痛,努力喺工作上獲得更多嘅成就。

Reaction Formation就係指當一個人用相反嘅行為去掩飾一啲作自己接受唔到嘅情緒或者行為⋯⋯

例如一個好自卑嘅人,可能會表現得好自大嚟掩飾自己嘅自卑,唔止係呃人,係呃埋佢自己。

當進入催眠狀態嘅時候,我哋可以見到我哋嘅潛意識––就係我哋更加「真」嘅部分。有啲人可能會見到個影像,有啲人可能會聽到聲音,有啲人會感受到難以言喻嘅感覺,呢啲就係我哋心底最深處嘅恐懼、情緒、想法。

「我見到一個男仔,佢背對住我,個背影好唔開心。」Kenta依照我指示進入催眠狀態,佢潛意識係一個影像,一個唔開心嘅男仔背影。講到呢度,雖然佢合埋咗眼,但我見到佢緊皺眉頭。

「你睇真啲,你識唔識嗰個人?」我問。

「我唔識,但我覺得佢同我細個好似。」佢講。

「佢旁邊有啲同學,但無乜人肯同佢玩。因為佢嘅樣貌,因為佢屋企窮。」佢講,佢深信同學唔同佢玩係因為佢嘅外表,同佢嘅家境。

上一篇文我哋講到,好多時候心理問題嘅根源,係一個惡性循環。

Kenta對女性成日評頭品足,但佢好少同女仔講嘢,亦唔會主動同女仔講嘢,佢話係因為佢覺得大部分女人都係壞人。如果Kenta係因為自己嘅家境同外貌而覺得自卑嘅,佢嘅自卑只會令佢更加唔識同人社交,成為一個無朋友無戀愛經驗嘅人。然後,再令佢更加確信「我咁差,無人會鍾意我」同「所有女人都係因為我外貌同家境而唔理我,全部都係雞!」。

理性同佢講叫佢改變性格唔會係一個好方法,但令到佢嘅潛意識增強自信,佢嘅性格同社交能力就自然會變好。

「想像你人生最有自信嘅一刻,你覺得自己做得好好,充滿能量。你搵到呢個畫面之後,你留
意吓你當時嘅表情⋯⋯你留意吓你當時著咩色嘅衫⋯⋯你留意吓個環境⋯⋯如果你清楚見到呢個畫面,可以點點頭比我知道。」我同佢講。

Kenta點點頭。

「依家想像呢種感覺變成一團光,你見到呢團光慢慢進入你嘅身體,令你覺得更加有力量⋯⋯」我同佢講。

幫佢增強自信嘅方法當然唔只一種,同佢傾計嘅時候發現佢有好多非理性信念(irrational beliefs),例如「非黑即白」咁覺得一個人唔表現得唔係特別鍾意佢,就一定係唔鍾意佢。用咗一段時間,慢慢糾正佢嘅想法,增強佢嘅自信,Kenta講嘅嘢好似開始有唔同。

 

男Client 話佢無拍過拖,係因為所有女人都貪錢同貪靚仔(下)

 

*根據臨床催眠治療師之保密原則,文章中沒有披露任何個案的個人資料,個案亦經一定程度修改。

*插圖與人物完全無關

 

 

作者:Professor Chan

Professor Chan
90後土生土長香港人。精神健康導師,臨床催眠治療師,NLP高級執行師,中文冥想應用程式創辦人。遠赴台灣參加發呆比賽,勝出後獲得「發呆王」稱號,希望更多人可以關注精神健康~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199176
Date: 2019-09-18 07:13:04
Generated at: 2019-10-20 23:27:55
Permalink: https://www.vjmedia.com.hk/articles/2019/09/18/199176/男client-話佢無拍過拖,係因為所有女人都貪錢同貪靚