男Client 話佢無拍過拖,係因為好多女人佢都睇唔上眼(下)

男Client話佢無拍過拖,係因為好多女人佢都睇唔上眼(上)

 

見咗Kenta一段時間,我做埋佢戀愛關係顧問。有時好多人可能會以為自己一直無拖拍,係因為自己外貌唔夠好啦、唔夠有錢啦、唔夠高啦⋯⋯但好多時候問題係出喺性格。

無論你覺得自己條件有幾差,只要你個人夠自信,夠主動,有個人魅力嘅話,都依然可以表現得好吸引。一個唔係好靚仔嘅男仔,如果佢同人嘅交流正正常常,又喺某一方面好有才華同熱情––例如佢好鍾意玩音樂,會不斷咁尋求進步,然後對音樂充滿熱情⋯⋯佢玩音樂嗰陣個樣都可以好吸引!

每個人都有唔同嘅個人特色,有啲人無咩嘢特別擅長,但佢對人好細心體貼,都可以係一個賣點。Kenta因為自卑而經常表現得好自大,一開口就批評人哋,咁自然會嚇走人啦。

見咗佢一排,佢自信心強番啲,終於可以正正常常咁同人溝通,同埋唔會一嚟就批評嗰啲女仔唔夠靚,一嚟就話睇唔上眼。但係,自卑可以引致好多問題,其中一個就係極度缺乏安全感。當你無安全感,你就會無意中要求同你相處嘅人比好多安全感你,等你知道就算你有幾差,佢都唔會離開你。

呢啲人就好似一個填極都填唔滿嘅井咁樣,另一邊會好辛苦。

Kenta踏出咗第一步,有時都會約吓公司嘅一個女同事一齊食飯,而個女仔亦都好似對佢有啲意思。Kenta喺呢方面無任何經驗,係咁問我點做好。佢同我講佢同個女仔嘅相處,我就發現有另一個問題,佢開始有啲chur。

「個女仔依家未一齊都對我愛理不理咁,咁一齊咗點算?有次佢好耐都無覆我,咁我咪同佢講,佢唔應,咁我唯有去搵其他人傾計囉。」Kenta有啲不滿咁講。

「或者咁講⋯⋯你有無聽過咩係情緒勒索?」我問佢。

「好似有⋯⋯吓?你想講我情緒勒索緊佢?」Kenta似乎好唔同意。

情緒勒索係講緊我哋用自己同某個人之間嘅關係,嚟勒索佢做一啲佢本身唔太想做嘅嘢。例如話:

「你唔幫我,咁我下次唔會唔會再搵你幫啦⋯⋯明嘅,我哋都唔係真係咁熟。」
「我係對你有期望先叫你咁做,你唔做算,當我睇錯咗你。」

有時會情緒勒索人,係因為自己無安全感,希望人哋表現到佢緊張你––啫係,佢原本唔想做嘅嘢,最後都做咗,咁佢啫係在意我啦。呢個方法可以無限使用,反覆咁確認對方依然係好在意你,嚟提高自己嘅安全感。

「係呢段關係入面⋯⋯你想得到嘅係咩?」我問。

「我想佢在意我多啲囉!咁如果一齊,大家都要好在意對方先係。」Kenta講。

「如果你想要嘅係愛,或者係關注⋯⋯呢啲都未必係你可以用呢啲方法獲取嘅嘢喎。你諗吓,如果佢單純怕你搵第二個而變到秒回你,咁係未真係代表佢在意你?你真係可以得到安全感咩?」我問。

「⋯⋯」佢靜咗一靜。

「愛唔係可以迫番嚟嘅嘢,要時間、要心機先可以建立一段關係,一段感情。如果佢今次妥協,你都係會無安全感,因為呢啲嘢係你要脅佢得番嚟,下一次你又會用同一個方法,然後無限loop 喎。」我同佢講。

佢似懂非懂咁點頭。

之後見咗佢一排,見到Kenta有用心一點一點咗改善自己,我都覺得好安慰。最後佢成功搵到佢嘅另一半,雖然話我哋大過之後性格都定型得七七八八,但只要願意擺心機落去,性格都仲可以一點一點咁改變㗎。希望Kenta同佢女朋友之後生活得幸福快樂啦!

 

*根據臨床催眠治療師之保密原則,文章中沒有披露任何個案的個人資料,個案亦經一定程度修改。

*插圖與人物完全無關

 

 

作者:Professor Chan

Professor Chan
90後土生土長香港人。精神健康導師,臨床催眠治療師,NLP高級執行師,中文冥想應用程式創辦人。遠赴台灣參加發呆比賽,勝出後獲得「發呆王」稱號,希望更多人可以關注精神健康~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199177
Date: 2019-09-18 07:12:36
Generated at: 2020-04-02 08:48:21
Permalink: https://www.vjmedia.com.hk/articles/2019/09/18/199177/男client話佢無拍過拖,係因為好多女人佢都睇唔上眼