美麗與智慧並重,肯定唔係香港小姐

 

近年無線香港小姐收視每況愈下其實有原因:除咗睇到人尷尬癌發作嘅低智天才表演外,佳麗嘅質素查實都慘不忍睹, 睇返2017年嘅冠軍雷莊兜,唔係黑箱作業嘅話都解釋唔到個賽果。智慧又無,美麗又無,香港小姐呢個長壽得嚟又低收視嘅節目,相信好快壽終正寢。

叫得上神話,通常都係有特定時空背景支撐。

我老豆老母成日講舊史,包括香港小姐,同我拗話李嘉欣、張曼玉都「好靚好正」吖。其實靚唔靚同正唔正,都係社教化「洗腦」過程嘅產物,當果個年代身邊個個人都話「瓜子臉、大眼、高鼻、 白淨、長髮、胸大、瘦身材」就係靚同正,你老豆老母夠唔夠薑同人講唔係?一台獨大,加上香港人嘅人云亦云羊群心理,香港小姐必然炒得起,唔駛點講智慧之餘,仲壟斷埋對美麗定義。你試下叫返李嘉欣出嚟選,淨係識幾句官方嘅標準答案,加多句「我真係恭喜你啊」,觀眾反檯都似。

多謝香港小姐,號稱先進同好國際化嘅香港對「靚」嘅定義,足足落後世界40年。迪士尼作為世界同小朋友嘅大台,一早已經同時代接軌:「靚」唔再等同腰細眼大,唔再局限於傻白甜。我拜年嘅時候問過下啲姨甥仔女,鍾意邊個迪士尼公主,Merida 同Moana一樣榜上有名-外型雖然唔算最討好,但憑住勇氣同自信,出到嚟果種氣質小朋友同埋大人一樣受落。

事實上,離開香港呢個圍爐小圈子,「靚」已經再無單一定義,而且充滿無限可能性,就好似以前D、E Cup大胸叫做「標準」,而家有人會同你講貧乳先係皇道,澳洲IG blogger Lily Maymac就展現出平胸一樣有女人味;新加坡model Duan Mei Yue就話你知,一副闊眼內雙兼圓鼻嘅厭世樣,一樣可以大殺四方。所以,離開香港,世界同眼界都可以好大。

講到香港咁落後,其實一樣有人嘗試去挑戰社會對「靚」嘅集體想像,例如最近Dove提倡「美不只一種」, 搵一班貧乳、大細眼、上年紀、剷青頭嘅做廣告model,去演繹乜嘢先係真正嘅美。我見到真係當堂嚇一跳,亦搵唔到呢堆女嘅共通點,原因係每個model都有自己特質同氣質,每個都係有性格嘅獨立個體。我覺得佢哋順眼過今年班選美佳麗,起碼唔係一班著住團體泳衣嘅女人,擺出討好嘅表情,講埋一堆言不由衷嘅說話,去迎合星級評判同埋家庭觀眾。

跟唔上時代嘅香港小姐神話注定有破滅一天,參加得嘅,都係想搭上前往紙醉金迷世界嘅尾班車;參加咗嘅,都人在江湖身不由己,至於美貌與智慧並重?真係哂氣啦。作為喺屋企食花生嘅家庭觀眾,相比起上嚟其實最自由,既然而家世道已經咁艱難,與其努力迎合社會,倒不如活得精彩,自然可以練就出一種唯我獨尊嘅「靚」。

 

作者:阿波

上班族一名

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199204
Date: 2019-09-20 06:06:14
Generated at: 2020-10-25 01:32:52
Permalink: https://www.vjmedia.com.hk/articles/2019/09/20/199204/美麗與智慧並重,肯定唔係香港小姐