【有朋友做零售業高層】把握動亂機遇,將經濟重組至香港人本位

 

海港城舖頭示意圖,與文中內容完全無關

 

對上一次行海港城有店員招呼嘅時候,係幾時?我係上星期。

嗰一刻,我好開心。開心到我同隔離嗰個講,我想日日來海港城感受下。

開心嘅,唔只係因為無乜大陸人,仲係可以喺班sales 之中搵返客戶應該得到嘅招呼,就算我無幫襯,佢地都會記得老細點樣吩咐,所有入店舖嘅人都要招呼,因為行入去帶旺你間鋪,已經係對你未來可能進行到嘅交易有貢獻,混吉嘅客係無償幫你賣緊廣告。

再之前幾時試過咁呢?我已經無印象。

但今時唔同往日喇。

有啲商人就喺度賴,話暴動影響經濟,我心諗,我地呢班no stake 人士,不嬲就唔係你地target customers,我幫唔幫襯,究竟會令你跌幾多單生意?

 

做乜嘢生意唔洗諗定風險?做乜嘢生意可以齋服侍同一堆大陸客養你過世?

所謂嘅動亂影響經濟,我諗只係地產商呃人嘅說話。

接待大陸人嘅旅行社酒店之類更加係崩盤式下跌,名牌銷情係慘淡左好多,有朋友做零售業高層,佢話喺海港城有啲brand 都係佢地嘅,跌幾多?佢話大約八成,兩百萬生意跌到三四十萬咁話。

可能你而家準備講句抵死,但其實人地業務都好多元化,名牌brand 只係其中一部份,詳細唔講,講得太多就同篤灰無分別架喇。

 

其實真係對而家消費市場有研究嘅話,係好清楚生意下跌原因係乜嘢。

事實上,就係中美貿易戰真係令大陸人窮左,之前一箱一箱現金咁來香港買嘢嘅人係少左好多,而服侍呢堆「大款」嘅舖頭又好產業又好,就食正個勢,跌到喊,但係其他消費項目呢?

有出街消費嘅人,其實都一定feel 到,市面上香港人吃喝玩樂仍然大把,唯一有大改變嘅,就係週末出去消費之前,要睇「香港人日程」睇清楚邊度係去消費金錢邊度係消費血汗前途同埋生命咁解。

機會留俾有準備嘅人,如果香港真係會面臨大變化,喺呢個變化來到之前,都要有所準備。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199216
Date: 2019-09-24 05:48:50
Generated at: 2020-01-20 21:13:00
Permalink: https://www.vjmedia.com.hk/articles/2019/09/24/199216/【有朋友做零售業高層】把握動亂機遇,將經濟重