如果私了元祖係關雲長,咁攬炒KOL 應該係毛澤東

 

 

呢排義士界講開私了,要數私了界鼻祖一定係關羽,佢喺鄉下殺左個土豪劣紳,然後先走佬輾轉識到劉備張飛一齊參軍。

香港社運潮流而家興講攬炒,以攬炒換利益、換話語權甚至換生存,呢個唔係天荒夜譚,而係真實發生。

 

而講到攬炒,除左極端伊斯蘭組織嘅自殺式恐怖襲擊之外,比較大規模由為香港人認識嘅,就要數到毛澤東。

毛澤東發動文革,討論呢樣嘢已經唔係乜嘢禁區,中共因應呢個十年浩劫都採取左好多措施,去限制中共總書記、國家主席嘅實權。

毛澤東之所以發動文革,係感受到自己喺中共同埋國家領導層中開始失勢。中國喺「大躍進」之後陷入全國飢荒,估計餓死左幾千萬人,中共稱之為「自然災害」。毛澤東成立新中國之後,因為政策失誤而餓死幾千萬人,中共入面嘅人好清楚所謂人民公社大鑊飯呢種嘅管理模式係有必要改變,而希望改變嘅就係劉少奇同埋鄧小平。

中共入面都要講道理講理性,有道理自然會上到位,但係毛澤東唔係咁諗,至少佢唔甘心就咁退居二三線。

利用輿論,帶動群眾情緒,將風向帶到自己嗰邊,呢個係毛澤東嘅看家本領。感受到自己會失勢,佢做嘅唔係保存名節然後歸隱江湖,而係用佢仲有嘅「政治能量」,挑動成個中國入面嘅年輕人,叫佢地「擁護毛主席」,叫佢地「打倒資產階級」。

毛澤東將全中國帶入去一場動亂之中,佢就為佢嘅「政敵」,即係劉少奇呀鄧小平呀之類,安插一個又一個嘅罪名。

而紅衛兵,以擁護毛主席嘅名義,就可以為所欲為,同樣對自己唔鍾意嘅人,扣上唔同嘅帽子,然後就可以對佢做咩都得。

 

毛澤東嘅攬炒,唔係佢死都要攬住全中國一齊死,唔係咁,絕對唔係,佢係為左自己一個唔洗死,而要全中國都死,到最後佢唔係被殺,係自然咁病死。

想玩攬炒嘅人,其實可以好好參考毛主席嘅玩法,先炒死其他人,唔洗咁急攬落去。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199398
Date: 2019-09-28 06:36:15
Generated at: 2019-12-11 05:09:00
Permalink: https://www.vjmedia.com.hk/articles/2019/09/28/199398/如果私了元祖係關雲長,咁攬炒kol-應該係毛澤東