年輕人暑期工第一日就遲到——「我啱啱先瞓醒,依家仲駛唔駛我返黎?」

 

小編上年咪見過幾位暑「奇」工嘅,點知原來一山還有一山高,岩岩嗰個暑假小編有幸又見識到一位「奇葩男」。

話說臨近暑假嘅時候,公司有個經理話想推薦一個姪仔入黎做下暑期工,而大腦細又一口應承咗,應該係諗住有人幫手影下印,做下跑腿都好。(唔好問小編點解公司會有哩種用人唯親嘅陋習,小編唔知亦唔想知,只係知道哩間唔係唯一一間,亦唔會係最後一間咁樣做嘅公司。)

咁大腦細開到聲,梗係照做啦,咪打俾「奇葩男」,通知佢返工日子、時間同埋人工等等嘅資料。點知小編哩頭都未講完,嗰頭「奇葩男」已經好唔耐煩咁講:「哩啲野你可唔可以同我老豆講,我俾佢電話你……」

丫,你老板丫,你返工定你老豆返工,請你老豆定請你,定你老豆係你代言人?!小編梗係唔會打電話俾你老豆!

到咗原定返工嘅第一日,過咗上晝 9 點(原定返 9 點),小編都仲未見到「奇葩男」,心諗仲以為佢唔黎,點知到咗 9 點半,佢又突然出現。

噢,原來係遲到。

返工第一日就遲到,um……都無乜野嘅,當你暑期工唔識野。

點知再望一望。欸?短褲、涼鞋?雖然小編個 Office 未至於要著哂成套 Suit,但最低限度你都整返條長褲同包趾鞋丫。算了,慳返啖氣暖下個胃好過。

咁入職點都會做返啲基本手續,小編問「奇葩男」拎張身份證黎影印,佢竟然話:「我無帶喺身……」

小編問:「欸?漏咗喺屋企?」

「奇葩男」:「我不嬲都無帶,我怕喺街跌咗。」

無身份證……係咪要打電話 call 入境處……

請示咗腦細,話一日半日,由佢,叫佢第二日帶返。

到咗第二日,見到「奇葩男」無出現,諗住佢係咪又遲到,點知去到 10 點半都仲未見人,於是小編就打一打俾佢,確定佢唔係出咗啲咩意外。

跟住小編得到一個咁嘅答案:「我都唔知今日返幾點,唔知係咪同尋日一樣,所以我留咗喺屋企。」

其實之前都向佢提過哩份係 Office 工,返朝 9 晚 6,就當佢真係唔記得咗,佢唔知係咪都應該問聲?要知道小編唔似佢老豆咁得閒,唔記得每日臨放工前同佢講:「聽日返 9 點。」

經過寧靜嘅三日,以為相安無事,點知第四日又唔見「奇葩男」返工,小編決定今次等佢打返黎。結果等到下晝 4 點半,終於有消息:「我啱啱先瞓醒,完全唔知今朝會唔知醒,依家仲駛唔駛我返黎?」

Er……

其實大家都唔會諗住暑期工識做好多野,但最低限度有啲交帶,有返啲基本禮貌……

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199511
Date: 2019-09-29 06:15:30
Generated at: 2020-02-21 09:09:53
Permalink: https://www.vjmedia.com.hk/articles/2019/09/29/199511/年輕人暑期工第一日就遲到-「我啱啱先瞓醒,