香港暴徒的盜亦有道——Starbucks 遭殃,PCC 無事

 

打砸搶燒,睇落一定係唔啱架喇,但係香港式嘅打砸搶燒,又好似有佢地內裡嘅道理邏輯。

凌晨蒙面法已生效,呢十幾個鐘,周圍都好亂,警察嘅語言係,暴徒周圍無差別咁放火,毆打其他市民,嚴重威脅其他人嘅生命同財產。

 

 

優品360,示威者話呢間野係福建幫經營嘅,相傳福建幫就係喺荃灣斬人嗰班,斬人斬到永久傷殘,佢地認為,既然警察都唔會拘捕真正嘅暴徒,咁不如自己執行呢個懲罰。

當警察話佢地無差別咁放火,諷刺嘅係,一街之隔嘅759阿信屋,仲可以安然咁喺暴動之下繼續營業,絲毫無損。

 

 

美心集團太子女伍淑清,71歲仲女乜嘢,anyway,自從佢干預中華基金中學嘅罷課,同埋上聯合國批評示威者,美心集團旗下所有食肆就遭殃了。

我本身都唔係好食美心,畢竟呢啲垃圾留返餵狗都虐畜,示威者對佢嘅恨,係來自佢衰多口。

大家真係要睇清楚,同樣係賣咖啡,美心集團營運嘅星巴克(Starbucks),係會被暴徒為佢提供免費裝修,而打正旗號係周恩來幫手成立嘅國企,華潤嘅管理層乃至員工,呢幾個月來都無公開衰多口,旗下嘅太平洋咖啡(Pacific Coffee Company),從來唔會被人齋坐唔畀錢,更加唔會免費裝修到室內雅座變露天茶座。

 

 

當警察話佢地無差別咁攻擊市民,我反而好好奇,警方口口聲聲話,任何人都可以離開危險嘅地方,點解嗰啲被打到頭破血流嘅人,每每就係要走入去人地度,搣人地啲紙又有,影人地相又有,明明執行職務又唔表明身分嘅便衣警察又有。

我唔係話打人係啱呀,打人真係好錯,不過當班真暴徒,即係拿住張刀走去斬到人地隻腳永久無知覺,或者斬人地肺動脈斷裂要住深切治療嗰啲,發生過咁多次,咁啲示威者,面對有可能遇到嘅攻擊小心一啲,真係發現有人來意不善,就用武力趕走佢地,喺警察完全唔會幫佢地嘅情況之下,呢個會唔會已經係唯一可以做嘅嘢?

 

我真係唔需要為任何暴徒講說話,反正吿到上庭,呢啲廢話都唔會改變到啲乜嘢,只係如果真係要了解而家啲暴徒,唔係話佢地無差別咁威脅香港人生命財產,就可以正確掌握佢地嘅心態。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199767
Date: 2019-10-05 07:25:39
Generated at: 2019-10-20 07:47:42
Permalink: https://www.vjmedia.com.hk/articles/2019/10/05/199767/香港暴徒的盜亦有道-starbucks-遭殃,pcc-無事