【唔係塔羅個案】印傭姐姐群組都有熱烈討論同鄉被香港警察射盲眼事件

 

今日同大家講個故事。

我喺中學時期,屋企曾經聘用一位印尼姐姐長達六年,去照顧當時生病嘅母親。

佢在我家工作幾年,生活極為節儉,頂多很偶爾地在平價成衣店添置一兩件衣服;我那時有多餘的零用錢,自己買衫,買多件送比佢,佢已經開心到要連續打幾個電話同姐妹曬命。

直至母親病逝後,佢其實已經儲夠錢返鄉下,既供哂細佬妹讀大學,亦已經購置小小地皮,起屋供家人安居。

所以我叫佢不如辭職回家。

佢臨行前一晚,攬住我喊咗好耐,叫我要定時食飯,早啲返屋企,自己得閒要煲啲湯飲,要食生果,同埋,要堅強。

我同姐姐感情極好,去到而家,都仲有 Facebook 聯絡。

佢本身喺印尼讀到大學畢業,但黎到香港,每晚臨瞓,都會借我啲 Grammar 參考書、Harry Potter、仲有當時我成套齊哂嘅 Penguin 出版社歐美 Literature 逐本睇,逐個生字查字典,去進修自己啲英文。

佢回鄉後,創立自己的小小生意,當起英語補習教師,小學到成年人都教,去到現在,生意頗有規模,是個老闆了,最近仲買咗隻船仔。

然後,我前幾日同佢道歉。雖然我無資格講啲乜野,但係佢地嘅記者黎採訪,被奪去一隻眼睛,我內心覺得很抱歉。雖然香港讓我覺得抱歉或者忿怒的事,當然不止這一件。

姐姐話,喺香港工作嘅同鄉,一直有與印尼嘅姐妹們交流香港狀態。

至少佢嘅圈子入面,啲印尼姐姐本身憎到警察癲,因為佢地嘅所作所為,同印尼啲警察基本上無分別;再加上有同鄉(仲要係女性)被警察射盲,大家內心都有很強烈的,類似,復仇的意識,只是未必知道點樣做,或者,唔會公開講點樣去做。

當然亦有持相反意見嘅藍絲姐姐,所以佢地嘅群組都會喺度辯論,只不過誰是誰非,各有說詞,同香港網上狀況差不多。不過藍嗰啲姐姐,通常會比黃姐姐用一句「咁鍾意仆街政權嘅你死返去印尼打工啦」而收皮(姐姐原文係:Rush back to Indo to serve the gov and police to enjoy your “freedom”,粗口係我自己加嘅,Sorry)

姐姐最後講左一句:

The gov should work for her citizens, not killing her citizens. Gov does not listen to her people is bad gov. Should be replaced.

God bless HK.

我同佢傾到呢度,有少少眼濕濕。好多人都明,偏偏關鍵嘅人唔會明。仆街垃圾正苦。

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199854
Date: 2019-10-07 00:08:02
Generated at: 2019-10-20 23:27:28
Permalink: https://www.vjmedia.com.hk/articles/2019/10/07/199854/【唔係塔羅個案】印傭姐姐群組都有熱烈討論同鄉